စာရေးဆရာ နတ်နွယ် ကွယ်လွန်
2011.05.11

ဆရာနတ်နွယ်ဟာ စာပေခရီးလမ်းတလျှောက် စာပေမျိုးစုံကို ပိုင်နိုင် ကျွမ်းကျင်စွာ ရေးသားနိုင်ခဲ့သူ ဖြစ်တယ်လို့ ဆရာနတ်နွယ်ရဲ့ တချိန်က စာပေသူငယ်ချင်း ဖြစ်ခဲ့သူ NLD ခေါင်းဆောင်တဦးဖြစ်တဲ့ ဆရာကြီး ဦးဝင်းတင်က မှတ်ချက်ပေးပါတယ်။
“ကိုနတ်နွယ်ဟာ စာအလွန်ရေးနိုင်တဲ့လူလို့၊ စာရေးနိုင်တဲ့ ဆရာလို့ ဆိုတာ တချက်ကို ပြောလို့ ရပါတယ်။ နောက်တချက်က အဲဒီ ရေးတဲ့ စာတိုင်းကို ပုံစံတကျ ရေးနိုင်တယ်လို့ ကျွန်တော် ပြောလို့ရတယ်။ ဆိုလိုရင်းက ဘာလဲဆိုတော့ သူ့ဝတ္ထုတွေဟာ အဲဒီအချိန်တုန်းက ဝတ္ထုတိုင်းဟာ ကျော်ကြားခဲ့တဲ့ ဝတ္ထုတွေ ဖြစ်တယ်။ နောက်တချက်က ဘာလဲဆိုတော့ အဲဒီ ကျော်ကြားခဲ့တဲ့ ဝတ္ထုတွေ အားလုံးကို သူပြန်လည်ပြီးတော့ သူ့ဟာသူ ပြန်လည် သုံးသပ်ဖို့ အခွင့်အရေး ကြုံသွားတယ်။ အဲဒါ သူ့အတွက် ထူးခြားချက်ပဲလို့ ကျွန်တော် ပြောချင်ပါတယ်။”
ဆရာနတ်နွယ်ဟာ လူကြီးရောဂါနဲ့ ဆေးရုံမကြာခဏ တက်ရောက် ကုသမှု ခံယူခဲ့ရပြီး ကွယ်လွန်ချိန်မှာ အသက် ၇၈ နှစ် ရှိပြီ ဖြစ်ပါတယ်။ သူဟာ ၁၉၃၃ ခုနှစ်မှာ မြစ်ကြီးနားမြို့မှာ မွေးဖွားခဲ့ပြီး၊ မြစ်ကြီးနား အထက်တန်းကျောင်း၊ မန္တလေးနဲ့ ရန်ကုန် တက္ကသိုလ်တို့မှာ ပညာသင်ကြားခဲ့သူ ဖြစ်ပါတယ်။
ဆရာနတ်နွယ်ဟာ နွယ်နီမဂ္ဂဇင်းကိုလည်း တာဝန်ယူ ထုတ်ဝေခဲ့သူလို့သိရပါတယ်။
ဆရာနတ်နွယ်အကြောင်းကို ဆရာဦးဝင်းတင်နဲ့ RFA မှ ဦးဝင်းနိုင်က ဆက်သွယ် မေးမြန်းထားပါတယ်။
![]() |
ဆက်သွယ်မေးမြန်းချက် |
![]() |
အသံဖိုင်ယူရန် |