ဒေါ်ခင်စောဝေ ကို လွှတ်တော်ဥက္ကဌ သတိပေး

အရေးကြီးအဆိုမတင်ဖို့ လွှတ်တော်ဥက္ကဌက လွှတ်တော်ကိုယ်စားလှယ် ဒေါ်ခင်စောဝေနဲ့ လွှတ်တော်ကိုယ်စား လှယ် ဦးဘရှိန်တို့ကို ခေါ်ယူဆွေးနွေးခဲ့ပါတယ်။ အဲဒါအပြီးမှာ ဒေါ်ခင်စောဝေက အဆိုတင်ခွင့်မရတာကို သူ့ရဲ့ဖေ့စ်ဘွတ်ပေါ်တင်လိုက်သလို သတင်းမီဒီယာတွေကိုလည်း ထုတ်ဖေါ်ပြောခဲ့တာ ဖြစ်ပါတယ်။ အဲဒီလို ထုတ်ဖေါ်ပြောဆိုမှုဟာ ပြည်သူတွေအနေနဲ့ လွှတ်တော်ကို အထင်အမြင်လွဲမှားစေတယ်လို့လည်း ဥက္ကဌ ဦးဝင်းမြင့် က ရှင်းပြပါတယ်။

ဒေါ်ခင်စောေ၀ တင်သွင်းဖို့ ပြင်ဆင်ထားတဲ့အဆိုထဲမှာ AA အဖွဲ့ကို ငြိမ်းချမ်းရေးဆွေးနွေးပွဲ စကားဝိုင်းကို ဖိတ်ခေါ်ဖို့ဖြစ်ကြောင်း၊ အပစ်ခတ်ရပ်စဲရေးအတွက် တိကျမှန်ကန်တဲ့ လုပ်ငန်းစဉ်များ ချမှတ်ပြီး ငြိမ်းချမ်းရေး ကို မြန်မြန်ဆန်ဆန် အကောင်အထည်ဖေါ် ဆောင်ရွက်နိုင်ဖို့ လိုအပ်ကြောင်း၊ ကျေးရွာသူ ကျေးရွာသားတွေကို လမ်းပြအဖြစ် ပေါ်တာဆွဲခံရတာတွေရှိကြောင်း စတဲ့အချက်တွေ ပါရှိတယ်လို့ ဥက္ကဌ ဦးဝင်းမြင့် က ရှင်းပြပါတယ်။

ဒါ့အပြင် စစ်ဘေးဒုက္ခသည်တွေကို နိုင်ငံတော်က အကူအညီပေးရန် ခေါင်းစဉ်တပ်ပြီး AA လက်နက်ကိုင်အဖွဲ့ကို ငြိမ်းချမ်းရေးဆွေးနွေးပွဲမှာ ပါဝင်ခွင့်ရဖို့အတွက် ဦးတည်တဲ့ ဆွေးနွေးချက်ကို တွေ့ရှိရတယ်လို့လည်း လွှတ်တော် ဥက္ကဌက ရှင်းလင်းပါတယ်။ အဲ့ဒီလိုအချက်တွေဟာ လွှတ်တော်က ကန့်သတ်ထားတဲ့ အချက်တွေနဲ့ ညီညွတ်ခြင်း မရှိတဲ့အတွက် ငြင်းပယ်ရတာဖြစ်ကြောင်း ရှင်းပြပါတယ်။

လွှတ်တော်ဥက္ကဌ ဦးဝင်းမြင့်ရဲ့ ရှင်းပြချက်အပေါ် အဆိုတင်သွင်းဖို့ ခွင့်တောင်းခဲ့သူ ဒေါ်ခင်စောဝေက အခုလို ပြောပါတယ်။

"ဘာပဲဖြစ်ဖြစ်ပါ ဥက္ကဌအနေနဲ့လည်း မှန်ပါတယ်၊ ကျမနေနဲ့လည်း မှန်တယ်လို့ ယူဆတယ်၊ ဘာဖြစ်လို့လဲဆိုတော့ ကျမသည် ပြည်သူတွေ တင်မြှောက်ထားတဲ့ ပြည်သူတွေ မဲဆန္ဒနဲ့ ပြည်သူ့ကိုယ်စားပြောပေးဖို့ လွှတ်လိုက် တဲ့ ပြည်သူ့ကိုယ်စားလှယ်တစ်ဦးပါ၊ ပြည်သူတွေရဲ့ အခက်အခဲ၊ ပြည်သူတွေရဲ့အသံ၊ ပြည်သူတွေရဲ့ဆန္ဒကို အန်တီ့မှာလွှတ်တော်အတွင်းကို သယ်ဆောင်ဖို့ တာဝန်ရှိပါတယ်၊ အဲ့အတွက်ကြောင့် ဥက္ကဌပြောသွားတဲ့ အပေါ်လည်း ကျမဘာမှမခံစားရပါဘူး၊ ကျေးဇူးတင်ပါတယ်၊ အခုလိုချပြသွားတဲ့အတွက် တစ်ဘက်ကလည်း ဒါမှန်တယ် ကျမဘက်ကလည်းမှန်တယ်လို့ ယူဆပါတယ်"

အဆိုတင်သွင်းခွင့် မရခဲ့တဲ့အတွက် ရခိုင်ပြည်နယ်က စစ်ဘေးဒုက္ခသည်တွေကို အစိုးရက အကူအညီပေး ဖို့ နိုင်ငံတော်သမ္မတ ဦးထင်ကျော်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ထံ ရခိုင်အမျိုးသားပါတီက လွှတ်တော် ကိုယ်စားလှယ် ၂၂ ယောက် စုပေါင်းလက်မှတ်ထိုးပြီး ဒီကနေ့ တင်ပြမယ်လို့ ဒေါ်ခင်စောဝေ က ပြောပါတယ်။