အမျိုးသားဒီမိုကရေစီ အဖွဲ့ချုပ် ရွေးကောက်ပွဲအတွက် သီချင်းထုတ်မယ်

NLD ရွေးကောက်ပွဲ အောင်နိုင်ရေး တေးသီချင်းအသစ် ရေးစပ်သီဆိုရေး ဆွေးနွေးခဲ့ကြသည့် အနုပညာရှင်များနှင့် လူထုခေါင်းဆောင် ဒေါ်အောင်ဆန်းစုကြည် အမှတ်တရ ဓာတ်ပုံမြင်ကွင်း။ Photo: NLD

အမျိုးသားဒီမိုကရေစီ အဖွဲ့ချုပ် ရွေးကောက်ပွဲအတွက် သီချင်းထုတ်မယ် လာမယ့် ရွေးကောက်ပွဲ အောင်နိုင်ရေးအတွက် အင်န်အယ်လ်ဒီက အသုံးပြုမယ့် တေးသီချင်းအသစ် ရေးစပ် သီဆိုရေးနဲ့ ပတ်သက်လို့ ဂီတ အနုပညာရှင်တွေနဲ့ ဆွေးနွေးပွဲကို ဒေါ်အောင်ဆန်းစုကြည် နေအိမ်ခြံဝင်းအတွင်းမှာ ဒီကနေ့ ပြုလုပ်ခဲ့ပါတယ်။

အဲဒီဆွေးနွေးပွဲနဲ့ အတူ ပြီးခဲ့တဲ့ နိုဝင်ဘာလ ၂၁ ရက်က ပညာရေးကွန်ရက် တစ်နှစ်မြောက် ဈေးရောင်းပွဲမှာ ပါဝင် ကူညီခဲ့သူများကို ဂုဏ်ပြုပွဲကိုလည်း ပြုလုပ်ခဲ့ပါတယ်။

လာမယ့် ကြားဖြတ် ရွေးကောက်ပွဲမှာ အောင်နိုင်ရေး အတွက် ဂီတအနုပညာ သမားတွေဘက်က တတ်စွမ်းသမျှ ဝိုင်းဝန်း ကူညီပေးဖို့ ဖြစ်ကြောင်း ဒီဆွေးနွေးပွဲကို တက်ရောက်ခဲ့တဲ့ Hip Hop အဆိုတော် ကိုဇေယျာသော်က အာရ်အက်ဖ်အေကို ပြောပါတယ်။

တိုင်းပြည်ရဲ့ စိတ်ဓာတ် ခွန်အားဖြစ်စေမယ့် သီချင်းမျိုး ရေးစပ်ဖို့ ဆွေးနွေးခဲ့ကြကြောင်း ဂီတအနုပညာရှင် ဆောင်းဦးလှိုင်ကလည်း ပြောပါတယ်။