အာဆီယံနိုင်ငံခြားရေးဝန်ကြီးများအစည်းအဝေး စစ်ကောင်စီကိုယ်စားလှယ် တက်ခွင့်မရ

ကမ္ဘောဒီးယားနိုင်ငံမှာ ဒီသီတင်းပတ်ထဲ ကျင်းပမယ့် ၅၅ ကြိမ်မြောက် အာဆီယံနိုင်ငံခြားရေးဝန်ကြီးများ အစည်းအဝေးမှာ စစ်ကောင်စီကိုယ်စားလှယ်ကို တက်ခွင့်ပြုမှာမဟုတ်ဘူးလို့ အာဆီယံဥက္ကဋ္ဌရဲ့ ပြောခွင့်ရသူက တနင်္လာနေ့မှာ ထုတ်ဖော်ပြောဆိုလိုက်တယ်လို့ ရိုက်တာသတင်းမှာ ဖော်ပြထားပါတယ်။

အရပ်ဘက်ကိုယ်စားလှယ်ကိုပဲ စေလွှတ်ဖို့ အာဆီယံအသင်းက ဖိတ်ပေမယ့် စစ်ကောင်စီဘက်က လက်မခံလို့ ဒီထိပ်သီးအစည်းအဝေးမှာလည်း မြန်မာကိုယ်စားလှယ်ထိုင်ခုံနေရာမှာ လစ်လပ်နေဦးမှာ ဖြစ်တယ်လို့ ဆိုပါတယ်။

အာဆီယံနိုင်ငံခြားရေးဝန်ကြီးများအစည်းအဝေးကို ဇူလိုင် ၃၁ ရက်ကနေ သြဂုတ် ၆ ရက်ထိ ကမ္ဘောဒီးယားနိုင်ငံ ဖနွမ်းပင်မြို့မှာ ကျင်းပမှာ ဖြစ်ပါတယ်။

မြန်မာနိုင်ငံမှာ သေဒဏ်ချမှတ်ထားတဲ့ နိုင်ငံရေးအကျဉ်းသားတွေကို မကွပ်မျက်ဖို့ အာဆီယံဥက္ကဋ္ဌ ကမ္ဘောဒီးယားဝန်ကြီးချုပ်ဟွန်ဆင်နဲ့ အာဆီယံအထူးကိုယ်စားလှယ် ပရက်ဆော့ခွန်းတို့က ပန်ကြားထားပေမယ့် စစ်ကောင်စီကအရေးတယူမရှိဘဲ ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်နဲ့ ကိုအောင်သူရဇော်တို့ကို ဇူလိုင် ၂၃ ရက် ဝန်းကျင်မှာ အင်းစိန်ထောင်ထဲ ကွပ်မျက်လိုက်တဲ့အတွက် ကုလသမဂ္ဂနဲ့ အနောက်နိုင်ငံတွေအပြင် အာဆီယံကပါ ပြင်းပြင်းထန်ထန် ပြစ်တင်ရှုတ်ချခဲ့ကြပါတယ်။