မြန်မာပြည် ဒဏ်ခတ်ပိတ်ဆို့မှု ရုပ်သိမ်းရေး ICG အဖွဲ့ အစီရင်ခံ

မြန်မာနိုင်ငံမှာ နိုင်ငံရေး ပြုပြင်ပြောင်းလဲမှုတွေ လုပ်ဖို့ အရေးတကြီး လိုအပ်နေပြီ ဖြစ်ကြောင်း၊ ပြီးခဲ့တဲ့ ရွေးကောက်ပွဲကနေ ပေါ်ထွက်လာတဲ့ အစိုးရသစ်မှာ စစ်ဗိုလ်ချုပ်တွေကသာ အဓိက လွှမ်းမိုးနေပေမယ့် ဒါဟာ ပြုပြင်ပြောင်းလဲရေးနဲ့ ပိုပြီး လွတ်လပ် ပွင့်လင်းမှုအတွက် အခွင့်အလမ်းတခု ဖြစ်ကြောင်း ICG ရဲ့ အစီရင်ခံစာမှာ ရေးသားထားပါတယ်။

ဒီအခွင့်အလမ်းကို အမိအရ အသုံးချနိုင်ဖို့ အတွက်ဆိုရင် မြန်မာနိုင်ငံအပေါ် ထားရှိတဲ့ အနောက်နိုင်ငံတွေရဲ့ မအောင်မြင်တဲ့ ဒဏ်ခတ်ပိတ်ဆို့ရေး မူဝါဒတွေကို ပြောင်းလဲမှသာ ဖြစ်နိုင်တယ်လို့လည်း ဆိုပါတယ်။

ဆက်လက်ပြီး အဲဒီလို မူဝါဒအသစ်တခုနဲ့ ပြောင်းလဲ ချဉ်းကပ်ခြင်းအားဖြင့် ပြုပြင်ပြောင်းလဲရေး လုပ်ရင် အနောက်နိုင်ငံတွေနဲ့ ဆက်ဆံရေး ပိုကောင်းလာနိုင်တယ် ဆိုတဲ့အကြောင်း မြန်မာခေါင်းဆောင်တွေကို အချက်ပြနိုင်မှာ ဖြစ်ကြောင်းလည်း ICG အစီရင်ခံစာက အကြံပြုထားပါတယ်။

မြန်မာနိုင်ငံက ကုန်ပစ္စည်းတွေ အမေရိကန် ပြည်ထောင်စုကို တင်သွင်းခွင့် ပိတ်ပင်ထားတာလို စီးပွားရေး ပိတ်ဆို့မှုတွေ၊ ဖွံ့ဖြိုးရေး အကူအညီ ကန့်သတ်မှုတွေကို ပြန်ရုပ်သိမ်းဖို့နဲ့ တချိန်တည်းမှာ မြန်မာနိုင်ငံကို ငွေကြေးအကူအညီတွေ တိုးမြှင့်ပေးဖို့လည်း အစီရင်ခံစာမှာ တိုက်တွန်းထားပါတယ်။