မြန်မာ့ လူ့အခွင့်အရေးအခြေအနေ အမေရိကန်လွှတ်တော်အမတ်များ စိုးရိမ်

မြန်မာနိုင်ငံက လူ့အခွင့်အရေးအခြေအနေတွေကို စိုးရိမ်မကင်းဖြစ်ရတဲ့အကြောင်း မြန်မာနိုင်ငံဆိုင်ရာ အမေရိကန်အောက်လွှတ်တော် ခေါင်းဆောင်တွေဖြစ်ကြတဲ့ ဒီမိုကရက်တစ်ပါတီက Joe Crowley နဲ့ ရီပတ်ပလင်ကင်ပါတီက Steve Chabot တို့ကဦးဆောင်ပြီး တနင်္ဂနွေနေ့မှာ ကျင်းပမယ့် ရွေးကောက်ပွဲ မတိုင်ခင် နိုင်ငံခြားရေးဝန်ကြီး John Kerry ဆီ စာတစောင် ပေးပို့လိုက်ပါတယ်။

အဲ့ဒီ ပေးစာမှာ အခြေအနေတွေအရ ဒီရွေးကောက်ပွဲဟာ လွတ်လပ်ပြီးတရားမျှတမှာ မဟုတ်ကြောင်း၊ အခြေခံကျကျ ပြုပြင်ပြောင်းလဲရေးအတွက် စောစောပိုင်းက အခြေအနေကောင်းလာခဲ့ပြီးမှ နောက်ပိုင်းမှာ နဂိုအတိုင်းပြန်ဖြစ်လာတာ ဒါမှမဟုတ် ရှေ့မတိုးတော့တာတွေကိုလည်း သတိပြုမိကြောင်း၊ အပြောင်းအလဲဖြစ်နိုင်ဖွယ်ရှိတယ်ဆိုတာ ယုံကြည်ပေမဲ့ ရွေးကောက်ပွဲရလဒ်ဟာ ဘယ်အတိုင်းအတာထိ ဒီမိုကရေစီအပြောင်းအလဲ ဖြစ်မယ်ဆိုတာ အတော့်ကို သဲသဲကွဲကွဲ မသိနိုင်တဲ့အကြောင်း ဖေါ်ပြထားပါတယ် ။ နောက်လာမယ့် သီတင်းပတ်တွေ လတွေနဲ့ချီပြီး မြန်မာနိုင်ငံကို ရှေ့ဆက် အနီးကပ်စောင့်ကြည့်မယ်လို့ လည်း ပြောပါတယ်။