ရန်ကုန်လေဆိပ် အဆင့်မြှင့်တင်မည်

ရန်ကုန် နိုင်ငံတကာလေဆိပ်ကို နိုင်ငံတကာ လေကြောင်းသွားလာရေးနဲ့ ကိုက်ညီအောင် ထပ်ပြီး အဆင့်မြှင့်မယ်လို့ ရန်ကုန်လေဆိပ် ဝန်ဆောင်မှု ကုမ္ပဏီ (Yangon Aerodrome Company Limited) က နိုဝင်ဘာလ ၁၅ ရက်နေ့က ထုတ်ပြန်လိုက်ပါတယ်။

ရန်ကုန်လေဆိပ်ရဲ့ နိုင်ငံတကာ လေကြောင်းလမ်းကွန်ရက် တိုးတက်ဖို့အတွက် ဈေးကွက် မြှင့်တင်နေတာလို့လည်း ပြောပါတယ်။ လက်ရှိ ၂ဝ၁၈ ခုနှစ်ဟာ ငါးနှစ်အတွင်း ခရီးသည်လာရောက်မှု  အနှေးကွေးဆုံးပဲလို့ လေဆိပ်က ဝန်ခံပေမယ့် YACL က ခုလို ကြေညာတာလည်း ဖြစ်ပါတယ်။

၂ဝ၁၈ ခုနှစ်အတွင်း ခရီးသည် ၆ သန်းလောက်အထိ ဝန်ဆောင်မှုပေးဖို့ လေဆိပ်က လျာထားပေမယ့် ရန်ကုန် နိုင်ငံတကာလေဆိပ်ကို ရောက်ရှိလာတဲ့ ခရီးသည်အရေအတွက်ဟာ ပြီးခဲ့တဲ့ သီတင်းပတ်မှာ ငါးသန်းအထိသာ ရှိခဲ့ပါတယ်။

ပြီးခဲ့တဲ့ ငါးနှစ်ကျော်အတွင်း မြန်မာနိုင်ငံက နိုင်ငံတကာအဆင့်မီ လေဆိပ် သုံးခုထဲမှာ ရန်ကုန်လေဆိပ်ကို ရောက်လာတဲ့ လေကြောင်းခရီးသည် တစ်နှစ်ကို ပျမ်းမျှ ၈.၆ ရာခိုင်နှုန်း တိုးများလာတယ်လို့လည်း သိရပါတယ်။