စစ်ကောင်စီကို တိုးချဲ့အရေးယူဖို့ အမေရိကန် နည်းလမ်းရှာဖွေနေ

အမေရိကန်ပြည်ထောင်စုက မြန်မာစစ်ကောင်စီအပေါ် အရေးယူမှုတွေ တိုးချဲ့ရေးအတွက် နည်းလမ်းတွေ ရှာဖွေနေကြောင်းနဲ့ လက်ရှိဖြစ်နေတဲ့ ပဋိပက္ခဟာ လူမျိုးတုံးသတ်ဖြတ်မှု ဖြစ်နိုင်သလားဆိုတာကိုလည်း လေ့လာဆန်းစစ်နေတယ်လို့ အမေရိကန် နိုင်ငံခြားရေးဝန်ကြီး အန်တိုနီဘလင်ကန်က ဒီကနေ့ ပြောကြား လိုက်ပါတယ်။

မြန်မာနိုင်ငံ ဒီမိုကရေစီလမ်းကြောင်းပေါ် ပြန်လည်ရောက်ရှိရေးအတွက် စစ်ကောင်စီကို မိမိတို့ အမေရိကန် နိုင်ငံ တစ်ခုတည်းအနေနဲ့ ဖြစ်စေ၊ အစုအဖွဲ့လိုက်ဖြစ်စေ တိုးချဲ့အရေးယူဖို့ အင်မတန်အရေးကြီးတယ်လို့လည်း သူက ဆိုပါတယ်။

မလေးရှားနိုင်ငံ ကွာလာလမ်ပူမြို့မှာ မလေးရှား နိုင်ငံခြားရေးဝန်ကြီး Saifuddin Abdullah နဲ့ ပြုလုပ်တဲ့ သတင်းစာရှင်းပွဲမှာ သူက အခုလို ပြောကြားခဲ့တာပါ။

မိမိတို့ ဖိအားပေးအရေးယူမှုတွေ ပြုလုပ်နေပေမယ့် မြန်မာပြည်ရဲ့ အခြေအနေက ပိုမိုဆိုးဝါးလာနေတယ်၊ မြန်မာပြည်အရေးနဲ့ပတ်သက်ပြီး အာဆီယံခေါင်းဆောင်တွေနဲ့ လာမယ့်နှစ်အတွင်း တွေ့ဆုံဆွေးနွေးဖို့ စီစဉ်နေတယ်လို့လည်း သူက ပြောပါတယ်။

မြန်မာစစ်ကောင်စီအနေနဲ့ သူတို့သဘောတူလက်မှတ်ထိုးထားတဲ့ အာဆီယံ ဆုံးဖြတ်ချက် ၅ ချက်ကို လက် တွေ့အကောင်အထည်ဖော်ရန် အချိန်တန်ပြီလို့ အမေရိကန် နိုင်ငံခြားရေးဝန်ကြီး အန်တိုနီ ဘလင်ကန်က ပြောပါတယ်။