ရေနက်ဆိပ်ကမ်းတည်ဆောက်ရေး လူ ၂ သောင်းခန့် ရွှေ့ပြောင်းခံရဖွယ်

ထားဝယ်ရေနက်ဆိပ်ကမ်းဟာ မောင်းမကန် အပန်းဖြေစခန်း မြောက်ပိုင်းကနေ ကန်ပေါက် တောင်ပိုင်း တလျှောက်မှာ ရှိတဲ့ ကျေးရွာပေါင်း ၁၉ ရွာ ရွှေ့ပြောင်းပေးရမယ် ဆိုတာ သေချာနေပြီ ဖြစ်ကြောင်း မွန် အလုပ်သမားအဖွဲ့တခုရဲ့ တာဝန်ခံတဦးက RFA ကို ပြောပါတယ်။

“ကျွန်တော်တို့ မောင်းမကန် ဆိပ်ကမ်းပေါ့၊ ဆိပ်ကမ်းဆိုတာ ဒီ ပင်လယ် အပန်းဖြေတဲ့နေရာပေါ့ဗျာ၊ အဲဒီကနေ ဒီ မြောက်ပိုင်းကနေပြီးတော့ တောင်ပိုင်းရဲ့ တောင်ပိုင်းပေါ့ဗျာ၊ အဲဒီ ကမ်းခြေတလျှောက်မှာ ရွာ ၁၉ ရွာ ရှိတယ်။ အဲဒီ ရွာ ၁၉ ရွာကတော့ အားလုံး စုစုပေါင်းလိုက်လို့ ရှိရင် အိမ်ခြေ ၃,၀၀၀ လောက်တော့ ရှိတယ်။ မြေဧကအနေနဲ့ ပြောလို့ရှိရင် တသိန်းလောက်တော့ ရှိမယ်။

ထားဝယ် ရေနက်ဆိပ်ကမ်းကို တာဝန်ယူထားတဲ့ အီတလီ-ထိုင်း (Italian-Thai) စီးပွားရေးအုပ်စုကြီးရဲ့ အဆိုအရ ရေနက်ဆိပ်ကမ်း စီမံကိန်းဟာ အကျယ်အဝန်းဟာ မိုင် ၁၀၀ ပတ်လည် ရှိမှာ ဖြစ်ပြီး အမေရိကန်ဒေါ်လာ သန်း ရှစ်ထောင် ကုန်ကျမယ်လို့ ခန့်မှန်းထားပါတယ်။ ရေနက်ဆိပ်ကမ်း အစီအစဉ်မှာပါတဲ့ စက်ရုံတွေကတော့ သံမဏိစက်ရုံ၊ ဓာတ်မြေသြဇာစက်ရုံ၊ ရေနံသန့်စင်စက်ရုံတွေ နဲ့ ကျောက်မီးသွေး ဓာတ်အားထုတ် စက်ရုံတွေ ဖြစ်တယ်လို့ သိရပါတယ်။