ဧရာဝတီနဲ့ အကျဉ်းသားအရေး ဒေါ်အောင်ဆန်းစုကြည်နဲ့ ဦးအောင်ကြည် ဆွေးနွေး

တွေ့ဆုံပွဲအပြီး ပြုလုပ်တဲ့ သတင်းစာရှင်းလင်းပွဲမှာ- မြစ်ဆုံရေကာတာ တည်ဆောက်ရေးကို ရပ်တန့်မယ့်အကြောင်း သမ္မတဦးသိန်းစိန်က လွှတ်တော်ကို သဝဏ်လွှာ ပေးပို့ခဲ့တာနဲ့ ပတ်သက်ပြီး ဒေါ်အောင်ဆန်းစုကြည်က ကြိုဆိုလိုက်ပါတယ်။

“ကျမတို့ နားလည်သလောက်က ဒီမနက်ကနေပြီးတော့ လွှတ်တော်ကို သမ္မတကြီးဆီက သဝဏ်လွှာ ပို့တယ်လို့ ပြောပါတယ်။ ဒီသဝဏ်လွှာမှာ သမ္မတကြီးက နေပြီးတော့ ‘ပြည်သူလူထုရဲ့ စိုးရိမ်ကြောင့်ကြမှုတွေကို ထောက်ထားပြီးတော့ မြစ်ဆုံရေကာတာ စီမံကိန်းကို ရပ်ဆိုင်းထားမယ်’ လို့ ဒီလို မှာကြားလိုက်တယ်လို့ နားလည်ပါတယ်။ ကျမ အမြင်မှာတော့ ပြည်သူရဲ့အသံကို နားထောင်တဲ့အတွက် အင်မတန်မှ ကောင်းပါတယ်။ ဒီဟာ အစိုးရတိုင်း လုပ်ရမယ့်ကိစ္စပါ။ ပြည်သူတွေရဲ့ အသံကို နားထောင်ရမယ်၊ ပြည်သူရဲ့ စိုးရိမ်ကြောင့်ကြမှုတွေကို တကယ်ပဲ လေးလေးနက်နက် ထားပြီးတော့ ဖြေရှင်းပေးရမယ်။ အဲဒါကြောင့် ကျမ ဒါကို ကြိုဆိုပါတယ်”

ဒေါ်အောင်ဆန်းစုကြည်နဲ့ ဒီကနေ့ ဆွေးနွေးပွဲအပြီးမှာ ပြည်ထောင်စုဝန်ကြီး ဦးအောင်ကြည်က ပူးတွဲကြေညာချက်တခုကို ဖတ်ပြခဲ့ပါတယ်။

“ယနေ့ တွေ့ဆုံဆွေးနွေးမှုတွင် နိုင်ငံတော်သမ္မတကြီးက လွတ်ငြိမ်းချမ်းသာခွင့် ပေးရန် စဉ်းစား ဆောင်ရွက်နေသည့်ကိစ္စ၊ ဧရာဝတီမြစ်ကြောင်း ထိန်းသိမ်းရေးအတွက် နှစ်ဘက် ပူးပေါင်း ဆောင်ရွက်နိုင်မည့် နည်းလမ်းများကိစ္စ တွေ့ဆုံဆွေးနွေးမှုများကို ဆက်လက်ပြုလုပ်သွားရန် သဘောတူညီကြပါသည်”

အဲဒီနောက် သတင်းထောက်တွေရဲ့ မေးမြန်းချက်တွေကို ဝန်ကြီးဦးအောင်ကြည်နဲ့ ဒေါ်အောင်ဆန်းစုကြည်က ဖြေကြားခဲ့ပါတယ်။

အပြည့်အစုံကို ကိုဉာဏ်ဝင်းအောင်က စုစည်း တင်ပြထားပါတယ်။

	စုစည်းတင်ပြချက်။
	အသံဖိုင်ယူရန်။