ပါတီထက် တိုင်းပြည်အနာဂတ်က ပိုအရေးပါကြောင်း ဒေါ်အောင်ဆန်းစုကြည်ပြောဆို
2011.03.14
အမျိုးသား ဒီမိုကရေစီ အဖွဲ့ချုပ် (NLD) အထွေထွေ အတွင်းရေးမှူး ဒေါ်အောင်ဆန်းစုကြည်နှင့် မြန်မာနိုင်ငံ တိုင်းနှင့် ပြည်နယ်များမှ လူငယ်များ တွေ့ဆုံဆွေးနွေးပွဲကို ဖေဖော်ဝါရီ ၈ ရက်နေ့က ရန်ကုန်မြို့၊ ဗဟန်း၊ ရွှေဂုံတိုင်လမ်းရှိ ဌာနချုပ်ရုံးတွင် ကျင်းပနေခြင်း ဖြစ်ပါသည်။ (Photo: AFP)
ဒီကနေ့ မနက် ၁၀ နာရီက အမျိုးသား ဒီမိုကရေစီအဖွဲ့ချုပ်ရုံး အစည်းအဝေးခန်းမမှာ ကျင်းပခဲ့တဲ့ NLD ပါတီ ဗဟို ကော်မတီဝင်တွေနဲ့ မကွေးတိုင်း တိုင်းစည်း အဖွဲ့ဝင်တွေ ညနေ ၄နာရီအထိ တွေ့ဆုံ ဆွေးနွေးခဲ့ကြပါတယ်။ မနက်ပိုင်း အစည်းအဝေး ဖွင့်ပွဲမှာ ဒေါ်အောင်ဆန်းစုကြည်ရဲ့ အမှာစကားနဲ့ ပတ်သက်ပြီး ပါတီပြန်ကြားရေး တာဝန်ခံ ဦးအုန်းကြိုင်က ခုလို RFA ကို ပြောပါတယ်။
“တချို့က စိုးရိမ် ပူပန်နေတဲ့ လူတွေလည်း ရှိတော့ ရှိတာပေါ့။ ကျွန်မတို့ကတော့ ဒါကို မစိုးရိမ်ပါဘူး။ အဓိကကတော့ ပြည်သူလူထုရဲ့ ထောက်ခံမှု ရရှိနေရင်း ပြည်သူနဲ့ တသားတည်း ဖြစ်နေနိုင်လို့ရှိရင် အမျိုးသား ဒီမိုကရေစီ အဖွဲ့ချုပ်ရဲ့ အနာဂတ်အတွက် ကျွန်မတို့ ဘာမှ စိတ်ပူစရာ မရှိပါဘူး။ တကယ်တော့လည်း အမျိုးသား ဒီမိုကရေစီ အဖွဲ့ချုပ်ရဲ့ အနာဂတ်က အဓိက မဟုတ်ပါဘူး။ တိုင်းပြည်ရဲ့ အနာဂတ်ဟာ အဓိက ဖြစ်ပါတယ်။ တိုင်းပြည်မှာ ဒီမိုကရေစီ ရရှိရေးအတွက်သာ အဓိက ဖြစ်ပါတယ်။ အဲဒါ ဦးတည်ပြီးတော့ ကျွန်မတို့ ပံ့ပိုးနိုင်တဲ့ အကူအညီတွေကို အကြံဉာဏ်ပေးပါလို့ ပန်ကြားချင်ပါတယ်လို့ အဲဒီလို အဖွင့်မိန့်ခွန်း ပြောကြားပါတယ်။”
ဆွေးနွေးပွဲမှာ မကွေးတိုင်း၊ တိုင်းစည်းကိုယ်စား ဦးညွန့်လှိုင်က တင်ပြပြီး မြို့နယ် ၂၂ မြို့နယ်က ဖြစ်စဉ်တွေ၊ အခက်အခဲတွေကို မြို့နယ် စည်းကော်မတီဝင်တွေနဲ့ လူငယ်အဖွဲ့ဝင်တွေက ဆက်လက်တင်ပြခဲ့ကြရာမှာ ဦးတင်ဦး၊ ဒေါ်အောင်ဆန်းစုကြည်နဲ့ ဦးဝင်းတင်တို့ က ပြန်လည်ရှင်းလင်းခဲ့ကြပါတယ်။ ညနေ၄နာရီမှာ အစည်းအဝေး သဘာပတိ ဦးတင်ဦးက ကမ္ဘာမှာ အာဏာရှင်ခေတ် မှေးမှိန်နေပြီဖြစ်ကြောင်း ဥပမာတွေနဲ့ တင်ပြပြောဆိုပြီး အစည်းအဝေး ရုပ်သိမ်းလိုက်ပါတယ်။
ဦးတင်ဦးကို RFA မှ ဦးတင်အောင်ခိုင်က ဆက်သွယ်မေးမြန်းခဲ့ပါတယ်။
 |
ဆက်သွယ်မေးမြန်းချက် |
 |
အသံဖိုင်ယူရန် |
ဖတ်ရှုသူအများဆုံး သတင်းများ။
သတင်းများ
