ကချင်ဆရာမနှစ်ဦး အသတ်ခံရမှု အမှုမှန်ပေါ်ပေါက်ဖို့ တောင်းဆို

ရှမ်းပြည်နယ်မြောက်ပိုင်း မူဆယ်ခရိုင် ကောင်းခါးကျေးရွာမှာ စေတနာ့ဝန်ထမ်း ကချင်ဆရာမ နှစ်ဦး အဓမ္မပြုကျင့် အသတ်ခံခဲ့ရမှု အမှုမှန်ပေါ်ပေါ်ဖို့ မိသားစုဝင်တွေနဲ့ အမှုမှန်ပေါ်ပေါက်ရေးကော်မတီက ဒီနေ့ တောင်းဆို လိုက်ပါတယ်။

ကချင်ဆရာမ နှစ်ဦး အသတ်ခံရမှု ငါးနှစ်ပြည့် အောက်မေ့ဖွယ် အခမ်းအနားကို မြစ်ကြီးနားမြို့နယ် ဂျော်ဘွမ်တောင်မှာ ဒီနေ့ ကျင်းပခဲ့ပါတယ်။

အမှုမှန်ပေါ်ပေါက်ဖို့အတွက် အဖြစ်မှန်ကို ထွက်ဆိုပေးဖို့ ကောင်းခါရွာက အုပ်ချုပ်ရေးမှူး နဲ့ ရွာသူရွာသားတွေကို မိသားစုဝင်တွေနဲ့ အမှုမှန်ပေါ်ပေါက်ရေး ကော်မတီက တိုက်တွန်းလိုက်ပါတယ်။

ကောင်းခါရွာက အုပ်ချုပ်ရေးမှူးနဲ့ ရွာသူရွာသားတွေက အဖြစ်မှန်ကို ပြောပြနိုင်မှ အမှုအတွက် တရားရုံးမှာ တရားစွဲဆိုလို့ရမှာလို့ KBC ဥက္ကဋ္ဌ သိက္ခာတော်ရ ဆရာတော် Rev. ဒေါက်တာ ခလမ်ဆမ်ဆွန်က ပြောပါတယ်။

လွန်ခဲ့တဲ့ ၂ နှစ်ခန့်ကစပြီး အမှုအခြေအနေ တိုးတက်မှု မရှိတော့ဘူးလို့လည်း ဒေါက်တာခလမ်ဆမ်ဆွန် က ပြောပါတယ်။

အမှု စဖြစ်ချိန်မှာတော့ ရဲတပ်ဖွဲ့နဲ့ တပ်မတော်က ပူးပေါင်းကူညီခဲ့ပေမယ့် နောက်ပိုင်းမှာ ပူးပေါင်းမှု အားနည်းသွားတဲ့အတွက် အမှုအတွက် ရှေ့နေတွေ ဆက်လက်ဆောင်ရွက်ဖို့ ခက်ခဲသွားတယ်လို့လည်း သိရပါတယ်။

စေတနာ့ ဝန်ထမ်းဆရာမ နှစ်ဦးဖြစ်တဲ့ မရန်လုရာနဲ့ ခေါန်နန်စင်တို့ နှစ်ဦးဟာ၂၀၁၄-၂၀၁၅ ပညာသင်နှစ်မှာ မူဆယ်ခရိုင် ကောင်းခါးကျေးရွာက မူလတန်းကျောင်းမှာ တာဝန်ထမ်းဆောင်နေစဉ် ၂၀၁၅  ဇန်နဝါရီ ၁၉ရက်နေ့ ညသန်းခေါင်မှာ လူတစ်စုရဲ့ မုဒိန်းကျင့် သတ်ဖြတ်ခံခဲ့ရတာပါ။

ဆရာမလုရာ အစ်မ ဖြစ်သူ ဒေါ်ဆန်လုံကလည်း အမှုအတွက် သက်သေဟာ အရေးကြီးဆုံးဖြစ်တဲ့အတွက် ရွာသူရွာသားတွေအနေနဲ့ အဖြစ်မှန်ကို ထွက်ဆိုပေးဖို့ တောင်းဆိုလိုက်ပါတယ်။

ဆရာမ ခေါန်နန်စင်ဟာ အစိုးရတပ်မတော်နဲ့ ကေအိုင်အေတို့ ဖြစ်ပွားခဲ့တဲ့ စစ်ပွဲကြောင့် ၂၀၁၂ ခုနှစ်က ဂျန်မိုင်ကောင့် အသင်းတော် စစ်ရှောင်စခန်းကို ထွက်ပြေးတမ်းရှောင်ခဲ့ပြီး အဲဒီစစ်ရှောင်စခန်းမှာ မူကြိုဆရာမအဖြစ် ဆက်လက် တာဝန်ထမ်းဆောင်ခဲ့ပြီးနောက် မူဆယ်ခရိုင် ကောင်းခါးကျေးရွာကို ပြောင်းရွှေ့ခဲ့ရတာပါ။

