ထွက်ပြေးတိမ်းရှောင်လာသူ တစ်သောင်းနှစ်ထောင်ကျာ်ရှိ

ရခိုင်ပြည်နယ်၊ ဘူးသီးတောင်၊ မောင်တောနဲ့ ရသေ့တောင်မြို့နယ်တွေမှာ ဖြစ်ပွားနေတဲ့ အကြမ်းဖက် တိုက်ခိုက် မှုတွေကြောင့် ထွက်ပြေးတိမ်းရှောင်လာသူ တစ်သောင်းနှစ်ထောင်ကျော် ရှိနေပြီဖြစ်တယ်လို့ သိရပါတယ်။

လူမှုဝန်ထမ်းကယ်ဆယ်ရေးနဲ့ ပြန်လည်နေရာချထားရေး ပြည်ထောင်စုဝန်ကြီးနဲ့ ပြည်နယ်ဝန်ကြီးချုပ်တို့ဟာ ထွက်ပြေး လာသူတွေအတွက် လိုအပ်တာတွေ ကူညီပေးနေတယ်လို့ ရခိုင်ပြည်နယ်အစိုးရအဖွဲ့ စည်ပင်သာ ယာရေးဝန်ကြီး ဦးမင်းအောင် က ပြောပါတယ်။

"လူဦးရေ စုစုပေါင်းဆိုရင် ၁၂၁၀၆ ယောက် ဒါမနေ့ကစာရင်းပေါ့၊ ဝန်ကြီး ဒေါက်တာဝင်းမြတ်အေး အပါအဝင် ရခိုင်ပြည်နယ်အစိုးရအဖွဲ့က ဝန်ကြီးချုပ်တို့က Helicopter နဲ့ပဲသွားပြီးတော့ ဒီနေ့ဆိုရင် ၃ ရက်ရှိပြီ၊ အဲလိုပဲသွားပြီး လိုအပ်ချက်တွေကို ဖြည့်ဆည်းပေးနေတယ်။"

ထွက်ပြေးလာသူတွေဟာ ဘုန်းကြီးကျောင်းတွေ၊ စာသင်ကျောင်းတွေ၊ ဓမ္မာရုံတွေ၊ ရဲစခန်းတွေနဲ့ တပ်စခန်းတွေ စတဲ့ လုံခြုံရေးတွေ ရှိတဲ့နေရာတွေမှာ လာရောက်ခိုလှုံနေထိုင်ကြတဲ့ ပုံစံမျိုးဖြစ်တယ်လို့ ပြောပါတယ်။

ကျန်းမာရေး လိုအပ်ချက်တွေအတွက် ကျန်းမာရေးဝန်ကြီးဌာန တာဝန်ရှိသူတွေ ကိုယ်တိုင် လာရောက်စောင့်ရှောက်ပေးနေတယ်လို့လည်း  ဝန်ကြီး ဦးမင်းအောင် က ပြောပါတယ်။

ခိုလှုံလာသူတွေထဲမှာ ရခိုင်၊ မြို၊ ခမီ၊ သက်၊ ဒိုင်းနက် လူမျိုးတွေ ပါဝင်သလို ဟိန္ဒူဘာသာဝင်တွေလည်း ပါဝင်တယ်လို့ သိရပါတယ်။

ဒီနေ့မှာလည်း ဘူးသီးတောင်၊ မောင်တောဒေသကနေ စစ်တွေမြို့ကို လူပေါင်း ၂၀၀ ကျော် ထွက်ပြေးလာကြ တယ်လို့ သိရပါတယ်။  

အစွန်းရောက် အကြမ်းဖက်သမားတွေဟာ မောင်တောမြို့ကို စနစ်တကျဖျက်ဆီးဖို့ ကြံစည်လုပ်ဆောင်နေတယ် လို့ နိုင်ငံတော်အတိုင်ပင်ခံရုံး သတင်းထုတ်ပြန်ရေးကော်မတီက သတင်းထုတ်ပြန်ထားပါတယ်။