ကလေးများအရေး ပါတီတွေ ဦးစားပေးဖို့ ကုလသမဂ္ဂ တိုက်တွန်း

မြန်မာနိုင်ငံရဲ့ အနာဂတ်ခေါင်းဆောင်တွေ၊ နောက်လာမယ့် အစိုးရသစ်တွေအနေနဲ့ နိုင်ငံတွင်းက ကလေးတွေကို ဗဟိုပြုဦးစားပေးပြီး၊ ကလေးတွေရဲ့ဘဝ အစကောင်းအောင် ဖန်တီးပေးကြဖို့ ကုလသမဂ္ဂ ကလေးများရန်ပုံငွေအဖွဲ့ UNICEF နဲ့ Save the Children ကလေးများ ကူညီစောင့်ရှောက်ရေးအဖွဲ့တို့က တိုက်တွန်းလိုက်ကြပါတယ်။

အဲ့ဒီအဖွဲ့ နှစ်ဖွဲ့ဟာ နိုဝင်ဘာ ၈ ရက် ရွေးကောက်ပွဲမတိုင်ခင် လပေါင်းအတော်ကြာကတည်းက နိုင်ငံရေး ပါတီပေါင်း ၈ဝ ကျော်ကို ဆက်သွယ်ပြီး၊ ကလေးတွေအတွက် မူဝါဒကောင်းတွေ ချမှတ်ကြဖို့ ဆော်သြခဲ့တာဖြစ် ပါတယ်။

UNICEF ရဲ့ စာရင်းဇယားတွေအရ မြန်မာနိုင်ငံမှာ ကလေးငယ် ၆ဝ ရာနှုန်းကျော်ဟာ ဆင်းရဲတဲ့အခြေအနေမှာ ရှိနေပြီး၊ ကလေး ၁၄ ယောက်မှာ တစ်ယောက်ဟာ အသက် ၅ နှစ်ပြည့်အောင် မနေရဘူးလို့သိရပါတယ်။ ဒါ့ပြင် အသက် ၅ နှစ်ကနေ ၁၈ ကြား ကလေးတွေရဲ့ သုံးပုံတစ်ပုံဟာ ကျောင်းမနေရဘဲ မိသားစုစားဝတ်နေရေးအတွက် အလုပ်လုပ်နေကြရပါတယ်။ မြန်မာ မိသားစု ၇ဝ ရာနှုန်းဟာလည်း ကုလသမဂ္ဂက သတ်မှတ်ထားတဲ့ ဆင်းရဲတဲ့ အဆင့်နီးပါး အခြေအနေမှာရှိနေကြတယ်လို့ ဆိုပါတယ်။

ဒါကြောင့် အစိုးရ အသုံးစရိတ်တွေမှာ ပညာရေး၊ ကျန်းမာရေးနဲ့ လူမှုဖူလုံရေး ကဏ္ဍတွေအတွက် ၉ ရာနှုန်းကနေ ၁၅ ရာနှုန်းအထိ တိုးမြှင့်သတ်မှတ်သုံးစွဲဖို့ တိုက်တွန်းထားကြပါတယ်။

ဒါ့ပြင် နိုင်ငံရေးပါတီတွေရဲ့ ကြေညာစာတမ်းတွေမှာ ကလေးတွေအတွက် ဘယ်လိုဘယ်ပုံ ဆောင်ရွက်ပေးမယ်ဆို တာတွေ ထည့်သွင်းဖို့၊ မဲဆန္ဒရှင်တွေအနေနဲ့လည်း နိုင်ငံရေးပါတီတွေက မဲဆွယ်စည်းရုံးတဲ့အခါ ကလေးတွေ အတွက် မူဝါဒကောင်းတွေ ပါမပါ ဦးစားပေး ဆုံးဖြတ်ကြတဲ့ အနေအထားကိုရောက်ရှိလာဖို့ မျှော်လင့်ကြောင်း UNICEF အဖွဲ့ရဲ့ မြန်မာနိုင်ငံဆိုင်ရာ ဌာနေကိုယ်စားလှယ်က ပြောပါတယ်။