ဆရာမလုရာဟာ ၂၀၁၃-၂၀၁၄ ခုနှစ်မှာ ဆွမ်ပရာဘွမ်မြို့နယ် ခင်ဒူယန်ကျေးရွာ နှစ်ခြင်းခရစ်ယာန်သာသနာ မူလတန်းကျောင်းဆရာမအဖြစ် လုပ်ခဲ့သူပါ။

အမှုမှန်ပေါ်ပါက်ဖို့ အစိုးရအနေနဲ့ ဝိုင်းဝန်းကူညီဆောင်ရွက်ပေးဖို့ ဆရာမ ခေါန်နန်စင် အမေ ဖြစ်သူ ဒေါ်လုဘူ က တောင်းဆိုပါတယ်။

အမှုမှန် ပေါ်ပေါက်ရေးအတွက် မြန်မာနိုင်ငံဆိုင်ရာ လူ့အခွင့်အရေး အထူးကိုယ်စားလှယ် မစ္စယန်ဟီးလီကို အမှုအခြေအနေနဲ့ ပတ်သက်လို့ မနေ့က တင်ပြထားတယ်လို့ သိရပါတယ်။

ကချင်ဆရာမ နှစ်ဦးအသတ်ခံခဲ့ရတဲ့နေ့က ခမရ ၅၀၃ တပ်မတော်စစ်ကြောင်း ကောင်းခါးကျေးရာမှာ ရှိနေတာကြောင့် အဲဒီထဲက တပ်မတော်သားတွေကို စစ်ဆေးမေးမြန်းခွင့်ပြုဖို့ KBC ခေါင်းဆောင်တွေက ရှမ်းပြည်နယ် ရဲတပ်ဖွဲ့ကို တောင်းဆိုခဲ့ဖူးပါတယ်။

အဲဒီအချိန်က ရှမ်းပြည်နယ် ရဲတပ်ဖွဲ့မှာ တာဝန်ကျနေတဲ့ ရဲမှူးကြီး အောင်မြတ်မိုးကတော့ တပ်မတော်သား ၂၈ ဦးကို စစ်ဆေးထားပြီး အဲဒီတပ်မတော်သားတွေရဲ့ မျိုးရိုးဗီဇနဲ့ ဆံပင်နမူနာတွေ ရယူထားကြောင်းသာ အကြောင်းပြန်ခဲ့ပါတယ်။ ကချင်ဆရာမ နှစ်ဦး အသတ်ခံရပြီးနောက်နေ့မနက်မှာ တပ်မတော် စစ်ကြောင်းက ရွာကနေ ထွက်ခွာသွားသလို အဲဒီအချိန်က ရွာကနေ ထွက်ပြေးသွားတဲ့ ကျေးရွာသားတချို့လည်းရှိကြောင်း အဲဒီအချိန်က အမှုကို စစ်ဆေးခဲ့တဲ့ အာဏာပိုင်တွေက ပြောဆိုထားပါတယ်။

ဒီအမှုနဲ့ ပတ်သက်လို့ အဲဒီအချိန်က ကောင်းခါးရွာမှာရှိနေတဲ့ တပ်မတော်သားတွေကို စစ်ဆေးမေးမြန်းထားတဲ့ နောက်ဆက်တွဲအခြေအနေကို သိရှိနိုင်ဖို့ တပ်မတော် သတင်းမှန် ပြန်ကြားရေးအဖွဲ့က ဗိုလ်မှူးချုပ် ဇော်မင်းထွန်းကို RFA က မေးမြန်းဖို့ ဆက်သွယ်ပေမယ့် ဆက်သွယ်လို့မရခဲ့ပါဘူး။

၂၀၁၇ ခုနှစ်ကလည်း ဗြိတိန်အခြေစိုက် လူ့အခွင့်အရေးလှုပ်ရှားတဲ့ Burma Campaign UK အဖွဲ့က လူပေါင်း ၃၂၀၀ ကျော် လက်မှတ်ရေးထိုးပြီး ဒီဆရာမ နှစ်ဦး အသတ်ခံရမှုမှာ အမှုမှန်ပေါ်ပေါက်ရေးအတွက် အကူအညီပေးဖို့ ဗြိတိန်အစိုးရကို တောင်းဆိုခဲ့ပါတယ်။

ဒါပေမယ့် လက်ရှိအချိန် ငါးနှစ်ပြည့်တဲ့အထိ တရားခံတွေကို ဖော်ထုတ်ဖမ်းဆီး အရေးယူတာတွေ မရှိသေးတာကြောင့် ဒေသခံတွေနဲ့ KBC ခေါင်းဆောင်တွေက ဝေဖန်ပြောဆိုနေကြပါတယ်။