ရခိုင်ဒုက္ခသည်တွေကို အကူအညီပေးရေးလုပ်ငန်း တိုးမြှင့်ခွင့်ပြုမည်

ရခိုင်ပြည်နယ်မှာ နိုင်ငံတကာအဖွဲ့တွေကို လူသားချင်းစာနမှုလုပ်ငန်းတွေ ဆောင်ရွက်နိုင်ဖို့ တိုးမြှင့်ခွင့်ပြုပေး သွားမယ်လို့ နိုင်ငံခြားရေးဝန်ကြီးဌာနက မနေ့က ထုတ်ပြန်ထားပါတယ်။

အစိုးရအနေနဲ့ ICRC အပါအဝင် နိုင်ငံတကာ လူသားချင်းစာနာမှု ဆောင်ရွက်နေတဲ့ အဖွဲ့တွေကို ရခိုင်ပြည်နယ်မှာ လုပ်ငန်းဆောင်ရွက်ခွင့် ပိုပေးသွားမယ်လို့ နိုင်ငံခြားရေးဝန်ကြီးဌာနက ထုတ်ပြန်ထားပါတယ်။

ဒီလိုအစိုးရက နိုင်ငံတကာအဖွဲ့တွေကို ကူညီခွင့်ပိုပေးမယ်ဆိုတာကို ရခိုင်မှာရှိတဲ့ အရပ်ဖက်အဖွဲ့တွေ၊ ဒေသခံတွေက ကြိုဆိုကြပါတယ်။

အခုလို နိုင်ငံတကာအဖွဲ့တွေ ပိုလုပ်ခွင့်ပေးလိုက်တာကြောင့် နိုင်ငံတကာအကူညီကို လိုအပ်နေတဲ့ ဒေသခံတွေ အတွက် ပိုကောင်းစေတယ်လို့ မြောက်ဦးမြို့နယ် တိမ်ညိုကျေးရွာ အုပ်ချုပ်ရေးမှူး ဦးဝေလှအောင်က ပြောပါတယ်။

“လူသားချင်းစာနာမှုက ပိုလုပ်ဖို့လိုအပ်သလို သတင်းရယူခွင့်လည်း ရယူဖို့အရေးကြီးတာပေါ့နော်၊ ဥပမာ သတင်းသမားတွေ လွတ်လပ်ခွင့်၊ ရယူခွင့်ရှိဖို့ရယ်၊ အရပ်ဖက်အဖွဲ့အစည်းတွေရယ်၊ နိုင်ငံတကာအဖွဲ့တွေရယ် လွတ်လပ်စွာသွားလာ ကူညီခွင့်ရဖို့ရယ်၊ နောက်တစ်ခုက အင်တာနက် ပိတ်ထားတာပေါ့၊ အဲဒါကိုလည်း ဖွင့်ပေးဖို့လိုတယ်၊ အင်တာနက် ပိတ်ထားတဲ့အတွက် သူတို့မှာ ရရမယ့်အခွင့်အရေးတွေ ဆုံးရှုံးနေတယ်၊ သတင်းအချက်လက် ရယူခွင့်မှာလည်း နှေးကွေးနေတာပေါ့”

ရခိုင်ပြည်နယ်မှာရှိတဲ့ စစ်ဘေးရှောင်တွေဟာ နွေရာသီမှာ ရေအခက်အခဲရှိသလို ကျန်းမာရေးအပါအဝင် နေထိုင်ရေးမှာလည်း လုံခြုံမှုမရှိဘဲဖြစ်နေတယ်လို့ ဒေသအခြေစိုက် အရပ်ဖက်အဖွဲ့တွေက ဆိုပါတယ်။

ဒုက္ခသည်တွေဟာ စားသောက်ရေးအတွက် နိုင်ငံတကာအဖွဲ့တွေကိုပဲ မှီခိုနေရပြီး နေထိုင်ရေးမှာလည်း အခက်အခဲတွေရှိနေပါတယ်။

နိုင်ငံတကာအဖွဲ့တွေက အကူညီပေးရာမှာလည်း အစိုးရက အကန့်အသတ်တွေနဲ့သာ ခွင့်ပြုထားပြီး အကူအညီမရောက်တဲ့ နေရာတွေလည်း အများကြီးရှိပါတယ်။

အရပ်ဖက်အဖွဲ့တွေ သွားရောက်ကူညီတဲ့အခါမှာလည်း တပ်မတော်နဲ့ ပြည်ထဲရေးဝန်ကြီးဌာနက ကန့်သတ်တာတွေ ရှိခဲ့ပါတယ်။

အနောက်ပိုင်းတိုင်း စစ်ဌာနချုပ် တိုင်းဦးစီး ဗိုလ်မှူးကြီး ဝင်းဇော်ဦးကတော့ အစိုးရခွင့်ပြုချက်နဲ့ ပေးပို့တဲ့ အကူအညီတွေကို တပ်မတော်က တားဆီးကန့်သတ်တာတွေ မရှိကြောင်း ပြောပါတယ်။

ဒုက္ခသည်တွေကို ရိက္ခာထောက်ပံ့ ကူညီရာမှာ ကန့်သတ်တားဆီးခံရတာတွေလည်းရှိတယ်လို့ ရခိုင်အမျိုးသားကွန်ရက် ဥက္ကဋ္ဌ ဦးတင်ထူးအောင်က ပြောပါတယ်။

