မန္တလေးမြို့မှာ ညမထွက်ရအမိန့် ချိုးဖောက်သူ ၄၀၀ ကျော်ကို ဖမ်းဆီး

မန္တလေးမြို့မှာ ဖြစ်ပွားခဲ့တဲ့ ပဋိပက္ခဖြစ်စဉ်တွေနဲ့ ပတ်သက်ပြီး ညမထွက်ရအမိန့် ပုဒ်မ ၁၄၄ ထုတ်ပြန် ထားတဲ့ မြို့နယ် ၇ ခုမှာ ဇူလိုင်လ ၈ ရက်နေ့ညအထိ လိုက်နာမှုပျက်ကွက်သူ လေးရာကျော်ကို ဖမ်းဆီး ထားပြီဖြစ်ကြောင်း မန္တလေးတိုင်းဒေသကြီး ရဲတပ်ဖွဲ့ မှူးရုံးက ပြောပါတယ်။

အဲဒီ ဖမ်းဆီးထားသူတွေကို ထောင်ဒဏ် ၇ ရက်ကနေ ၁၅ ရက်အထိ ပြစ်ဒဏ်ချမှတ်အရေးယူနေတယ်လို့ မန္တလေးတိုင်းဒေသကြီး ရဲတပ်ဖွဲ့မှူးရုံးက ဒုတိယရဲမှူးကြီး ဇော်မင်းဦးက အခုလို ပြောပါတယ်။

"ထွေအုပ်ကနေပြီးတော့ ပုဒ်မ ၁၄၄ ထုတ်တာကို မလိုက်နာတဲ့အတွက် ပုဒ်မ ၁၄၈ အရ ထွေအုပ်က တရားလိုလုပ်ပြီး တရားစွဲတင်တာခင်ဗျ၊ တရားသူ ကြီး စီရင်ပြီးတော့ ပြစ်ဒဏ်ချတာတွေ ကတော့ ထောင် ၇ ရက် ချတာရှိတယ်၊ ၁၅ ရက် ချတာရှိတယ်၊ ရုံးပြန်ချိန်းတာတွေလည်းရှိတယ်"

ည ၉နာရီကနေ မနက် ၅ နာရီထိ ညမထွက်ရအမိန့် ပုဒ်မ ၁၄၄ကို ပုသိမ်ကြီး၊ အောင်မြေသာဇံ၊ ချမ်းအေးသာဇံ၊ ချမ်းမြသာစည်၊  မဟာအောင်မြေ၊ ပြည်ကြီးတံခွန်နဲ့ အမရပူရမြို့နယ်တွေမှာ ထုတ်ပြန်ထားတာ ဖြစ်ပါတယ်။

ဒါ့အပြင် မန္တလေးမြို့မှာ ဖြစ်ပွားခဲ့တဲ့ ပဋိပက္ခနဲ့ ပတ်သက်ပြီး ပြစ်မှုကျူးလွန်သူ ၁၆ ဦးကို ဖမ်းဆီးအရေးယူထား ပြီဖြစ်ပြီး ပဋိပက္ခမှာပါဝင်တယ်လို့ ယူဆရသူတွေကို ဆက်လက် ခေါ်ယူစစ်ဆေးနေတယ်လို့လည်း ဒုတိယ ရဲမှူးကြီး ဇော်မင်းဦး က ပြောပါတယ်။