ပင်လုံစိတ်ဓါတ်နဲ့ ပူးပေါင်းဆောင် ရွက်ကြဖို့ သဘောတူ

"အဓိက ချခဲ့တာက နံပါတ် ၁ ကတော့ ကျနော်တို့ တိုင်းပြည်အတွက် အင်မတန်မှအရေးကြီးတဲ့ ပင်လုံနဲ့ ဆိုင်တဲ့ကိစ္စ၊ အဲ့တော့ ပင်လုံ စိတ်ဓါတ် ၊ ပင်လုံ သဘောတူညီချက်၊ ပင်လုံစာချုပ်၊ ဒီအပေါ်မှာ အမြင်တွေကို ညှိနှိုင်းပြီးတဲ့အခါကြတော့မှ ကျနော်တို့ ဒီနေ့ ဆွေးနွေးပွဲမှာ အားလုံးက ကိုးကားရမယ်ဆိုတဲ့ စာတမ်း တခုအနေနဲ့ အားလုံး သဘောတူ ဆုံးဖြတ်ခဲ့တာ ဖြစ်ပါတယ်။ ဒါက ပထမ တစ်ခု ကျနော်တို့ ကြားထဲမှာ ညှိနှိုင်းမှုရဲ့ အောင်မြင်မှုလို့ ယူဆရမှာ ဖြစ် ပါတယ်။ အဲ့တော့ သမိုင်းရေးဆိုင်ရာအရ ပင်လုံပေါ်မှာ မှတ်တမ်းတွေဟာ ခိုင်ခိုင်မာမာ ရှိဖို့လိုတာကို ကျနော်တို့ ခိုင်မာတဲ့ မှတ်တမ်းတွေအဖြစ် ပြန်လည်ပြုစု တယ်။ ဒုတိယ တခုက ဒီအပေါ်မှာ ပင်လုံစိတ်ဓါတ်နဲ့ အတူ ပင်လုံ သဘောတူညီချက်တွေ အတိုင်း တိုင်းပြည်ကို အတူတကွ ပြန်လည်တည်ဆောက် မယ်၊ နောက်ပြီးတဲ့ အခါကြတော့ သဘောတူညီချက်တွေ တိုင်းရင်းသားတွေ ကြားထဲမှာ တန်တူရည်တူ ကိုယ်ပိုင်ပြဌာန်းခွင့် ရှိတဲ့ ဖက်ဒရယ် ဒီမိုကရေစီ နိုင်ငံတော် ကိုတည်ဆောက်မယ်ဆိုတဲ့ ကျနော်တို့ ယူဆချက်တွေဟာ အားလုံးရဲ့ စုစည်းချက်တွေလို့ ပြောရင် ဖြစ် ပါတယ်"

လက်ရှိ ငြိမ်းချမ်းရေး လုပ်ငန်းစဉ်မှာ အကောင်အထည်ဖော်ဆောင်ရွက်နေကြတဲ့ လုပ်ငန်း အဆင့်ဆင့်တွေမှာ လည်း အဖွဲ့အားလုံးက အတူတကွ ညှိနှိုင်းပူးပေါင်းဆောင်ရွက် သွားကြဖို့အတွက် သဘောတူညီမှုတွေရခဲ့ကြ တယ်လို့ ABSDF ဥက္ကဌ ဦးသံခဲ က ပြောပါတယ်။

တိုင်းရင်းသား လက်နက်ကိုင် တော်လှန်ရေး ခေါင်းဆောင်များရဲ့ ထိပ်သီးအစည်းအဝေးကို NCA အပစ်ရပ် လက်မှတ်ရေးထိုးထားကြတဲ့ တိုင်းရင်းသား လက်နက်ကိုင် တော်လှန်ရေး အဖွဲ့ ၈ ဖွဲ့ က ခေါင်းဆောင်တွေနဲ့ NCA အပစ်ရပ် လက်မှတ်မရေးထိုးကြရသေးတဲ့ UNFC အဖွဲ့ဝင် တိုင်းရင်းသား လက်နက်ကိုင် တော်လှန်ရေး အဖွဲ့ ၇ ဖွဲ့ က တိုင်းရင်းသား ထိပ်သီး ခေါင်းဆောင် ၆ဝ ခန့် တက်ရောက်ခဲ့ကြပါတယ်။