“ပိုကောင်းတာပေါ့ဗျာ၊ ဘာပြောပြော စစ်ဘေးရှောင် ရခိုင်ပြည်သူတွေအတွက်၊ စစ်ဘေးရှောင်တွေ အဓိကမှီခိုအားထားနေရတာက ICRC ပေါ့၊ သူတို့ နိုင်ငံတကာအဖွဲ့အစည်းတွေကို အစိုးရကနေပြီး ပိုကူညီနိုင်အောင် လုပ်ပေးမယ်ဆိုတာက ဝမ်းသာစရာသတင်းပေါ့ဗျာ”

နိုင်ငံတကာအဖွဲ့တွေကို ကူညီဆောင်ရွက်ခွင့် တိုးမြှင့်ပေးမယ်ဆိုတာနဲ့ ပတ်သက်ပြီး နိုင်ငံခြားရေးဝန်ကြီးဌာနနဲ့ ရခိုင်ပြည်နယ်အစိုးရအဖွဲ့ကို RFA က ဆက်သွယ်ပေမယ့် လက်ခံဖြေကြားတာ မရှိပါဘူး။

အစိုးရဝန်ကြီးဌာနတွေ ညှိနှိုင်းဆွေးချက်တွေအရ လူသားချင်းစာနာမှု အကူညီပေးနေတဲ့ အပြည်ပြည်ဆိုင်ရာ ကြက်ခြေနီကော်မတီ (ICRC) အပါအဝင် နိုင်ငံတကာ လူသားချင်းစာနာမှုဆိုင်ရာ မဟာမိတ်အဖွဲ့တွေကို လုပ်ငန်းဆောင်ရွက်ခွင့်တွေ ပိုပေးဖို့ဆုံးဖြတ်ထားတယ်လို့ နိုင်ငံခြားရေးဝန်ကြီးဌာနက ထုတ်ပြန်ချက်မှာ ပါရှိပါတယ်။

အစိုးရအနေနဲ့လည်း ရခိုင်ပြည်နယ်မှာ တိုက်ပွဲတွေကြောင့် နေရပ်စွန့်ခွာသူတွေကို လူသားချင်းစာနာ ထောက်ထားမှု အကူညီတွေပေးတာတွေကို အရှိန်ဟုန်မြင့် ဆောင်ရွက်သွားဖို့ရှိတယ်လို့လည်း ဆိုပါတယ်။

ICRC အဖွဲ့ကို ဒီကိစ္စနဲ့ ပတ်သက်ပြီး ဆက်သွယ်မေးမြန်ထားပေမယ့် ညနေ ၆ နာရီအထိ ပြန်လည်ဖြေကြား တာတော့ မရှိသေးပါဘူး။

အစိုးရအနေနဲ့ ဒုက္ခသည်တွေကို ထောက်ပံ့ကူညီမှုတွေ တိုးမြှင့်ဆောင်ရွက်ပေးတာအပြင် အင်တာနက်လိုင်းတွေကို ပြန်ဖွင့်ပေးမှ ဒုက္ခသည်တွေရဲ့ အခက်အခဲတွေကို အချိန်နဲ့တပြေးညီ ကူညီနိုင်မယ်လို့ ဝံလက်ဖောင်ဒေးရှင်းက ခိုင်ကောင်းစံက ပြောပါတယ်။

“စားနပ်ရိက္ခာ ထောက်ပံ့တဲ့အခါ အဓိက အခက်အခဲကြုံရတာက ဘာလဲဆိုတော့ တိုင်းရင်းသား လက်နက်ကိုင်တွေဆီ ရောက်သွားသလားဆိုတဲ့ သံသယအချက်ပေါ့၊ ဒီသံသယအချက်ဟာ စစ်တပ်ရဲ့ တားဆီးမှုတွေရှိသလို ထွေအုပ်ရဲ့ တားဆီးမှုလည်းရှိတယ်၊ ပြည်ထဲရေးဝန်ကြီးဌာနအောက်ရှိ ရဲလိုအဖွဲ့အစည်းကအစ သံသယမျက်စိနဲ့ ကြည့်တာခံရတယ်၊ ဒီအခက်အခဲတွေကို ဖြေလျော့ပေးမယ် ဆိုရင်တော့ ဝမ်းသာတာပေါ”

ရခိုင်ပြည်နယ် မြောက်ပိုင်းမှာ တပ်မတော်နဲ့ ရက္ခိုင့်တပ်တော် AA တို့ရဲ့ တစ်နှစ်ကျော်ရှိလာပြီဖြစ်တဲ့ တိုက်ပွဲ တွေကြောင့် နေရပ်စွန့်ခွာ ထွက်ပြေးတိမ်းရှောင်နေရတဲ့ စစ်ဘေးဒုက္ခသည် တစ်သိန်းသုံးသောင်းနီးပါး ရှိနေပြီဖြစ်ပါတယ်။

စစ်ဘေးဒုက္ခသည်တွေဟာ စားနပ်ရိက္ခာအတွက် နိုင်ငံတကာအကူအညီနဲ့ ပြင်ပအလှူရှင်တွေရဲ့ ထောက်ပံ့ကူညီမှုတွေကို အားကိုးနေရပါတယ်။

ရခိုင်ပြည်နယ်က စစ်ဘေးဒုက္ခသည်တွေကို နိုင်ငံတကာ အဖွဲ့တွေဖြစ်တဲ့ ကမ္ဘာ့စားနပ်ရိက္ခာအစီအစဉ် WFP နဲ့ နိုင်ငံတကာ ကြက်ခြေနီအဖွဲ့ ICRC တို့က စားနပ်ရိက္ခာ အကူအညီပေးနေတာပါ။

အဲဒီအဖွဲ့တွေရဲ့ အကူညီပေးရေးအစီစဉ်တွေကို ကန့်သတ်ခံရတာတွေ၊ တိုက်ခိုက်ခံရတာ တချို့ရှိခဲ့ပါတယ်။