ကြံံ့ခိုင်ဖံ့ွဖြိုးရေးပါတီ လူငယ်ညီလာခံ ဒီလကုန်မှာ ကျင်းပမည်

ပြည်ထောင်စုကြံ့ခိုင်ရေးနဲ့ဖွံ့ဖြိုးရေးပါတီရဲ့ ဒုတိယအကြိမ်မြောက် လူငယ်ညီလာခံကို လာမယ့် မေလ ၂၉ ရက်နေ့ ကနေ ၃၁ ရက်နေ့အထိ နေပြည်တော်ပါတီဌာနချုပ်မှာ ၃ ရက်ကြာကျင်းပမယ်လို့ ပါတီ ပြောရေးဆိုခွင့်ရှိသူ ဒေါက်တာ နန္ဒာလှမြင့်က ဒီနေ့ ပြောပါတယ်။

နေပြည်တော် ပါတီဌာနချုပ်မှာ မေလ ၁၇ ရက်နဲ့ ၁၈ ရက် နှစ်ရက်တာကျင်းပခဲ့တဲ့ ပါတီဗဟိုအလုပ် အမှုဆောင် အစည်းအဝေးကနေ ဆုံးဖြတ်ခဲ့တာလို့ ဒေါက်တာ နန္ဒာလှမြင့်က ပြောပါတယ်။

"လူငယ်ညီလာခံက ၂၉ ၊ ၃ဝ၊ ၃၁ ခင်ဗျ၊ နေပြည်တော်မှာပဲလုပ်မှာ လူငယ်ညီလာခံက ကျနော်တို့ ပါတီဖွဲ့စည်း ပြီးနောက် ဒုတိယအကြိမ်လုပ်တာပါ၊ တိုင်းနဲ့ပြည်နယ် မြို့နယ်အလိုက် လူငယ်တွေ့ဆုံပွဲလေးတွေလုပ်တယ်၊ အဲဒီကနေမှ ဗဟိုလူငယ်တွေ့ဆုံပွဲအနေနဲ့ တိုင်းနဲ့ပြည်နယ် ကိုယ်စားလှယ်တွေ ရွေးချယ်ပြီးတော့မှ လူငယ် ကိုယ်စားလှယ် ၁၅ဝဝ လောက်က ဒီမှာလာပြီးတော့ တွေ့ဆုံမယ်"

တိုင်းဒေသကြီးနဲ့ ပြည်နယ်အလိုက်က လူငယ်ကိုယ်စားလှယ်ပေါင်း ၁၅ဝဝ လောက် တက်ရောက်ကြမှာဖြစ်ပြီး၊ ဆွေးနွေးပွဲတွေ၊ စာတမ်းဖတ်ပွဲတွေလည်း ကျင်းပသွားမယ်လို့ သိရပါတယ်။

လက်ရှိမှာ ပါတီလူငယ်အင်အား ၂ သန်းကျော်လောက်ရှိပြီး အဲဒီလူငယ်ညီလာခံကနေ ဗဟိုအဆင့်၊ တိုင်းနဲ့ပြည်နယ် အဆင့် လူငယ်ကိုယ်စားလှယ်တွေကို ရွေးချယ်သွားမယ်လို့ ဆိုပါတယ်။ ကြံ့ခိုင်ဖံ့ွဖြိုးရေးပါတီဟာ ပထမအကြိမ် လူငယ်ညီလာခံကို ၂ဝ၁၃ ခုနှစ်က ကျင်းပခဲ့ပါတယ်။

လာမယ့် နိုဝင်ဘာလ ၃ ရက်နေ့မှာကျင်းပမယ့် ကြားဖြတ်ရွေးကောက်ပွဲအတွက် ဝင်ရောက်ယှဉ်ပြိုင်ဖို့အတွက် ကိုတော့ ဗဟိုကော်မတီအစည်းအဝေးမှာ ဆွေးနွေးခဲ့ကြပေမယ့် အသေးစိတ်ဆုံးဖြတ်တာ မရှိသေးဘူးလို့ ဒေါက်တာ နန္ဒာလှမြင့်က ပြောပါတယ်။