အသိမ်းခံလယ်မြေများ ပြန်ရရေး သံတွဲမှာ အစာငတ်ခံဆန္ဒပြ

မြန်မာနိုင်ငံ ဒေသအသီးသီးမှာ စစ်တပ်က သိမ်းဆည်းထားတဲ့ လယ်ယာမြေတွေ ပြန်လည်ရရှိရေး သုံးကြိမ်တိုင် တစ်ကိုယ်တော် ဆန္ဒဖော်ထုတ်ခဲ့တဲ့ အတွက် တရားမဝင်စီတန်းလည့်လည်ဆိုင်ရာ ပုဒ်မ-၁၈ နဲ့ တရားစွဲဆိုခံထားရတဲ့ သံတွဲမြို့ခံ ကိုစိုးဝေဟာ သံတွဲအကျဉ်းထောင်ထဲမှာ အစာငတ်ခံဆန္ဒပြနေတာ ၅ ရက်ရှိနေပြီလို့ မိသားစုဝင်တွေက ဒီနေ့ ပြောပါတယ်။

အာဏာပိုင်တွေဘက်က ကိုစိုးဝေကို ဖမ်းဆီးအရေးယူတာဟာ တရားမျှတမှုမရှိဘူးလို့ ယူဆတဲ့အတွက် အခုလို အစာငတ်ခံဆန္ဒပြနေ တာဖြစ်လို့ ဒီနေ့ ထောင်ဝင်စာသွားတွေ့ခဲ့တဲ့ ကိုစိုးဝေရဲ့မိခင် ဒေါ်အောင်ကြည် က RFA ကို ပြောပါတယ်။

“မှန်တာပြောတာကို သူ့ကိုဘာလို့အဲလိုချုပ်ရသလဲဆိုပြီးတော့ အစာမစားဘူး၊ အန်တီအနေနဲ့ကတော့ ကျန်းမာရေး စိုးရိမ်တာပေါ့နော်၊ မတရားသဖြင့် ပြစ်မှုကျူးလွန်တာ မဟုတ်တဲ့သူကို ဘာဖြစ်လို့မတရားသဖြင့် အခုလိုချုပ်ရသလဲ၊ ရဲစခန်းမှာလည်း တခါထမင်းမကျွေးဘူး၊ ဒီလိုဘာဖြစ်လို့ မတရားသဖြင့်လုပ်ရတာလဲလို့ အဲဒါအန်တီကတော့ အများကြီးခံစားရတာပေါ့နော်”

ကိုစိုးဝေဟာ ပြီးခဲ့တဲ့ စက်တင်ဘာလ ၂ ရက်နေ့က သုံးကြိမ်မြောက်အဖြစ် စစ်တပ်က သိမ်းဆည်းထားတဲ့ လယ်ယာမြေတွေပြန်လည်ရရှိဖို့ သံတွဲလေဆိပ်အနီးမှာ တစ်ကိုယ်တော် ဆန္ဒဖော်ထုတ်ရာမှာ ရဲစခန်းမှာ အာမခံမပေးဘဲ ထိန်းသိမ်းခံခဲ့ရတာဖြစ်ပါတယ်။ ဒါ့အပြင် ကိုစိုးဝေကို ပြီခဲ့တဲ့ သြဂုတ်လ ၈ ရက်နဲ့ ၂၃ ရက်နေ့တွေကလည်း တစ်ကိုယ်တော် ဆန္ဒထုတ်ဖော်ခဲ့ပါသေးတယ်။