လက်နက်ကြီးကြောင့် ကျောက်ကြီးမြို့နယ် ဒေသခံ ၂၅၀၀ ကျော် ထွက်ပြေး

ပဲခူးတိုင်း၊ ညောင်လေးပင်ခရိုင်၊ ကျောက်ကြီးမြို့နယ်မှာ စစ်ကောင်စီတပ် ခလရ (၆၀) က မတ်လ ၁၈ ရက်မှာ လက်နက်ကြီးနဲ့ ပစ်ခတ်တာကြောင့် ကျေးရွာလေးရွာက ဒေသခံ ၂၆၉၆ ဦး အိုးအိမ်စွန့်ခွာထွက်ပြေးနေရတယ်လို့ ကရင်အမျိုးသားအစည်းအရုံး (KNU) က မတ်လ ၁၉ ရက်မှာ သတင်းထုတ်ပြန်ပါတယ်။

ထွနီကုန်းရွာ၊ ဆေးပုလဲရွာ၊ ရေလဲ (ကရင်) ရွာနဲ့ ရေလဲ (ဗမာ) ရွာ လေးရွာက အိမ်ထောင်စု ၅၁၁ က လူဦးရေ ၂၆၀၀ ကျော် ထွက်ပြေးနေရတာလို့ဆိုပါတယ်။

နှောင်ကုန်းရွာကနေ စစ်ကောင်စီတပ် ခလရ (၆၀) က လက်နက်ကြီးနဲ့ ပစ်ခတ်ရာမှာ ရေလဲ (ကရင်) ရွာထဲကို လက်နက်ကြီးကျည် ခြောက်လုံးကျရောက်ပေါက်ကွဲပြီး နွားသုံးကောင် ဒဏ်ရာရခဲ့တယ်လို့ KNU က ထုတ်ပြန်ပါတယ်။

ဒီပစ်ခတ်မှုအတွက် အရပ်သားတွေက ထွက်ပြေးတိမ်းရှောင်နေတာကြောင့် ထိခိုက်ဒဏ်ရာရရှိတာမရှိဘူးလို့ ဆိုပါတယ်။

ကရင်အမျိုးသားအစည်းအရုံး (KNU) လက်အောက်ခံ KNLA တပ်မဟာ (၃) က ထိန်းချုပ်ထားတဲ့ ညောင်လေးပင်ခရိုင်အတွင်း စစ်ကောင်စီတပ်က လက်နက်ကြီးနဲ့ ပစ်ခတ်တာတွေ မကြာခဏပြုလုပ်နေတာလို့ ဒေသခံတွေက ပြောပါတယ်။

စစ်ကောင်စီတပ်ဘက်ကတော့ လက်တလော KNLA တပ်တွေနဲ့ ဖြစ်ပွားနေတဲ့ တိုက်ပွဲတွေနဲ့ပတ်သက်လို့ သတင်းထုတ်ပြန်တာမရှိပါဘူး။

စစ်အာဏာသိမ်းပြီးနောက် စစ်ကောင်စီတပ်နဲ့ KNU လက်အောက်ခံ KNLA တပ်တွေ အကြား တိုက်ပွဲပေါင်း ရှစ်ထောင်ကျော် ဖြစ်ပွားခဲ့ပါတယ်။