မြန်မာနိုင်ငံ လက်ရှိ အခြေအနေ ဂျပန်ကုန်သည်ကြီးများအသင်းကို တင်ပြ

မြန်မာနိင်ငံမှာ စီးပွားရေး ရင်းနှီးမြှုပ်နှံမှုတွေနဲ့ ပတ်သက်ပြီး မြန်မာအစိုးရသစ်ရဲ့ ဂျပန်နိုင်ငံ သံအမတ်ကြီး ဦးခင်မောင်တင့်က ဂျပန်ကုန်သည်ကြီးများ အသင်းတိုက်မှာ ဟောပြောနေချိန်မှာ အခုလို လုပ်ခဲ့ကြတာလို့ သိရပါတယ်။

ဒီအကြောင်းတွေကို ဂျပန်ကုန်သည်ကြီးများ အသင်းတိုက်မှာ စာသွားပေးအပ်ရာမှာ ကိုယ်တိုင် ပါဝင်ခဲ့တဲ့ NDB မြန်မာနိုင်ငံ ဒီမိုကရေစီကွန်ရက်(ဂျပန်)က ကိုဘုန်းလှိုင်က အခုလိုပြောပြပါတယ်။

“သူတို့လည်း ကျွန်တော်တို့ ရှင်းပြတဲ့အခါ သူတို့လည်း နားလည်တဲ့အကြောင်း ပြောပြပါတယ်။ သူတို့ဖက်က ပြောတာပေါ့နော်၊ ဗမာတွေလောက် နားမလည်တဲ့ အတွက်ကြောင့်မို့ ခုလို လာပြီး ရှင်းပြပေးတာ ကျေးဇူးတင်တဲ့ အကြောင်း ပြောပြတယ်။ ကျွန်တော်တို့က ပြောတာ စစ်အစိုးရက အရင် မျက်နှာစာမှာ ရှေ့ထွက်နေရာကနေပြီးတော့ နောက်ကို ဆင်းထိုင်တာပဲ ရှိတာလို့။ သူတို့ တကယ်တမ်း အနားယူသွားတာ မဟုတ်ဖူးဆိုတဲ့အကြောင်း ပြောပြတယ်လေ။ သူတို့ကတော့ အရပ်သားအစိုးရ တက်လာတယ်ဆိုတော့ ပြောင်းသွားပြီလို့ ထင်တယ်ပေါ့။ သူတို့ကလည်း diplomacy အရ ပြောတယ်လို့ ထင်တာပေါ့နော်။”

NDB အဖွဲ့ဝင်တွေ သွားရောက်ကြတဲ့ ဂျပန်ကုန်သည်ကြီးများ အသင်းတိုက်ရှေ့မှာ ဆိုင်းဘုတ် နှစ်ခုကိုပါ ကိုင်ဆောင်ထားတာနဲ့ ပတ်သက်လို့လည်း ကိုဘုန်းလှိုင်ကပဲ ရှင်းပြသွားပါတယ်။

“စာတမ်းကိုင်တာက နှစ်မျိုး ကျွန်တော်တို့ ကိုင်တယ်။ မြန်မာပြည်မှာ စီးပွားရေး သွားလုပ်မယ်ဆိုရင် သေသေချာချာ လေ့လာပြီးမှ လုပ်ဖို့ ဆိုတဲ့ စာတမ်းရယ်၊ နောက်တခါ လူ့အခွင့်အရေး ချိုးဖောက်မှုတွေ၊ နိုင်ငံရေး အကျဉ်းသားတွေ မလွှတ်ပေးတာတွေ၊ တိုင်းရင်းသား ဒေသတွေမှာ ထိုးစစ်ဆင်နေတာတွေ၊ ဒါတွေကို အစိုးရ အပြောင်းအလဲ ဖြစ်တယ်လို့ သူတို့က ပြောနေပေမဲ့ ကမ္ဘာမှာ ပြနေပေမဲ့ တကယ်တမ်း ဘာမှ ပြောင်းလဲမှု မရှိဘူး၊ အဲဒါကြောင့်မို့လို့ ရင်းနှီးမြှုပ်နှံမှု မလုပ်ပါနဲ့ ဆိုတဲ့ စာတမ်း၊ အဲဒီ နှစ်မျိုး ကျွန်တော်တို့ ကိုင်တယ်ပေါ့နော်။ ဂျပန်လို ကိုင်တာပေါ့။ ”