မူးယစ်ဆေး သိန်း ၅ သောင်းကျော်ဖိုး တာချီလိတ်မှာ ဖမ်းမိပြန်

ကျပ်ငွေ သိန်းပေါင်း ၅ သောင်းကျော် တန်ဖိုးရှိတဲ့ မူးယစ်ဆေးဝါးတွေ မူးယစ်ဆေးထုတ်လုပ်တဲ့ စက်ပစ္စည်းတွေ နဲ့အတူ တရားခံ ၃ ဦးကို မူးယစ်ဆေးဝါး တားဆီးနှိမ်နင်းရေးရဲတပ်ဖွဲ့နဲ့ ပူးပေါင်းအဖွဲ့က တာချီလိတ်မြို့မှာ ဖမ်းဆီးရမိခဲ့ပါတယ်။

ဇူလိုင်လ ၂၅ ရက် နေ့က တာချီလိတ်မြို့နယ် မိုင်းကိုးအုပ်စု မယ်လိပါကော်ရွာက ဖါးဖါ ဆိုသူရဲ့ နေအိမ်နဲ့ ရာဘာခြံထဲမှာ ဝင်ရောက်ရှာဖွေခဲ့ရာက ဖမ်းဆီးမိခဲ့တာ ဖြစ်တယ်လို့ တာချီလိတ် မူးယစ်တပ်ဖွဲ့စု ၃ဝ က ရဲအုပ် အောင်ကျော်စိုးက RFA ကို အတည်ပြု ပြောဆိုပါတယ်။

"ဒီ ၂၅ ရက်နေ့က သတင်းရရှိထားတဲ့ မိုင်းကိုးအုပ်စု မယ်လိပါကော်ရွာက တောင်ယာတဲထဲမှာ သွားပြီးတော့ ဖမ်းတာ၊ စိတ်ကြွဆေးပြားတွေရော၊ နောက်တစ်ခါ စိတ်ကြွဆေးမှုန့် ၂၄၈ ကီလို၊ ယာအိုက်စ်က ၉ ကီလို၊ ဘိန်းဖြူ ၁၆ ဂရမ်နဲ့ စိတ်ကြွဆေးပြားရိုက်နေတဲ့ တန်းလန်းနဲ့မိတာပေါ့နော်၊ မူးယစ်ဆေးဝါးနဲ့ ဘိန်းဖြူ တန်ဖိုးကတော့ ကျပ်သိန်းပေါင်း ၅ သောင်းကျော်လောက် ခန့်မှန်းထားတယ်"

ဖမ်းဆီးရမိတဲ့ထဲမှာ ယာဘ ခေါ်တဲ့ စိတ်ကြွဆေးပြား ၊ စိတ်ကြွဆေးမှုန့်၊ ယာအိုက်စ်၊ ဘိန်းဖြူ၊ ကဖင်း၊ စိတ်ကြွဆေးပြားရိုက်စက်၊ လက်လုပ်သေနတ် တစ်လက်နဲ့အတူ တခြားဆက်စပ်ပစ္စည်း ၂၃ မျိုးကို သိမ်းဆည်းရမိခဲ့တယ်လို့ သိရပါတယ်။

ပြီးခဲ့တဲ့ ဇွန်လ ၁၃ ရက်နေ့တုန်းကလည်း တာချီလိတ်မြို့ ဆန်ဆိုင်း (က) ရပ်ကွက်က အိမ်တစ်အိမ်မှာ ကျပ်ငွေ သိန်းသုံးသောင်းကျော်ဖိုး စိတ်ကြွမူးယစ် ဆေးဝါးတွေနဲ့အတူ ထုတ်လုပ်တဲ့ စက်ပစ္စည်းတွေကိုလည်း မဲခေါင် စစ်ဆင်ရေးအဖွဲ့ကပဲ ဖမ်းဆီးရမိခဲ့တယ်ပါတယ်။