အစိုးရနဲ့ ဆွေးနွေးပွဲဟာ ငြိမ်းချမ်းရေး အတွက် ခြေလှမ်းတစ်လှမ်းသာဖြစ်

အခုဆွေးနွေးပွဲဟာ နောက်ထပ်တွေ့ဆုံဆွေးနွေးဖို့အတွက် ကြိုတင်ပြင်ဆင်တဲ့ သဘောသာဖြစ်တယ်လို့ KIO ကိုယ်စားလှယ်အဖွဲ့ကို ဦးဆောင်တဲ့ KIO ဗဟိုကော်မတီဝင် ဦးဆွန်လွတ်ဂမ် ကို ကိုးကားပြီး AFP သတင်းဌာနက ဖော်ပြပါတယ်။

မနေ့က ဆွေးနွေးပွဲအပြီး ထုတ်ပြန်တဲ့ ပူးတွဲကြေညာချက်မှာတော့ အပစ်အခတ်ရပ်စဲရေးအတွက် အရပ်ဘက် စောင့်ကြည့်လေ့လာရေးအဖွဲ့တွေထားဖို့၊ နှစ်ဖက်စစ်ရေးတင်းမာမှုတွေ လျှော့ချဖို့နဲ့ ဆက်သွယ်ရေးလမ်းကြောင်းတွေ ထူထောင်နိုင်မယ့် နည်းလမ်းတွေကို ဆွေးနွေးခဲ့ကြတယ်လို့ ဖော်ပြပါတယ်။

ဒီလကုန်ပိုင်းမှာ ကြားခံလေ့လာသူတွေဖိတ်ခေါ်ပြီး နောက်တကြိမ် တွေ့ဆုံဆွေးနွေးဖို့ နှစ်ဖက်သဘောတူခဲ့ကြတယ်လို့လည်း သိရပါတယ်။

ရွှေလီမြို့၊ ချင်ချန်းဟိုတယ်မှာ မနေ့က ပြုလုပ်တဲ့ဆွေးနွေးပွဲကို KNU ကရင်အမျိုးသားအစည်းအရုံးနဲ့ ရှမ်းပြည်တပ်မတော် RCSS/SSA အဖွဲ့ ကိုယ်စားလှယ်တွေအပြင် တရုတ်အစိုးရ အရာရှိတွေလည်း လေ့လာသူတွေအဖြစ် တက်ရောက်ခဲ့ကြပါတယ်။