ဒေါ်ခင်ကြည် ဖောင်ဒေးရှင်း ကျေးရွာ ဖွံ့ဖြိုးရေးလုပ်ငန်းအတွက် လှူဒါန်းမည်

ကော့မှူးမြို့နယ်တွင်း ကျေးရွာအုပ်စုတွေထဲက ရွာ ၃ ရွာကို ကံစမ်းမဲဖောက်ပြီး ဒေါ်အောင်ဆန်းစုကြည်က လှူဒါန်းမှာဖြစ်ကြောင်း လုံခြုံရေးတာဝန်ခံ ဦးခွန်သာမြင့်က ပြောကြားပါတယ်။

ကံစမ်းမဲ ၃ ဆု ရွေးချယ်မှာဖြစ်ပြီး ပထမဆုအနေနဲ့ ကျပ် ၁၇၅ သိန်း၊ ဒုတိယ ၇၅ သိန်း၊ တတိယဆုအဖြစ် သိန်း ၅၀ ပေးအပ်မှာဖြစ်ပါတယ်။ ကံစမ်းမဲပေါက်တဲ့ ကျေးရွာတွေက ပြည်သူတွေကို အစည်းအဝေးခေါ်ယူပြီး ကျေးရွာရဲ့ လိုအပ်ချက်တွေကို တစ်ခါထဲ ဆုံးဖြတ်ချက်ချ စီစဉ်ခဲ့မှာဖြစ်တယ်လို့ ဆိုပါတယ်။

အမျိုးသားဒီမိုကရေစီအဖွဲ့ချုပ် မဲဆွယ်စည်းရုံးရေး ခရီးစဉ်အတွင်း လိုက်ပါကူညီခဲ့တဲ့ ရုပ်ရှင် ဂီတ အနုပညာရှင်တွေကလည်း မနက်ဖြန် ဒေါ်အောင်ဆန်းစုကြည်နဲ့အတူ လိုက်ပါလာပြီး ကံစမ်းမဲ ဖောက်ပေးမှာဖြစ်သလို ကော့မှူးမြို့မှာ ဖျော်ဖြေဖို့ စီစဉ်ထားကြောင်း သိရပါတယ်။

ပြည်သူလူထုရဲ့ လူမှုရေး စီးပွားရေးတွေကို အထောက်အကူပြုရေး ရည်ရွယ်ပြီး ဒေါ်ခင်ကြည်ဖောင်ဒေးရှင်းကို ဒေါ်အောင်ဆန်းစုကြည်က အနည်းဆုံး သိန်းတစ်ရာ မတည်ပြီး ဖွဲ့စည်းဆောင်ရွက်တာဖြစ်ပါတယ်။ ဒီဖောင်ဒေးရှင်းကနေ အထောက်အပံ့ပေးရေး အစီအစဉ်ကို ပထမဆုံး ကော့မှူးမြို့နယ်မှာ စတင်တာဖြစ်ပြီး တစ်ပြည်လုံးမှာ လုပ်ဆောင်သွားဖို့ ရည်ရွယ်ကြောင်းလည်း သိရပါတယ်။