ကျောင်းဆရာမကို ပစ်သတ်တဲ့ တပ်ဖွဲ့ဝင်ကို အရေးယူထားကြောင်း TNLA ပြော

မူလတန်းပြ ကျောင်းဆရာမ အသတ်ခံရတဲ့ကိစ္စမှာ ပြစ်မှုကျူးလွန်ခဲ့တယ်လို့ စွပ်စွဲခံရသူ TNLA တပ်ဖွဲ့ဝင် မိုင်းဖိုးစိန်ကို ဖမ်းဆီးထားပြီး ပလောင်ပြည်နယ် လွတ်မြောက်ရေးတပ်ဦး PSLF / TNLA တရားရေးဌာနကို အမှုစွဲတင် စစ်ဆေးနေတယ်လို့ သိရပါတယ်။

TNLA တပ်ဖွဲ့ဝင်အနေနဲ့ ဒီလိုပြစ်မှုမျိုး ကျူးလွန်တာ ပထမဆုံးဖြစ်ပြီး ဘယ်လိုအမိန့်ချမှတ်မလဲ ဆိုတာကိုတော့ အတိအကျ မပြောနိုင်သေးဘူးလို့ TNLA ပြန်ကြားရေးတာဝန်ခံ ဗိုလ်မှူး မိုင်းအိုက်ကျော်က RFA ကို ပြောပါတယ်။

ပြစ်မှုကျူးလွန်သူကို ပလောင်ပြည်နယ် လွတ်မြောက်ရေးတပ်ဦး PSLF/TNLA တရားရေးဌာနက တရားစီရင်ပြီးရင် ပြည်သူလူထုကို အသိပေးချပြသွားမှာဖြစ်ပြီး အမှုကို အမြန်ဆုံးစစ်ဆေး ဆောင်ရွက်သွားမယ်လို့ ဗိုလ်မှူး မိုင်းအိုက်ကျော်က ပြောပါတယ်။

“ဘယ်သူဖြစ်ဖြစ် ပြစ်မှုကျူးလွန်တဲ့အပေါ်မှာ ထိုက်တန်တဲ့အပြစ်ပေး အရေးယူဖို့ ကျွန်တော်တို့ အမြဲတမ်း လုပ်တယ်။ ပြစ်မှုကြီးကတော့ ဒီတစ်ခေါက်ပဲ တွေ့ဖူးတယ်။ အခြားအမှုတွေတော့ ရှိခဲ့ဖူးတယ်။ ဒီအတိုင်းတော့ ပစ်မထားပါဘူး။ အမြဲတမ်း အရေးယူဆောင်ရွက်ပါတယ်”

ဇန်နဝါရီ ၂၄ ညဦးပိုင်းက မိုင်းဖိုးစိန်ဟာ ကျောင်းဆရာမ လွေးမြမွှေးအောင်နေထိုင်တဲ့ ဟွေခုတ်ကျေးရွာထဲက နေအိမ်အတွင်းကို ဝင်လာပြီး ဘယ်ဘက်ပါးနဲ့ ဘယ်ဘက်နားထင်ကို သေနတ်နဲ့ အနီးကပ် ပစ်သွားခဲ့တာလို့ သိရပါတယ်။

TNLA က ထိန်းသိမ်းထားတယ်ဆိုတဲ့ သူကို ရဲတပ်ဖွဲ့ကလည်း အလိုရှိနေပါတယ်။

အမှုဖြစ်စဉ်နဲ့ပတ်သက်လို့  ရဲလုပ်ငန်းစဉ်အတိုင်း စုံစမ်းစစ်ဆေးနေကြောင်း၊ လူမှုရေး ပြဿနာတစ်ခုကြောင့် အခုလို ပစ်ခတ်မှုဖြစ်ပွားတယ်လို့ သိရကြောင်း လားရှိုးမြို့နယ် ဒုမြို့နယ်မှူး ရဲမှူးကြီး ဗညားဦးက ပြောပါတယ်။

ကွတ်ခိုင်မြို့နယ် (မြို့မ) ရဲစခန်းကလည်း ကျောင်းဆရာမ သေဆုံးမှုအတွက် ရာဇသတ်ကြီးပုဒ်မ (၃၀၂) နဲ့ အမှုဖွင့်ထားပြီး  တရားခံရရှိဖို့ ကြိုးပမ်းနေတယ်လို့ သိရပါတယ်။

