ဂွမြို့နယ်မှာ ရခိုင်အမျိုးသားပါတီ ကိုယ်စားလှယ်ဆိုင်းဘုတ် ဖျက်ဆီးခံရ
2015.10.02
အမ်းမြို့နယ် ပဒဲကြောကျေးရွာမှာ ပြီးခဲ့တဲ့ ဖေဖော်ဝါရီလက ရခိုင်အမျိုးသားပါတီဆိုင်းဘုတ် ဖျက်ဆီးခံရစဉ်
ရခိုင်ပြည်နယ် ဂွမြို့နယ် မကျည်းငူရွာမှာ စိုက်ထူထားတဲ့ ရခိုင်အမျိုးသားပါတီ ANP ကိုယ်စားလှယ်လောင်းတွေရဲ့ မဲဆွယ်စည်းရုံးရေး ဗီနိုင်းပိုစတာ မနေ့ညက ဖျက်ဆီးခံလိုက်ရတယ်လို့ ပါတီကိုယ်စားလှယ်လောင်းတွေက ပြော ပါတယ်။
ဒါနဲ့ပတ်သက်ပြီး ရဲစခန်းမှာ အမှုဖွင့်တိုင်ကြားထားတယ်လို့ ရခိုင်အမျိုးသားပါတီရဲ့ အမျိုးသားလွှတ်တော် ကိုယ်စားလှယ်လောင်း ဦးတင်ညိုက ပြောပါတယ်။
"စာသားတွေရိုက်ထားတဲ့ အဲ့ဒီဗီနိုင်းစက အပေါ်ကနေ အောက်ကိုအားလုံးကွဲကျသွားတယ်၊ ဗီနိုင်းစက ၈ ပေ၊ ၆ ပေရှိတဲ့ဗီနိုင်းပေါ့၊ အဲ့ဒီဗီနိုင်းမှာ ကိုယ်စားလှယ်လောင်း ၃ ဦးရဲ့ အမည်စာရင်းနဲ့ ဓါတ်ပုံတွေပါကြော်ငြာ ထားတဲ့ ဆိုင်းလုတ်ပေါ့၊ ကျနော်က ညတုန်းကပဲ ရဲစခန်းမှာအမှုဖွင့်ထားပြီးပြီ"
အဲ့ဒီဗီနိုင်းပိုစတာကြီးဟာ ၈ ပေ၊ ၆ ပေ အကျယ်ရှိပြီး ရခိုင်အမျိုးသားအရေးဆောင်ရွက်မယ့် ရခိုင်အမျိုးသား ပါတီဆိုတဲ့စာသားတွေနဲ့ ကိုယ်စားလှယ်လောင်းတွေရဲ့ ဓာတ်ပုံတွေ ပါဝင်တယ်လို့သိရပါတယ်။
ရခိုင်ပြည်နယ် ဂွမြို့နယ်ကနေ လာမယ့်ရွေးကောက်ပွဲမှာ ဝင်ရောက်ယှဉ်ပြိုင်ကြမယ့် နိုင်ငံရေးပါတီတွေက ရခိုင်အမျိုးသားပါတီ၊ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီ၊ တိုင်းရင်းသားစည်းလုံးညီညွတ်ရေးပါတီ၊ အမျိုးသားဒီမိုကရေစီအဖွဲ့ချုပ်နဲ့ ရခိုင်ပြည်နယ် အမျိုးသားအင်အားစုပါတီတို့ဖြစ်ကြပါတယ်။
ပြီးခဲ့တဲ့စက်တင်ဘာလကလည်း အမ်းမြို့နယ် ဒလက်ချောင်းကျေးရွာအုပ်စု အနောက်ရွာမှာ ရခိုင်အမျိုးသားပါတီရုံး ဆိုင်းဘုတ်ဖျက်ဆီးခံခဲ့ရပါတယ်။
ဖတ်ရှုသူအများဆုံး သတင်းများ။
RFA
ဖတ်ရှုသူအများဆုံး သတင်းများ။
သတင်းများ
