စားပွဲဝိုင်းဆွေးနွေးပွဲ ကျင်းပရေးအဆို ရခိုင်ပြည်နယ် လွှတ်တော်မှာ ဆွေးနွေးမည်

ရခိုင်ပြည်နယ်ထဲမှာ အစိုးရတပ်မတော်နဲ့ AA ရက္ခိုင့်တပ်မတော်တို့ဖြစ်ပွားနေတဲ့ တိုက်ပွဲတွေ ရပ်တန့်နိုင်ရေး စားပွဲဝိုင်းမှာဆွေးနွေးဖို့ ပြည်နယ်အစိုးရကနေတဆင့် ပြည်ထောင်စုအစိုးရထံ တိုက်တွန်းကြောင်း အဆိုကို ရခိုင်ပြည်နယ် လွှတ်တော်မှာ ကန့်ကွက်မယ့်သူမရှိတာကြောင့် ဒီနေ့ အတည်ပြုလိုက်ပါတယ်။

အဲဒီအဆိုကို ရသေ့တောင်မြို့နယ်က ပြည်နယ်လွှတ်တော်ကိုယ်စားလှယ် ဦးဦးသန်းနိုင်က တင်သွင်းတာဖြစ်ပြီး မြောက်ဦးမြို့နယ်က လွှတ်တော်ကိုယ်စားလှယ် ဦးကျော်ဝင်းကထောက်ခံခဲ့ပြီး အဆိုကို ဆွေးနွေးဖို့အတွက် လာမယ့်တနင်္လာနေ့ နောက်ဆုံးထားပြီး အမည်စာရင်းတင်သွင်းရမယ်လို့ ဦးဦးသန်း နိုင် က RFA ကို ပြောပါတယ်။

လာမယ့်အပတ်ထဲမှာ လွှတ်တော်ကိုယ်စားလှယ်တွေက ဆွေးနွေးကြမှာဖြစ်ပြီး အဆိုအောင်မြင်ရင် ပြည်နယ်အစိုးရကနေတဆင့် ပြည်ထောင်စုအစိုးရဆီ တိုက်တွန်းအကြောင်းကြားရမှာဖြစ်ပါတယ်။

ဒီသတင်းကို RFA သတင်းထောက် ကိုကျော်သူ ပေးပို့တာပါ။