စစ်ကောင်စီကို ရုရှားလက်နက်တင်ပို့တာ ကန့်သတ်နိုင်ဖို့ အမေရိကန်နည်းလမ်းရှာမည်

မြန်မာစစ်ကောင်စီ လက်နက်ရရှိနေတာ ပိုပြီးခက်ခဲလာအောင် ပိုမိုတင်းတင်းကျပ်ကျပ် အရေးယူဒဏ်ခတ်ပိတ်ဆို့နိုင်အောင် ဆက်လက်နည်းလမ်းရှာမယ်လို့ အမေရိကန်နိုင်ငံခြားရေးဌာန အကြံပေးအရာရှိ Derek Chollet က ပြောကြားလိုက်ပါတယ်။

မြန်မာစစ်ကောင်စီကို ရုရှားက လက်နက်တွေပေးပို့နေတာ အမေရိကန်ပြည်ထောင်စုက အထူးစိုးရိမ်မကင်းဖြစ်ရပြီး ဒီလို ပူးပေါင်းဆောင်ရွက်နေတာ ကန့်သတ်နိုင်ဖို့ ဆက်လက်ကြိုးစားမယ်လို့လည်း ပြောပါတယ်။ စစ်ကောင်စီကို အရေးယူဒဏ်ခတ်မှု အသစ်တွေချမှတ်တာ အပါအဝင် စစ်ကောင်စီကို ဆက်လက်ဖိအားပေးမယ်လို့လည်း Derek Chollet က သူ့လူမှုကွန်ရက် twitter မှာရေးသားထားပါတယ်။

အရေးပေါ်ကာလကို ဖေဖော်ဝါရီ ၁ ရက်မှာ နောက်ထပ်ခြောက်လ သက်တမ်းတိုးလိုက်တယ်လို့ သိရပါတယ်လို့လည်း ပြောပြီး စစ်ကောင်စီက ကျင်းပတဲ့ ဘယ်ရွေးကောက်ပွဲမဆို လွတ်လပ်ပြီး တရားမျှတမဟုတ်ဘူးလို့ Derek Chollet က သုံးသပ်ပါတယ်။

ဒါဟာ ရွေးကောက်ပွဲမှာ ပြိုင်ဖက်အဖြစ် အလားအလာရှိသူအားလုံးကို အကျဉ်းချဖို့ ဒါမှမဟုတ် ခြိမ်းခြောက်ဖို့ ဖြစ်တယ်လို့ ပြောပါတယ်။ တကယ်တော့ စစ်ကောင်စီဟာ မြန်မာ့ပိုင်နက် ၅၀ % နီးပါး ထိန်းချုပ်ထားနိုင်တာ မဟုတ်ဘူးလို့လည်း ပြောပါတယ်။