လူမျိုးတုံး သတ်ဖြတ်ရန် ရည်ရွယ်လုပ်ဆောင်ဟု ကန် မသုံးသေးပါ

မနေ့က တနေ့တည်းမှာပဲ ဝါရှင်တန်မှာတော့ အမေရိကန်နိုင်ငံခြားရေးဌာန ပြောခွင့်ရအမျိုးသမီး Heather Nauert ဟယ်သာ နော့အတ် က မြန်မာနိုင်ငံမှာ အစိုးရတပ်ဖွဲ့တွေက ရိုဟင်ဂျာတွေကို “Genocidal intent” (ဂျနိုဆိုက်ဒယ် အင်တန့်) လူမျိုးတုံး သတ်ဖြတ်ရန် ရည်ရွယ်ချက်ရှိရှိ ဆုံးဖြတ် လုပ်ဆောင်ခဲ့သလားဆိုတာကို အမေရိကန်အစိုးရ အနေနဲ့ ဥပဒေကြောင်းအရ အသိအမှတ်ပြု ဆုံးဖြတ်ခြင်း မရှိသေးပါဘူးလို့ ပြောကြားပါတယ်။ အဲဒီလို အသုံးအနှုန်း ဟာ ဥပဒေအရ တိတိကျကျ သတ်မှတ်သုံးစွဲတဲ့ စကားလုံးဖြစ်တဲ့အပြင် အင်မတန် ပြင်းထန်ပြီး နိုင်ငံတကာ တရားရုံးတွေမှာပါ အကျိုးသက်ရောက်မှုရှိနိုင်တဲ့အတွက် အလွယ်တကူ ဆုံးဖြတ်လို့ မဖြစ်နိုင်ကြောင်း သူမ က ပြောပါတယ်။