ကျောက်မိုင်းတူးဖော်မှုတွေကို စီစစ်သွားမယ်လို့ မွန်ဝန်ကြီး ချုပ် ပြော

မွန်ပြည်နယ်အတွင်း ကျောက်ထုတ်လုပ်ငန်းလုပ်ကိုင်နေတဲ့ ကျောက်မိုင်းလုပ်ကွက် ၈ဝ ကျော် ရှိတယ်လို့ မွန်ပြည်နယ်အစိုးရအဖွဲ့ သယံဇာတနဲ့ သဘာဝပတ်ဝန်းကျင် ထိန်းသိမ်းရေးဝန်ကြီးဌာန က ထုတ်ပြန်ထားပါတယ်။

အဲဒီကျောက်မိုင်းတွေက ထွက်ရှိတဲ့ ကျောက်ကျင်းတစ်ကျင်းကို မွန်ပြည်နယ်အစိုးရက အခွန်အဖြစ် ကျပ်၂၅၀၀ ရရှိတာဖြစ်ပါတယ်။

အခွန်တွေပိုမိုရရှိအောင် ကျောက်မိုင်းတွေကနေ အမှန်တကယ်ထွက်ရှိတဲ့ ကျောက်ကျင်း အရေအတွက်ကို မြို့နယ် သဘာဝသယံဇာတနဲ့ သဘာဝပတ်ဝန်းကျင်ထိန်းသိမ်းရေး ဝန်ကြီးဌာနတွေက အနီးကပ်စောင့်ကြည့်တာတွေ၊ ကုမ္ပဏီတွေနဲ့ ချုပ်ဆိုထားတဲ့ စာချုပ်တွေ၊ ကျောက်မိုင်းခွဲရာမှာ အသုံးပြုတဲ့ ခွဲမိုင်းတွေနဲ့ပတ်သက်ပြီး စစ်ဆေး သွားမှာဖြစ်သလို ချိုးဖောက်ရင် အရေးယူဆောင်ရွက်သွားမယ်လို့ ဝန်ကြီးချုပ်က ပြောပါတယ်။

ဝန်ကြီးချုပ် ဒေါက်တာအေးဇံ က ကျောက်မိုင်း ၅၀နီးပါးကို စစ်ဆေးခဲ့ရာမှာ တစ်ခုမှ စည်းကမ်း လိုက်နာတာ မရှိဘူးလို့လည်း ပြောခဲ့ပါတယ်။