လက်ကိုင်ဖုန်းပြောခ လုပ်ငန်းခွန် ဆိုင်းငံ့ပေးဖို့ အဆိုတင်သွင်း

လက်ကိုင်ဖုန်းပြောဆိုခအပေါ် ကုန်သွယ်လုပ်ငန်းခွန် ငါးရာခိုင်နှုန်း ကောက်ခံမယ့်အစီအစဉ်ကို ဆိုင်းငံ့ပေး ဖို့ ပြည်ထောင်စုလွှတ်တော်မှာ ဒီနေ့ အရေးကြီးအဆို တင်သွင်းရာ လက်ခံဆွေးနွေးဖို့ ဆုံးဖြတ်လိုက်ပါတယ်။

ပြည်သူ့လွှတ်တော်ကိုယ်စားလှယ် ဦးသိန်းထွန်းဦးက ကုန်သွယ်လုပ်ငန်းခွန် ၅ ရာခိုင်နှုန်း ကောက်ခံမယ့် အပေါ် ဖုန်းသုံးစွဲသူတွေက မကျေနပ်ကြတဲ့အတွက် အခွန်ကောက်ခံမယ့် အစီအစဉ်ကို တစ်နှစ်ဆိုင်းငံ့ပေးဖို့ အခုလိုတင်ပြခဲ့တာဖြစ်ပါတယ်။

"ဖုန်းခေါ်ဆိုခ ကြိုတင်ထည့်သွင်းငွေများထဲက ကုန် သွယ်လုပ်ငန်းခွန် ၅ ရာခိုင်နှုန်း ဖြတ်တောက်ကောက် ခံသည့်ကိစ္စကို ၂ဝ၁၅ - ၂ဝ၁၆ ဘဏ္ဍရေးနှစ်အတွင်း ကင်းလွတ်ခွင့်ပြုနိုင်ရန် တည်ဆဲပြည်ထောင်စု၏ အခွန်အကောက်ဥပဒေကို ပြင်ဆင်သည့် ဥပဒေကြမ်း အား ပြည်ထောင်စုလွှတ်တော်သို့ အမြန်ဆုံးတင်သွင်း အတည်ပြုပေးနိုင်ပါရန် ပြည်ထောင်စုလွှတ်တော် နဲ့ ပြည်ထောင်စုအစိုးရအဖွဲ့သို့ တိုက်တွန်းကြောင်းအဆိုကို ပြည်ထောင်စုလွှတ်တော်မှ ဆုံးဖြတ်အတည်ပြုပေးနိုင် ပါရန် လေးစားစွာတင်ပြအပ်ပါတယ်"

အဲဒီ့အဆိုကို ပြည်သူ့လွှတ်တော်ကိုယ်စားလှယ် ဦးဝင်းသန်းက ထောက်ခံခဲ့ပြီး ပြည်ထောင်စုလွှတ်တော်မှာ လက်ခံဆွေးနွေးဖို့ ဆုံးဖြတ်လိုက်တာဖြစ်ပါတယ်။

မိုဘိုင်းဖုန်းသုံးစွဲသူအားလုံးဟာ လာမယ့် ဇွန်လ ၁ ရက်နေ့ကစပြီး ကုန်သွယ်လုပ်ငန်းခွန် ၅ ရာခိုင်နှုန်း ပေးဆောင် ရတော့မှာဖြစ်ကြောင်း ဆက်သွယ်ရေးနဲ့ သတင်းအချက်အလက် နည်းပညာဝန်ကြီးဌာနက ပြီးခဲ့တဲ့ မေလ ၁၈ ရက်နေ့က သတင်းစာရှင်းလင်းပွဲကျင်းပပြီး ကြေညာခဲ့တာဖြစ်ပါတယ်။

ကျပ်တစ်ထောင်တန် ငွေဖြည့်ကတ်အတွက် ၄၈ ကျပ်၊ ငါးထောင်တန်အတွက် ၂၃၈ ကျပ်၊ တစ်သောင်းတန်အတွက် ၄၇၆ ကျပ် နဲ့ နှစ်သောင်းတန်အတွက် ၉၅၂ ကျပ်ကို ငွေဖြည့်စဉ်မှာ ဖြတ်တောက်မှာဖြစ်တယ်လို့ သိရပါတယ်။