ရိုဟင်ဂျာပြန်ပို့ရန် အိန္ဒိယ စီစဉ်မှု ကုလ စိုးရိမ်
2018.10.02
အိန္ဒိယနိုင်ငံ နယူးဒေဟီမြို့က ယာယီတဲမှာတွေ့ရတဲ့ မွတ်စလင်တွေကို ၂၀၁၈၊ ဧပြီ ၁၆ ရက်နေ့က တွေ့ရစဉ်
Photo: MONEY SHARMA / AFP
ရိုဟင်ဂျာ ၇ ဦးကို အိန္ဒိယနိုင်ငံက မြန်မာနိုင်ငံ ပြန်ပို့ဖို့ စီစဉ်နေတဲ့အတွက် စိုးရိမ်ပူပန်ကြောင်း ကုလသမဂ္ဂ ဥပဒေရေးရာ အရာရှိတဦးက အင်္ဂါနေ့မှာ ထုတ်ဖေါ်ပြောကြားလိုက်ပါတယ်။
အိန္ဒိယနိုင်ငံကို တရားမဝင် ဝင်ရောက်ခဲ့တဲ့အတွက် ဖမ်းဆီးပြီး အာသံပြည်နယ်မှာ လက်ရှိ အကျဉ်းချထားတဲ့ အဲဒီမွတ်စလင်တွေကို ဒီကနေ့ အောက်တိုဘာလ ၃ ရက်နေ့မှာ မြန်မာနိုင်ငံ ပြန်ပို့ဖို့ စီစဉ်နေတာနဲ့ ပတ်သက်ပြီး ကုလသမဂ္ဂ အသားအရောင်ခွဲခြားဆက်ဆံမှုဆိုင်ရာ အထူးကိုယ်စားလှယ် Tendayi Achiume တင်ဒေရီ အာခီယွန် က အိန္ဒိယအစိုးရအနေနဲ့ ဒီလူတွေ မြန်မာပြည်ပြန်သွားရင် ရင်ဆိုင်ကြုံတွေ့နိုင်တဲ့ လူ့အခွင့်အရေးချိုးဖေါက် အရေးယူမှုတွေအတွက် တာဝန်ရှိကြောင်း ပြောဆိုရင်း သူတို့ကို အကာအကွယ်ပေးဖို့ တိုက်တွန်းလိုက်ပါတယ်။
ဒါ့အပြင် ကုလအရာရှိက အဲဒီ ရိုဟင်ဂျာ မွတ်စလင် ၇ ဦးကို အကာအကွယ်ပေးနိုင်ရန်အတွက် ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံးလက်ထဲကို လွှဲပြောင်းပေးဖို့ တာဝန်ရှိတယ်လို့လည်း ပြောပါတယ်။ အိန္ဒိယနိုင်ငံက အကျဉ်းထောင်တွေထဲမှာ တရားမဝင် ခိုးဝင်မှုနဲ့ ဖမ်းဆီးထားတဲ့ ရိုဟင်ဂျာဦးရေဟာ ၂ဝဝ နီးပါးရှိကြောင်းနဲ့ အဲဒီ ရိုဟင်ဂျာတွေ အပါအဝင် နိုင်ငံရေးခိုလှုံခွင့်တောင်းခံသူအားလုံးကို နိုင်ငံတကာ လုပ်ထုံးလုပ်နည်းတွေနဲ့အညီ ကာကွယ်ရန် တာဝန်ရှိကြောင်းလည်း ကုလအရာရှိက တိုက်တွန်းပြောကြား လိုက်ပါတယ်။
ဖတ်ရှုသူအများဆုံး သတင်းများ။
RFA
ဖတ်ရှုသူအများဆုံး သတင်းများ။
သတင်းများ
