USDP ပါတီ ဆိုင်းဘုတ်တွေ ဖျက်ဆီးခံရ
2018.10.11
ကြံ့ခိုင်ဖွံ့ဖြိုးရေးပါတီရဲ့ ပြောရေးဆိုခွင့်ရှိသူ ဦးသိန်းထွန်းဦး ကို တွေ့ရစဉ်
Photo: Khaymani Win/RFA
ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီရဲ့ ကြားဖြတ်ရွေးကောက်ပွဲ မဲဆွယ် ဆိုင်းဘုတ်တွေ ဖျက်ဆီးခံရကြောင်း ပါတီပြောရေးဆိုခွင့်ရှိသူ ဦးသိန်းထွန်းဦး က ပြောပါတယ်။
သပိတ်ကျင်းမြို့နယ်မှာ မနေ့က တစ်ခုဖျက်ဆီးခံရပြီး ပြီးခဲ့တဲ့ ၇ ရက်နေ့က မြင်းခြံမြို့နယ်မှာ စိုက်ထူထားတဲ့ မဲဆွယ်ဆိုင်းဘုတ်တွေ ဖျက်ဆီးခံရတာဖြစ်ကြောင်း မန္တလေးမြို့ ကြံ့ခိုင်ရေးပါတီရုံးမှာ သတင်းမီဒီယာသမားတွေနဲ့ ဒီနေ့တွေ့ဆုံစဉ်မှာ ဦးသိန်းထွန်းဦးက ပြောလိုက်တာဖြစ်ပါတယ်။
“ဒီမိုကရေစီစနစ်မှာ ဂုဏ်သိက္ခာရှိရှိ ယှဉ်ပြိုင်ကြိုးစားဆောင်ရွက်နေတဲ့ နိုင်ငံရေးပါတီတွေကို အခုလို ဖျက်လိုဖျက်စီးအကျိုးပျက်စီးအောင် ထိပ်တိုက်ရင်ဆိုင်မှုတွေဖြစ်အောင် လုပ်ဆောင်နေတဲ့ မည်သူ့ကိုမဆို ပါတီက ပြင်းထန်စွာ ရှုတ်ချကန့်ကွက်ပါတယ် “
သပိတ်ကျင်းမြို့နယ်မှာ ဆိုင်းဘုတ်တွေ ဖျက်ဆီးသွားတဲ့ တရားခံကို ဖမ်းဆီးရမိခဲ့ပြီး မြင်းခြံမြို့နယ်က ဖျက်ဆီးသွားတဲ့ တရားခံကိုတော့ စုံစမ်းနေဆဲဖြစ်ကြောင်းနဲ့ အရေးယူပေးဖို့ တင်ပြထားတယ်လို့လည်း သိရပါတယ်။
လစ်လပ်မဲဆန္ဒနယ် ၁၃ ခုမှာ ကြားဖြတ်ရွေးကောက်ပွဲ ကျင်းပမှာဖြစ်ပြီး ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီက နေရာ ၁၀ ခုမှာ ဝင်ရောက်ယှဉ်ပြိုင်မှာဖြစ်သလို အများစုမှာ အနိုင်ရမယ်လို့ မျှော်မှန်းထားကြောင်းလည်း ဦးသိန်းထွန်းဦး က ပြောပါတယ်။
ပြည်ထောင်စုကြံ့ခိုင်ရေးပါတီမှာ ပါတီဝင်အင်အား ငါးသန်းကျော်ရှိပြီး တိုင်းဒေသကြီးတွေက မဲဆန္ဒနယ်တွေမှာသာ အဓိကထား ဝင်ရောက်ယှဉ်ပြိုင်သွားမှာဖြစ်ပြီး ပြည်နယ်တွေမှာတော့ တိုင်းရင်းသားပါတီတွေကို ဦးစားပေးသွားမယ်လို့လည်း ပါတီတာဝန်ရှိသူတွေက ပြောပါတယ်။
ဖတ်ရှုသူအများဆုံး သတင်းများ။
သတင်းများ
