၆၆(ဃ) ပြင်ဆင်ဖို့ မေးခွန်း ဆိုင်းငံ့ခံရ

ပြီးခဲ့တဲ့မတ်လအတွင်းက အဲဒီပုဒ်မကို ဖျက်သိမ်းပေးဖို့ မေးခွန်းမေးမြန်းဖို့ တင်ပြခဲ့ရာမှာ ဆိုင်းငံ့ထားဖို့ ပြောထားပြီး ဒါဟာ ဒုတိယအကြိမ်ဖြစ်ပါတယ်။

စာပေလွတ်လပ်ခွင့်၊ မီဒီယာလွတ်လပ်ခွင့်ရှိဖို့ လိုအပ်ပြီး အာမခံမပေးတာကို ပြင်ဆင်စရာ ဖြစ်တဲ့အတွက် မေး ခွန်းမေးဖို့ ၂ ကြိမ်တိုင်တိုင်ကြိုးစားနေတာလို့ စာရေးဆရာ ဝင်းထွဋ်ဇော် ခေါ် လွှတ်တော်ကိုယ်စားလှယ် ဦးရဲထွဋ် က ပြောပါတယ်။

ပြည်ထောင်စုလွှတ်တော် ဥပဒေရေးရာနဲ့ အထူးကိစ္စရပ်များ လေ့လာဆန်းစစ်သုံးသပ်ရေးကော်မရှင်က ၆၆ (ဃ) ပုဒ်မထဲက ပြစ်မှုပြစ်ဒဏ်အပိုင်းကို ပြင်ဆင်ဖို့ အကြံပြုထားတာရှိပါတယ်။ အဲဒီအကြံပြုချက်မှာ အာမခံပေးဖို့ နဲ့ ထောင်ဒဏ် အများဆုံး ၃နှစ်ကနေ ၂ နှစ်အထိ လျှော့ချ ပြင်ဆင်ပေးဖို့ အကြံပြုထားတာ ဖြစ်ပါတယ်။

လက်ရှိအချိန်အထိ ဆက်သွယ်ရေးဥပဒေပုဒ်မ ၆၆ ဃ နဲ့ တရားစွဲဆိုခံရတဲ့ အမှုပေါင်း ၇၀ နီးပါးရှိပြီး လတ်တလော မှာ The Voice သတင်းစာအယ်ဒီတာချုပ်နဲ့ ဆောင်းပါးရှင်ကို တပ်မတော်က တရားစွဲဆိုထားတာလည်းဖြစ်ပါတယ်။