တောင်ကိုရီးယားသမ္မတ မြန်မာအစိုးရနှင့် တွေ့ဆုံဆွေးနွေး

သူဟာ မနက်ဖြန် မနက်ပိုင်းမှာ အမျိုးသားဒီမိုကရေစီ အဖွဲ့ချုပ် (NLD) ဥက္ကဋ္ဌ ဒေါ်အောင်ဆန်းစုကြည်နဲ့ ရန်ကုန်မြို့မှာ တွေ့ဆုံဆွေးနွေးမှာ ဖြစ်ပါတယ်။

တောင်ကိုရီးယား သမ္မတဟာ သမ္မတ ဦးသိန်းစိန်နဲ့ တွေ့ဆုံဆွေးနွေးရာမှာ နှစ်နိုင်ငံ ကုန်သွယ်ရေးအပြင် စွမ်းအင်ဆိုင်ရာ ရင်းနှီးမြှုပ်နှံမှုကိစ္စတွေကိုလည်း အဓိကထား ဆွေးနွေးမယ်လို့ ဆိုပါတယ်။

တောင်ကိုရီးယား သမ္မတရဲ့ ခရီးစဉ်အတွင်း လုံခြုံရေးအတွက် စိုးရိမ်မှုရှိတာကြောင့် ရန်ကုန်မြို့မှာ လုံခြုံရေးကို တင်းတင်းကြပ်ကြပ် ချထားတယ်လို့ ဆိုပါတယ်။

တောင်ကိုရီးယား သမ္မတ မစ္စတာလီဟာ နှစ်ပေါင်း ၃၀ အတွင်း ပထမဆုံးအကြိမ်အဖြစ် မြန်မာနိုင်ငံကို လာရောက်ပြီး ဆွေးနွေးတာ ဖြစ်ပါတယ်။

၁၉၈၃ ခုနှစ်က တောင်ကိုရီးယား သမ္မတ Chun Doo-hwan နဲ့ အစိုးရအဖွဲ့ဝင် ဝန်ကြီးတွေ မြန်မာနိုင်ငံကို လာရောက်လည်ပတ်စဉ်က ရန်ကုန်မြို့ အာဇာနည်ကုန်းမှာ မြောက်ကိုရီးယား သူလျှိုတွေက ဗုံးဖောက်ခွဲ လုပ်ကြံတိုက်ခိုက်တာကြောင့် လူပေါင်း၂၁ ဦး သေဆုံးခဲ့ရပါတယ်။ သေဆုံးသူတွေထဲမှာ မြန်မာနိုင်ငံဆိုင်ရာ တောင်ကိုရီးယား သံအမတ်ကြီးနဲ့ ဝန်ကြီးအဖွဲ့ဝင် ၃ ဦးအပြင် တောင်ကိုရီယား အရာရှိကြီးတွေ ပါဝင်ခဲ့ပါတယ်။