ကိုရိုနာသတင်းမှားဖြန့်ရင် အရေးယူမည်၊ စိုးရိမ်မလွန်ကြဖို့ အစိုးရ ပြော

ကိုရိုနာဗိုင်းရပ်စ်နဲ့ ပတ်သက်ပြီး သတင်းမှားတွေ မယုံကြဖို့၊ ပြည်သူတွေမလိုအပ်ဘဲ မထိတ်လန့်ကြဖို့နဲ့ လတ်တလော အစိုးရဆောင်ရွက်ချက်တွေကို ရှင်းပြတဲ့သတင်းစာရှင်းလင်းပွဲကို နိုင်ငံတော်သမ္မတရုံးက မတ်လ ၁၃ နေ့ ဒီနေ့ နေပြည်တော်မှာ ကျင်းပခဲ့ပါတယ်။

ကိုရိုနာဗိုင်းရပ်စ်နဲ့ပတ်သက်ပြီး မြန်မာပြည်သူတွေ အစိုးရိမ်မလွန်ကြဖို့နဲ့ မစိုးရိမ်ဘဲလည်း မနေကြဖို့ သမ္မတရုံး ပြောရေးဆိုခွင့်ရှိသူ ဦးဇော်ဌေးက နိုင်ငံတော် သမ္မတရုံး သတင်းစာရှင်းလင်းပွဲမှာ ဒီနေ့ ပြောကြားခဲ့တာပါ။

မတ်လ ၁၂ ရက်နေ့ မနေ့က ညပိုင်းမှာ လူမှုကွန်ယက်စာမျက်နှာတွေအပေါ် သတင်းမှားဖြန့်တာတွေကြောင့် ရန်ကုန်မြို့မှာ စားသောက်ကုန်တွေကို အလုအယက်ဝယ်ယူကြတဲ့ သတင်းတွေဖြစ်လာခဲ့ပါတယ်။

သတင်းမှားဖြန့်တဲ့သူတွေကို အစိုးရအနေနဲ့ စိစစ်နေပြီး တွေ့ရှိရင် ပြင်းပြင်းထန်ထန် အရေးယူသွားမယ်လို့ ဆိုပါတယ်။

တစ်ကမ္ဘာလုံးက ရောဂါ တိုက်ဖျက်ရေးမှာ ပူးပေါင်းဆောင်ရွက်နေကြတာဖြစ်ပြီး မြန်မာနိုင်ငံက ကုန်သည်ပွဲစားတွေအနေနဲ့လည်း ကိုယ်ကျိုးစီးပွားကိုပဲကြည့်ပြီး မလုပ်ဖို့ ဦးဇော်ဌေးက ပန်ကြားခဲ့ပါတယ်။

ကမ္ဘာ့ကျန်းမာရေးအဖွဲ့ WHO က ကိုရိုနာဗိုင်းရပ်စ်ကို ကမ္ဘာ့ကပ်ရောဂါအနေနဲ့ မတ်လ ၁၁ ရက်နေ့က ကြေညာချက်ထုတ်ပြန်ပြီး နောက်တစ်ရက် မတ်လ ၁၂ ရက်နေ့မှာပဲ မြန်မာအစိုးရက ပွဲလမ်းသဘင်တွေ၊ လူစုလူဝေးတွေကို ဧပြီလအထိ မလုပ်ဖို့ ကြေညာချက်ထုတ်ပြန်ခဲ့တာပါ။

အစိုးရအနေနဲ့ WHO ရဲ့ ညွှန်ကြားချက်တွေအတိုင်း လိုက်နာဆောင်ရွက်နေပြီး ပြည်သူတွေနေနဲ့ ကျန်းမာရေးနဲ့ အားကစားဝန်ကြီးဌာနရဲ့ ညွန်ကြားချက်အတိုင်း လိုက်နာကြဖို့ကိုလည်း တိုက်တွန်းပါတယ်။

အစိုးရအနေနဲ့ ကိုရိုနာရဲ့ သက်ရောက်မှုတွေမှာ ကျန်းမာရေး၊ စီးပွားရေးကိစ္စရပ်တွေကိုလည်း ကုစားနိုင်ဖို့ ကြိုတင်ပြင်ဆင်နေတယ်လို့လည်း ဦးဇော်ဌေးက ပြောသွားပါတယ်။

ကိုရိုနာဗိုင်းရပ်စ်ကြောင့် တကမ္ဘာလုံး သေဆုံးသူ ၄၇၀၀ ကျော်ရှိနေပြီး ကူးစက်ခံရသူပေါင်း တစ်သိန်း သုံးသောင်းနီးပါး ရှိနေပါတယ်။

မြန်မာနိုင်ငံမှာ သံသယလူနာ နှစ်ဦးနဲ့ စောင်ြ့ကည့်လူနာ ၁၀၂ ဦးရှိနေပြီး ဒီနေ့ မတ်လ ၁၃ ရက်နေ့အထိ ပိုးတွေ့ရှိသူတစ်ယောက်မှ မရှိသေးဘူးလို့ ကျန်းမာရေးဌာနက ထုတ်ပြန်ထားပါတယ်။