ရသေ့တောင်မှာ တိုက်ပွဲဖြစ်ပြီး ဒေသခံ ငါးထောင်ကျော် ထွက်ပြေးရ

ရခိုင်ပြည်နယ် ရသေ့တောင်မြို့နယ် မညှင်းတောင်အနီး ဩဂုတ် ၃၀ ရက် မနေ့ညပိုင်းက စစ်ကောင်စီတပ်နဲ့ ရက္ခိုင့်တပ်တော် (AA) တို့ တိုက်ပွဲဖြစ်ပွားခဲ့ပြီး အနီးအနားဝန်းကျင်မှာရှိ တဲ့ ကျေးရွာ ၁၀ ရွာက ဒေသခံ ငါးထောင်ကျော် ဘေးလွတ်ရာကို ထွက်ပြေးတိမ်းရှောင်နေ ရတယ်လို့ ဒေသခံတွေက RFA ကို ပြောပါတယ်။

ည ၇ နာရီကနေ ည ၁၂ နာရီလောက်အထိ တိုက်ပွဲဖြစ်ပွားခဲ့တာကြောင့် ကုလားချောင်း၊ ကုန်တန်း၊ ပြိန်းတော၊ ညောင်ပင်လှ၊ ရေမျက်၊ သမီးလှ၊ င/စံဘော်၊ ကျောက်ရံ၊ မောင်ဖြူရွာ၊ ဗောဓိကုန်း စတဲ့ ကျေးရွာတွေက ဒေသခံတွေ ထွက်ပြေးရတာပါ။

ဒီတိုက်ပွဲအတွက် အရပ်သားထိခိုက်သေဆုံးတာ မရှိဘူးလို့ ဒေသခံတွေက ပြောပါတယ်။

ရေစိုးချောင်းဗျူဟာမှာ စခန်းချထားတဲ့ စစ်ကောင်စီတပ်က ကုလားချောင်းကျေးရွာကို ရိက္ခာဆင်းယူတဲ့အချိန်မှာ ရက္ခိုင့်တပ်တော် (AA) က ကြားဖြတ်တိုက်ခိုက်ခဲ့တာလို့ ဒေသခံတွေက RFA ကို ပြောပါတယ်။

ဩဂုတ်လ ၃၁ ရက် ဒီကနေ့ မနက်ပိုင်းမှာလည်း လက်နက်ငယ်သံတချို့နဲ့ လက်နက်ကြီး ပစ်ခတ်သံတွေ ကြားရတယ်လို့လည်း ဒေသခံတွေက ပြောပါတယ်။

ဒီဒေသခံတွေဟာ ပြီးခဲ့တဲ့ ၂၀၁၉ ခုနှစ်ကလည်း စစ်ကောင်စီတပ်နဲ့ AA အကြား နှစ်ဖက် တိုက်ပွဲတွေကြောင့် ရသေ့တောင်မြို့အနီးတစ်ဝိုက်က စစ်ဘေးဒုက္ခသည်စခန်းတွေမှာ အချိန်နှစ်နှစ်ကျော်ကြာ ခိုလှုံနေခဲ့ရပါတယ်။

၂၀၂၀ ပြည့်နှစ် နိုဝင်ဘာလကစလို့ တိုက်ပွဲတွေ ရပ်စဲသွားတဲ့အတွက် ၂၀၂၁ ခုနှစ် အစောပိုင်းမှာ နေရပ်ပြန်ခဲ့ကြတာပါ။

ဒါပေမဲ့ စစ်ကောင်စီက ရခိုင်ပြည်နယ်အတွင်း AA တပ်ဖွဲ့ဝင်တွေကို လိုက်လံဖမ်းဆီးတာ ကနေ ၂၀၂၂ ခုနှစ် မေလကစလို့ စစ်ကောင်စီတပ်နဲ့ AA အကြား စစ်ရေးတင်းမာမှုတွေ ပြန်ဖြစ်လာပြီး မကြာခဏဆိုသလို ထိတွေ့တိုက်ပွဲတွေ ဖြစ်လာနေတာပါ။