ရွေးကောက်ပွဲ လေ့လာစောင့်ကြည့်ရန် လာသူကို နေရပ်ပြန်ပို့

မတ်လ ၂၀ရက် နေ့လယ် သုံးနာရီမှာ Ms.Somsri Hananuntasuk နဲ့ ANFREL အဖွဲ့သားလေးဦး တည်းခိုနေထိုင်တဲ့ ရန်ကုန်မြို့၊ ဗိုလ်တထောင်မြို့နယ်မှာရှိတဲ့ Orchid Hotel ရဲ့ ရှစ်လွှာမှာရှိတဲ့ ရုံးခန်းကို လူဝင်မှုကြီးကြပ်ရေး အရာရှိများနဲ့ ဒေသဆိုင်ရာ အာဏာပိုင်များ ပါဝင်တဲ့အဖွဲ့က ဝင်ရောက်ရှာဖွေခဲ့ပြီး၊ Ms.Somsri Hananuntasuk ကို အဓိကထား စစ်ဆေးမေးမြန်းခဲ့တယ်လို့ ANFREL နီးစပ်တဲ့ အသိုင်းအဝိုင်းက ပြောပါတယ်။

ထိုင်းနိုင်ငံအခြေစိုက်၊ အာရှရွေးကောက်ပွဲများ လေ့လာစောင့်ကြည့်ရေးအဖွဲ့ရဲ့ အမှုဆောင်ဒါရိုက်တာ Ms. Somsri Hananuntasuk ဟာ မတ်လ ၁၆ ရက်နေ့မှာ မြန်မာနိုင်ငံကို တတိယအကြိမ် ရောက်ရှိလာပြီး၊ ရွေးကောက်ပွဲ လေ့လာစောင့်ကြည့်ရေးနဲ့ သက်ဆိုင်တဲ့ သင်တန်းများကို သတင်း မီဒီယာသမားများနဲ့ တက်ကြွလှုပ်ရှားသူများကို ပို့ချခြင်းကြောင့် ယခုလို ထိုင်းနိုင်ငံကို အမြန်ပြန်ပို့ခံရတာ ဖြစ်တယ်လို့ စုံစမ်းသိရှိရပါတယ်။

ANFREL အဖွဲ့ဟာ မကြာခင်ကျင်းပတော့မယ့် ကြားဖြတ်ရွေးကောက်ပွဲကို ဝင်ရောက် လေ့လာခွင့်ပေးဖို့ ဦးတင်အေး ဥက္ကဋ္ဌအဖြစ် တာဝန်ယူထားတဲ့ ပြည်ထောင်စု ရွေးကောက်ပွဲကော်မရှင်ကို ဖေဖော်ဝါရီလအတွင်းက အကြောင်းကြားစာတစ်စောင်ပို့ပြီး တောင်းဆိုခဲ့တယ်လို့ သိရပါတယ်။

၎င်းအဖွဲ့ဟာ၂၀၁၀ အထွေထွေရွေးကောက်ပွဲ ကာလအတွင်းကလည်း မြန်မာနိုင်ငံအတွင်းမှာ ရွေးကောက်ပွဲ လေ့လာစောင့်ကြည့်မှုကို ပြုလုပ်ခဲ့တဲ့ အဖွဲ့တစ်ဖွဲ့ဖြစ်ပြီး၊ အဲဒီကာလတုန်းကလည်း ANFREL အဖွဲ့သားတစ်ချို့ဟာ လူဝင်မှုကြီးကြပ်ရေး ဥပဒေကို ချိုးဖောက်မှုနဲ့ ထိုင်းနိုင်ငံကို ပြန်လည်ပို့ဆောင်ခြင်း ခံခဲ့ရပါတယ်။