သက်မွေးဝမ်းကျောင်း လုပ်ခွင့် ပြန်ရဖို့ NLD ကူညီမည်

အမျိုးသားဒီမိုကရေစီအဖွဲ့ချုပ် ဒု-ဥက္ကဌ ဦးတင်ဦး နေအိမ်အကျယ်ချုပ်မှ ပြန်လည် လွတ်မြောက်လာပြီးနောက် ရွှေဂုံတိုင်ဌာနချုပ်ရုံးသို့ ၂ဝ၁ဝ ခုနှစ် ဖေဖော်ဝါရီလ ၁၅ ရက်နေ့က ရောက်ရှိလာစဉ်။

အဲဒီကိစ္စကို ရှေ့လာမယ့် အပတ်အတွင်း သတင်းစာ ရှင်းလင်းပွဲ လုပ်သွားမယ်လို့ NLD ပါတီ ဒုဥက္ကဌ ဦးတင်ဦးက ပြောပါတယ်။

"ကျနော်တို့ NLD က တရားရုံး ရှေ့နေတို့၊ ဆရာဝန်၊ ကျောင်းဆရာ ဆရာမတို့၊ အနုပညာရှင်တို့၊ စာရေးဆရာ သတင်းစာ ဆရာတို့၊ ဝန်ထမ်းတို့၊ သူတို့က နိုင်ငံရေးယုံကြည်မှုပေါ်မှာ မူတည်ပြီး ပြစ်ဒဏ်ကျခံရတယ်ဗျာ။ သူတို့ ပြန်လွတ်လာတော့ လိုင်စင်တွေ သိမ်းတယ် လုပ်ခွင့် မပေးဘူးဆိုတော့ သူတို့ကို ထပ်မံ ပြစ်ဒဏ်ပေးရာ ကျတာပေါ့ဗျာ။ ပြစ်ဒဏ်ကလည်း ခံပြီးပြီလေ။ သူတို့ သက်မွေးဝမ်းကျောင်းကတော့ သူတို့ ပြန်လုပ်စားရမှာပေါ့။ သူတို့ကို တရား ဥပဒေနဲ့အညီ ရခွင့် ရပိုင်ခွင့် ကုစားခံပိုင်ခွင့် ဒါကို ကျနော်တို့က လုပ်ချင်တာပါ။"

NLD ပါတီက အခု ကူညီသွားမယ့် အစီအစဉ်ဟာ NLD ပါတီဝင်တွေ သာမက အခြားသော နိုင်ငံရေး လှုပ်ရှားသူတွေ အတွက်လည်း ပါဝင်ကြောင်း ဦးတင်ဦးက ပြောပါတယ်။

နိုင်ငံရေး ယုံကြည်ချက်ကြောင့် လှုပ်ရှားရင်း အစိုးရက လိုင်စင်ရုပ်သိမ်းခဲ့တဲ့ ရှေ့နေ အနည်းဆုံး (၂၅) ဦးရှိပြီး ဆရာဝန်တွေ အဆိုတော်တွေ သတင်းစာ ဆရာတွေလည်း ပါဝင်တယ်လို့ သိရပါတယ်။