“တရားခံမိပြီဆိုရင် ဥပဒေအတိုင်း ဆက်လုပ်သွားမယ်။ လက်နက်ကိုင် အဖွဲ့အစည်းဆိုင်ရာကျတော့ ကျွန်တော်တို့နဲ့ နည်းနည်းဝေးတယ်။ ရပ်ဖိရပ်ဖတွေနဲ့ ကျွန်တော်တို့အပိုင်မှာ တရားခံတွေ့ရင်ပြော၊  ကျွန်တော်တို့ဖမ်းလို့ရရင် ဖမ်းပေးပြီး ဥပဒေအတိုင်းပဲ ဆက်လုပ်မယ်။ လက်နက်ကိုင်အဖွဲ့အစည်းနဲ့ကျတော့ ကျွန်တော်တို့နဲ့ မအပ်စပ်ဘူး။  ကျွန်တော်တို့ဆီက မြို့နယ်မှူးတို့ ရပ်ကွက် အုပ်ချုပ်ရေးမှူးတို့တွေနဲ့ ညှိနှိုင်းပြီး ဆက်လက်ဆောင်ရွက်မယ်။ သူတို့တွေညှိနှိုင်းပြီးတော့ ဘယ်လိုတွေ အဖြေထွက်မလဲတော့ မသိဘူး”

အမျိုးသမီးများ အဖွဲ့ချုပ် (မြန်မာနိုင်ငံ) အထွေထွေ အတွင်းရေးမှူး လွေးပိုးငယ်က ဘယ်လက်နက်ကိုင် အဖွဲ့အစည်းမဆို အရပ်သားပြည်သူတွေအပေါ် အခုလို ကျူးလွန်သူကို ထိထိရောက်ရောက် အရေးယူဖို့ တိုက်တွန်းလိုက်ပါတယ်။

“ကိုယ့်ရဲ့စစ်သားပဲပြောပြော၊ နောက်လိုက်ပဲပြောပြော သူတို့တွေ ဒီလိုမျိုးမကျူးလွန်အောင် စနစ်ရှိရမယ်။ စနစ်လို့ပြောတဲ့အခါမှာ ပြစ်ဒဏ်ကြီးကြီးမားမား ပေးတယ်ဆိုရင်လည်း  တခြားလူတွေကို ဒီလို ထပ်မလုပ် ရဲအောင်ဆိုတဲ့ သာဓကတော့ ဖြစ်ပေမယ့် စနစ်တကျနဲ့ ဖြစ်မနေဘူးလေ။ ဒီလိုဖြစ်တဲ့အတွက် တကယ်ကို စနစ်တကျနဲ့ ကိုယ့်ရဲ့အောက်ခြေ စစ်သားတွေကို ထိန်းချုပ်နိုင်မယ့် စနစ်တစ်ခုတော့ လိုအပ်တယ်”

မူလတန်းပြဆရာမ လွေးမြမွှေးအောင်ဟာ ကွတ်ခိုင်မြို့နယ် နမ့်ဖက်ကာကျေးရွာဇာတိဖြစ်ပြီး ဟွေခုတ်ကျေးရွာမှာ တာဝန်ထမ်းဆောင်နေတာ လေးနှစ်ဝန်းကျင်ရှိနေပြီလို့ သိရပါတယ်။

ဇန်နဝါရီလ ၂၅ ရက်နေ့က သူ့ဇာတိရွာမှာ မီးသင်္ဂြိုဟ်ပေးခဲ့ကြတယ်လို့ ဆိုပါတယ်။

ဟွေခုတ်ကျေးရွာအနီး ပတ်ဝန်းကျင်မှာ TNLA လက်နက်ကိုင်တပ်ဖွဲ့နဲ့ အခြားသော မြောက်ပိုင်းမဟာမိတ်အဖွဲ့ တပ်ဖွဲ့ဝင်တွေ သွားလာလှုပ်ရှားတဲ့ နေရာဖြစ်တယ်လို့ ဒေသခံတွေက ပြောပါတယ်။

ရှမ်းပြည်နယ်မှာ ဆယ်စုနှစ်အတန်ကြာ တိုက်ပွဲဝင်ခဲ့တဲ့ ပလောင်လက်နက်ကိုင်အဖွဲ့ဟာ ၁၉၉၁ ခုနှစ်မှာ တပ်မတော်အစိုးရနဲ့ အပစ်ရပ်ပြီးနောက် အဖွဲ့အတွင်း သဘောထားကွဲကြပြီး TNLA အဖွဲ့ကို ၁၉၉၂ ခုနှစ်မှာ ထူထောင်ခဲ့တယ်လို့ မြန်မာသတင်းနိုင်ငံတကာ (BNI) က ရေးသားတည်းဖြတ်တဲ့ မြန်မာ့ငြိမ်းချမ်းရေး လုပ်ငန်းစဉ်ကိုပုံဖော်ခြင်း စာအုပ်မှာ ဖော်ပြထားပါတယ်။

TNLA အဖွဲ့ဟာ ရှမ်းပြည်မြောက်ပိုင်း မြို့နယ်အများအပြားမှာ လှုပ်ရှားနေပြီး ဌာနချုပ်ကို နေရာအတည်တကျ မထားဘူးလို့ ၂၀၁၇ -၂၀၁၈အတွက် ထုတ်ဝေတဲ့ အဲဒီစာအုပ်မှာ ဖော်ပြထားပါတယ်။ အဖွဲ့မှာ လက်နက်ကိုင် စစ်သည်အင်အား ၆၀၀၀ ရှိမယ်လို့ ခန့်မှန်းထားပါတယ်။