အသက်ပြည့်သူတိုင်း စစ်မှု မထမ်းမနေရ ဥပဒေ စတင်တော့မည်

အခု ပြဋ္ဌာန်းလိုက်တဲ့ ဥပဒေမှာ အသက် ၁၈ နှစ်ကနေ ၄၅ နှစ်အတွင်း အမျိုးသားတိုင်းနဲ့ အသက် ၁၈ နှစ်ကနေ ၃၅ နှစ်အတွင်း အမျိုးသမီးတိုင်း ၂ နှစ်ကနေ ၃ နှစ် စစ်မှု မထမ်းမနေရ သတ်မှတ်ထားတယ်လို့ ဆိုပါတယ်။
ဥပဒေအရ စစ်မှုထမ်းလို့ မရတဲ့ ရုပ်ပိုင်းဆိုင်ရာ ချွတ်ယွင်းချက် ရှိသူတွေက လွဲလို့ အသက်ပြည့်သူတိုင်း ဒေသဆိုင်ရာ အာဏာပိုင်တွေဆီမှာ စစ်မှုထမ်းဖို့ မှတ်ပုံတင်ရမှာ ဖြစ်ပါတယ်။ မှတ်ပုံတင်ဖို့ ပျက်ကွက်ရင်ဖြစ်စေ စစ်မှု မထမ်းရအောင် ရှောင်လွှဲဖို့ ကြိုးစားရင်ဖြစ်စေ အဲဒီလို ကျူးလွန်သူဟာ ထောင်ဒဏ် ၅ နှစ်ထိ ကျခံရမယ်လို့လည်း သိရပါတယ်။

ခုလို ဥပဒေ ပြဋ္ဌာန်းလိုက်တာနဲ့ ပတ်သက်ပြီး နိုင်ငံတော်ရဲ့ လက်ရှိ အနေအထားအရ မှန်ကန်တဲ့ ဥပဒေ မဖြစ်နိုင်ဘူးလို့ ဥပဒေ အတိုင်ပင်ခံ ဦးအောင်သိန်းက ယူဆပါတယ်။

မှန်ကန်တဲ့ လုပ်ရပ်တခုတော့ မဟုတ်ဘူးလို့ ကျနော် မြင်ပါတယ်။ ဘာဖြစ်လို့လည်း ဆိုတော့ အဓိကက ပြည်ပကျူးကျော်မှု ပေါ်ပေါက်လာတဲ့ အရေးပေါ် အခြေအနေမျိုးတွေမှာ ဆိုရင် နိုင်ငံသားတိုင်းဟာ စစ်မှုထမ်းရမယ်၊ တာဝန်ရှိတယ် ဆိုတဲ့ ခံယူချက်ကို ကျနော်တို့ လက်ခံပါတယ်။ အဲဒီလို မဟုတ်ဘဲနဲ့ ပြည်ပကျူးကျော်စစ် မရှိဘဲ၊ ပြည်ပရန် ကာကွယ်ရန် အကြောင်းခြင်းရာတွေ မပေါ်ပေါက်သေးဘဲနဲ့ ပြည်တွင်းစစ်တွေမှာပါ အဲဒါတွေကို အသုံးပြုလာမယ်၊ စစ်မှု မထမ်းမနေရ ဆိုပြီး ပြည်သူတွေကိုပါ အသုံးပြုလာမယ် ဆိုရင်တော့ ဒီဥပဒေဟာဖြင့် မှန်ကန်တဲ့ ဥပဒေတရပ်လို့ ကျနော်တို့ မှတ်ယူလို့ မရပါဘူး

ဒီ ဥပဒေကို စစ်အစိုးရက ပြဋ္ဌာန်းလိုက်ပေမယ့် အများပြည်သူ သိရှိအောင် ကြေညာချက် ထုတ်ပြန်ခြင်းမရှိဘဲ နိုင်ငံတော်ပြန်တမ်း အနေနဲ့သာ ထုတ်ပြန်တာဖြစ်တယ်လို့ သိရပါတယ်။

ဒီဥပဒေ ပြဌာန်းလိုက်တာနဲ့ ပတ်သက်ပြီး ဥပဒေ အတိုင်ပင်ခံ ဦးအောင်သိန်းကို အာအက်ဖ်အေ ဦးတင်အောင်ခိုင်က ဆက်သွယ် မေးမြန်းထားပါတယ်။

	ဆက်သွယ်မေးမြန်းချက်။
	အသံဖိုင်ယူရန်။