လိုတာထက်ပိုပြီး အစိုးရိမ်မလွန် ကြဖို့ ဝန်ကြီးချုပ်က ပြော

"စိုးရိမ်ကြောင့်ကြမှုကတော့ ရှိမှာပါ။ ဒီကာလမှာ ပိုပြီးတော့ ရှိပါတယ်။ ဒါပေမဲ့ ကျနော်တို့ အနေနဲ့ ပြောချင်တာက လိုတာထက် ပိုပြီးတော့ မစိုးရိမ်ပါနဲ့။ စိုးရိမ်ကြောင့်ကြမှုတွေများပြီးတော့ ပိုပြီးတော့ မဖြစ်သင့်တာတွေ၊ မလုပ်သင့် တာတွေ ပိုပြီးတော့ ပိုလုပ်မယ်၊ ပိုပြောမယ်ဆိုရင် အန္တရာယ်ရှိပါတယ်။ ဒါကလည်း စောစောက ကျနော်ပြောသလို လူတိုင်းမှာ တာဝန်ရှိပါတယ်။ ဝိုင်းပြီးတော့ ထိန်းသိမ်းကြပါ"

ရခိုင်ပြည်နယ်က လူ့အဖွဲ့အစည်းတွေအနေနဲ့ တစ်ဖက်နဲ့ တစ်ဖက် အကြမ်းမဖက်ကြဖို့နဲ့ အတိတ်က ဖြစ်ရပ်တွေကို သင်ခန်းစာယူကြဖို့လည်း ဝန်ကြီးချုပ် ဦးညီပုက သတိပေးခဲ့ပါတယ်။

မောင်တော ဒေသခံတွေနဲ့ တွေ့ဆုံရာမှာ ပြည်ထောင်စုဝန်ကြီးတွေဖြစ်တဲ့ ဒေါက်တာဖေမြင့်၊ ဦးသိန်းဆွေတို့ တက်ရောက်ခဲ့ပြီး မောင်တော ဒေသခံ တစ်ရာကျော်တက်ရောက်ခဲ့တယ်လို့ သိရပါတယ်။

ပြီးခဲ့တဲ့အောက်တိုဘာလ ၉ ရက်နေ့က မောင်တောမြို့နယ်နဲ့ ရသေ့တောင်မြို့နယ်က ရဲကင်းစခန်း ၃ခု တိုက်ခိုက် ခံရပြီး လက်နက်တွေ ပါသွားတဲ့အတွက် တပ်မတော်နဲ့ နယ်ခြားစောင့်ရဲတပ်ဖွဲ့တွေက နယ်မြေရှင်း လင်းရေးတွေ ဆောင်ရွက်ရာမှာ ပစ်ခတ်မှုတွေ ရှိနေတာကြောင့် ဒေသခံတွေက စိုးရိမ်ထိတ်လန့်နေကြပါတယ်။

မောင်တောမြို့တစ်ဝိုက်က ကျေးရွာတွေမှာနေထိုင်တဲ့ ရခိုင်တိုင်းရင်းသားတချို့ဟာ ဘေးလွတ်ရာ မြို့ရွာတွေကို ထွက်ပြေးခိုလှုံနေကြတယ်လို့ ဒေသခံတွေက ဆိုပါတယ်။

ဒါ့အပြင် ဘူးသီးတောင်နဲ့ မောင်တော မြို့ပေါ်မှာလည်း လမ်းသွားလမ်းလာ မရှိသလောက်ဖြစ်နေပြီး တပ်မတော်နဲ့ ရဲတပ်ဖွဲ့ဝင်တွေသာ တွေ့ရတယ်လို့ မောင်တောမြို့ကိုရောက်နေတဲ့ ရခိုင်ပြည်နယ် အစိုးရအဖွဲ့ မီဒီယာတာဝန်ခံ ဦးမိုးဝေက ပြောပါတယ်။