အမေရိကန်စစ်တပ်ထဲက မြန်မာအမျိုးသမီး

မစိုးမြတ်သင်းဟာ အသက် ၁၈ နှစ်အရွယ် ၂၀၁၆ ခုနှစ်မှာ မိခင်ရှိရာ အမေရိကန်ပြည်ထောင်စုကို ရောက်ရှိလာခဲ့ပြီး ၁၉ နှစ်မှာ အမေရိကန်စစ်သင်တန်းကို စတင်တက်ရောက်ခဲ့တာပါ။

"အပြင်လောကနဲ့ တစ်ခါမှ စပ်အပ်မှုလဲ မရှိဘူး။ အိမ်မှာဆိုလဲ မိသားစုနဲ့ပဲ ကြီးလာတာ။ အမေရိကားရောက်တဲ့အခါကျတော့လဲ အမေကိုမှီပြီး ကြီးတဲ့အခါကျတော့ အမေမရှိဘဲနဲ့ တစ်ယောက်တည်း ဘယ်လိုရပ်တည်နိုင်မလဲဆိုတဲ့ ကိုယ့်ကိုယ်ကိုယ် စိန်ခေါ်ပြီးတော့ Active Duty Life ထဲ ဝင်သွားတာ"

အမျိုးသမီးတစ်ယောက်အနေနဲ့ သူ့ခန္ဓာကိုယ်အရွယ်အစားနဲ့မမျှတတဲ့ စစ်လေ့ကျင့်ရေးတွေကို စိတ်ဓာတ်ကြံ့ကြံ့ခိုင် ဖြတ်သန်းခဲ့ရတယ်လို့ ဆိုပါတယ်။ မိခင်ကအားပေးခဲ့ပေမဲ့ ပတ်ဝန်းကျင်က မဖြစ်နိုင်ဘူးဆိုတဲ့အမြင်တွေကြားထဲ ဒီလမ်းကြောင်းကို မသွေဖယ်ဘဲ ဆက်လက်လျှောက်လှမ်းဖို့ ဆုံးဖြတ်ခဲ့တာပါ။

"ဝင်ခါနီးမှာ အတော်များများက ဘာပြောလဲဆိုတော့ ဖြစ်နိုင်ရဲ့လား။ သေးသေးလေးနဲ့ ဖြစ်နိုင်ရဲ့လား ။ အမေ့သူငယ်ချင်းတွေကလည်း ပြောတယ်။ ဖြစ်နိုင်ရဲ့လား။ ကျိုးပြီးတော့ တစ်ချို့တွေ ခန္ဓာကိုယ်အကြီးကြီးတွေတောင်မှ ကျိုးပြီးပြန်လာတာပေါ့။ အဲ့ရောက်သွားတဲ့အချိန်မှာ သူတို့တွေရဲ့ပြောအားတွေက ကိုယ့်အတွက်ကို ဖိအားတွေ ဖြစ်စေတယ်ပေါ့။"

စစ်ရေးလေ့ကျင့်ခန်းတွေမှာ နိုင်ငံပေါင်းစုံက လူမျိုးခြားတွေကြားထဲ မစိုးမြတ်သင်း ခွဲခြားဆက်ဆံတာလည်း ခံခဲ့ရပါတယ်။

"တပ်ဖွဲ့တစ်ခုလုံးရဲ့ ခေါင်းဆောင်ခန့်လိုက်တဲ့အချိန်မှာ ဘာဖြစ်လဲဆိုတော့ အဲ့ဒီတပ်ဖွဲ့ထဲမှာရှိတဲ့ အဖြူတွေ၊ အမည်းတွေ၊ တခြားလူမျိုးပေါင်းစုံက ညီမပြောတာကို သိပ်နားမထောင်ချင်ဘူး။ ညီမက Asian လည်း ဖြစ်တယ်။ သူတို့ကိုကျော်ပြီးတော့ ဒီ Asian ကို ခန့်လိုက်လားဆိုတဲ့စိတ်ရှိတဲ့အခါကျတော့ သိပ်နားမထောင်ချင်ဘူး။”

အမေရိကန်စစ်တပ်ရဲ့ ပူးပေါင်းလေ့ကျင့်ရေးသင်တန်းတွေအတွက် တခြားနိုင်ငံတွေမှာလည်း တာဝန်ထမ်းဆောင်ခဲ့ရပါတယ်။ အမေရိကန်အင်ဂျင်နီယာတပ်ရင်းရဲ့ တပ်ဖွဲ့ဝင်တစ်ဦးအနေနဲ့ ဥရောပနိုင်ငံတွေမှာ သုံးနှစ်ကျော်ကြာနေထိုင်ခဲ့ပါတယ်။

သူ့ စစ်မြေပြင်အတွေ့အကြုံနဲ့ စစ်တပ်မှာရှိရမယ့် အခြေခံအကြောင်းအရာတွေကို လူမှုကွန်ယက်မှာ မျှဝေတဲ့အခါ မြန်မာလူငယ်တွေအများအပြား စိတ်ဝင်စားလာကြတယ်လို့ ဆိုပါတယ်။

