အယူခံတင်သူ ၁၉ ဦးကို ရခိုင်ပြည်နယ် ရွေးကောက် ပွဲကော်မရှင် ပယ်ချ

ရခိုင်ပြည်နယ်မှာ ကိုယ်စားလှယ်လောင်းအဖြစ်ကနေ ပယ်ချခံထားရသူ ၂၁ ဦးထဲက ပြည်နယ်ရွေးကောက် ပွဲကော်မရှင်ကို အယူခံတင်ထားသူ ၁၉ ဦးကို ဒီနေ့ ပယ်ချလိုက်ပါတယ်။

ကျန်ရှိနေသေးတဲ့ အယူခံကိုယ်စားလှယ်လောင်း ၂ ဦးကိုတော့ မနက်ဖြန်မှာ အပြီးသတ်ဆုံးဖြတ်ပေးသွားမယ်လို့ ရခိုင်ပြည်နယ်ရွေးကောက်ပွဲကော်မရှင် ဥက္ကဌ ဦးအောင်မြက ပြောပါတယ်။

"နှစ်မှုကျန်တယ်ထင်တယ်၊ ကိုယ်စားလှယ်နာမည်က ဦးဘခင်နဲ့ ဦးကျော်ဇောဦး တို့ကိုတော့ အမိန့်မချသေးဘူး၊ ကျန်တဲ့လူကတော့ ပယ်လိုက်ပြီးပြီ၊ မနက်ဖြန်ကျမှ အမိန့်ချမယ်"

ဒီနေ့ပယ်ချခံရတဲ့ လွှတ်တော်ကိုယ်စားလှယ်တွေထဲမှာ ဒီမိုကရေစီနဲ့လူ့အခွင့်အရေးပါတီ က ၁၁ ဦး၊ အမျိုးသား ဖွံ့ဖြိုးတိုးတက်ရေးနဲ့ ငြိမ်းချမ်းရေးပါတီက ၆ ဦး၊ အမျိုးသား ဒီမိုကရေစီအဖွဲ့ချုပ်က ၁ ဦးနဲ့ တသီးပုဂ္ဂလ ၁ ဦးတို့ ဖြစ် ပါတယ်။ ဒီမိုကရေစီနဲ့ လူ့အခွင့်အရေးပါတီက ကိုယ်စားလှယ်လောင်း ၁၁ ဦးဟာ မိဘနှစ်ပါးနိုင်ငံသားမဖြစ်တဲ့ အကြောင်းပြချက်နဲ့ ပယ်ချခံရတာဖြစ်ပါတယ်။ အမျိုးသားဒီမိုကရေစီအဖဲ့ွချုပ် ကိုယ်စားလှယ်လောင်းက အသက် ၃၀ မပြည့်လို့ ပယ်ချခံရတာဖြစ်ပါတယ်။

ရခိုင်ပြည်နယ်မှာ တစ်သီးပုဂ္ဂလ ကိုယ်စားလှယ်လောင်းတွေနဲ့ နိုင်ငံရေးပါတီအသီးသီးက ကိုယ်စားလှယ်ပေါင်း ၃၅၀ လောက် ဝင်ရောက်ယှဉ်ပြိုင်ကြမှာဖြစ်ပါတယ်။