ရပ်/ကျေး ရွေးချယ်တင်မြှောက်ရေး ဥပဒေ မူကြမ်း အတည်ပြုတော့မည်

၂၀၁၀ ရွေးကောက်ပွဲ ကျင်းပပြီးနောက် အမျိုးသား လွှတ်တော်နှင့် ပြည်ထောင်စု လွှတ်တော် နှစ်ရပ်ပေါင်း ကျင်းပသော ပထမဆုံး လွှတ်တော် အစည်းအဝေးကို နေပြည်တော်ရှိ လွှတ်တော် အဆောက်အအုံသစ်တွင် ဇန်နဝါရီ ၃၁ ရက်နေ့က ပြုလုပ်နေသည်ကို MRTV 4 ရုပ်မြင်သံကြားမှ ထုတ်လွှင့် ပြသနေပုံ ဖြစ်ပါသည်။ (Photo: AFP/MRTV 4)

နိုဝင်ဘာ ၂၄ ရက်မှာ ကျင်းပမဲ့ ပြည်ထောင်စုလွှတ်တော် အစည်းအဝေးကနေ ရပ်ကွက် ကျေးရွာ အုပ်ချုပ်ရေးမှူး ရွေးချယ်တဲ့ ဥပဒေမူကြမ်းကို အတည်ပြုဖို့ ရှိတယ်လို့ သိရပါတယ်။

အခု ပြဋ္ဌာန်းမဲ့ ရပ်/ကျေး ဥပဒေဟာ ကျေးရွာနဲ့ ရပ်ကွက် အုပ်ချုပ်ရေးမှူးတွေကို လုပ်ပိုင်ခွင့်အာဏာ ပေးအပ်ထားတာ များလွန်းတယ်လို့ အမျိုးသား ဒီမိုကရေစီအင်အားစု ပါတီ NDF လွှတ်တော် အမတ် ဦးခိုင်မောင်ရီက ပြောပါတယ်။

မူကြမ်းမှာ ပါတာက ရပ်ကွက် ကျေးရွာ အုပ်ချုပ်ရေးမှူးကို ဆယ်အိမ်မှူးတွေက ရွေးချယ်ပေးရမှာဖြစ်ပြီး ဆယ်အိမ်မှူးတွေကိုတော့ ကျေးရွာ ရပ်ကွက် ရပ်မိရပ်ဖတွေက ရွေးချယ်ပေးရမှာ ဖြစ်ပါတယ်။ လွှတ်တော်တွေမှာ အရင်က ဆွေးနွေးခဲ့တဲ့ ဥပဒေမူကြမ်းမှာ ရပ်ကွက် ကျေးရွာ အုပ်ချုပ်ရေးမှူးဟာ မည်သည့်ပါတီဝင်မှ မဖြစ်စေရလို့ ပါပေမဲ့ အခုပြဋ္ဌာန်းမဲ့ မူကြမ်းမှာတော့ ပါတီဝင် ဖြစ်ခွင့်ရှိတယ် ဆိုတဲ့သဘော သက်ရောက်နေတယ်လို့ လွှတ်တော်အမတ် ဦးခိုင်မောင်ရီက ပြောပါတယ်။

ရပ်ကွက် ကျေးရွာ အုပ်ချုပ်ရေးမှူးတွေဟာ နိစ္စဓူဝ အုပ်ချုပ်ရေးကိစ္စ ဧည့်စာရင်းစစ်တဲ့ အလုပ်ကနေ လယ်ယာမြေ ပြဿနာမျိုးအထိ ပါဝင်ဆုံးဖြတ်ခွင့် ရှိသလို ရွေးကောက်ပွဲဆိုင်ရာ ကိစ္စတွေမှာလည်း အရေးပါတယ်လို့ ပြောပါတယ်။