ဒါကလည်း စစ်တပ်အာဏာသိမ်းထားတဲ့ မြန်မာနိုင်ငံအတွက် စစ်တပ်တစ်တပ်မှာရှိသင့်တဲ့ ဖွဲ့စည်းပုံတွေအကြောင်းကို အများသိအောင် ဝေမျှပေးနေတာလို့ ဆိုပါတယ်။

“စစ်တပ်တစ်ခုက ဒီလိုပုံစံမျိုး ရှိကိုရှိသင့်တယ်။ ဝင်လာတဲ့စစ်သားတစ်ယောက်ကို ဘယ်နိုင်ငံကပဲဖြစ်ဖြစ်၊ ဘယ်လူမျိုးကပဲဖြစ်ဖြစ်၊ ဘယ်အဖွဲ့အစည်း ဘယ်ဘာသာကိုးကွယ်ပါစေ ဒီလိုပုံစံမျိုးလူလူချင်းကို ဆက်ဆံရတယ်ဆိုတာ သိစေချင်လို့ကို ပြောပြတာပေါ့နော်။ စစ်တပ်မှာ စစ်သားတွေကို ဖိနှိပ်ခြင်းလည်း မရှိဘူး။ အခြေခံသင်တန်းတက်ခဲ့တဲ့အချိန်မှာ သင်တန်းဆရာတွေက အော်သာအော်တာ။ ဘေးနားမှာ နားငြီးရလောက်အောင် ကျီးကန်းအော်သလို အော်တယ်။ ဒါပေမဲ့ တစ်ချက်လေးမှ မထိခဲ့ဘူး။ ရိုက်တာလည်း မရှိခဲ့ဘူး။ ပါးစပ်ကနေ စော်ကားပြောတာတွေလည်း တစ်ခုမှ မရှိခဲ့ဘူး။ အဲဒါတွေကို သိစေချင်တာ။“

အမေရိကန်စစ်တပ်နဲ့သက်ဆိုင်တဲ့ အကြောင်းအရာတွေသာမက မြန်မာစာနဲ့ ပတ်သက်တဲ့အရာတွေကိုလည်း မျှဝေလေ့ရှိသူပါ။ ပြည်ပနိုင်ငံတွေကို ရောက်နေတဲ့ မြန်မာလူမျိုးတွေအနေနဲ့ ဘယ်လိုအခြေအနေမှာပဲ ဖြစ်ဖြစ် မြန်မာစာကို မမေ့သင့်ဘူးလို့လည်း မစိုးမြတ်သင်း ပြောပါတယ်။

“မြန်မာစာပေက တကယ်တမ်းတော့ အမေရိကားမှာ ရှားပါးတယ်ပေါ့နော်။ အမေရိကန်စစ်တပ်ထဲမှာဆိုရင် A List ထဲမှာ ပါတာပေါ့နော်။ ပါတယ်ဆိုတာ မသိဘူး။ ဘာသာရပ်နဲ့သွားပြီး စာမေးပွဲသွားဖြေမှ မြန်မာစာပေဟာ A list ထဲ ထည့်ထားခံရတယ်ဆိုတာ သိရတယ်ပေါ့နော်။ ရှားပါးစာပေအနေနဲ့ ထည့်သွင်းထားတာပေါ့ ။ အဲ့ဒီ့အတွက်ကြောင့်မို့လို့ မြန်မာစကားပြောတတ်တာကိုလည်း တစ်အားဂုဏ်ယူတယ်။ “

အမေရိကန်စစ်တပ်ထဲမှာ မြန်မာအမျိုးသမီးတစ်ယောက်အနေနဲ့ တာဝန်ထမ်းဆောင်ခွင့်ရတဲ့အတွက်လည်း ဂုဏ်ယူတယ်လို့ ဆိုပါတယ်။

“မြန်မာလူမျိုးတစ်ယောက်အနေနဲ့ ဒီအမေရိကန်တပ်တစ်ခုမှာ လာပြီးတော့ တာဝန်ထမ်းဆောင်ရတဲ့အပြင် ငါမြန်မာတစ်ယောက်ပါဆိုတာကို နိုင်ငံလူမျိုးခြားတွေကြားမှာ ပြောနိုင်တာကို ဂုဏ်ယူတာပေါ့“

စစ်တပ်အာဏာသိမ်းမှုနောက်ဆက်တွဲ အနာဂတ်ပျောက်နေတဲ့ မြန်မာပြည်ကလူငယ်တွေ စိတ်ဓာတ်မကျဘဲ တတ်နိုင်တဲ့နည်းနဲ့ ရုန်းကန်နိုးထကြဖို့လည်း သူ တိုက်တွန်းပါတယ်။

လူငယ်တွေရဲ့အားနဲ့ တိုင်းပြည်ပြန်လည်တည်ဆောက်နိုင်ပြီး စစ်တပ်တစ်တပ်မှာ ရှိသင့်တဲ့ ဂုဏ်နဲ့ညီမျှတဲ့ မြန်မာ့တပ်မတော် ပေါ်ပေါက်လာဖို့လည်း သူ မျှော်လင့်နေပါတယ်။