သြင်္ကန်ဗုံးကွဲမှု ဓာတ်ပုံရိုက်သူကို သီပေါထောင် ပြောင်းရွှေ့
2011.02.24
မြန်မာနိုင်ငံမှ ရွှေဝါရောင် သံဃာ့လှုပ်ရှားမှု နှစ်နှစ်မြောက် အထိမ်းအမှတ်အဖြစ် ဖိလိပိုင်နိုင်ငံ မနီလာမြို့ရှိ မြန်မာစစ်အစိုးရ သံရုံးရှေ့တွင် ၂၀ဝ၉ စက်တင်ဘာ ၂၅ ရက်နေ့က ဖိလိပိုင် လူမျိုးများ စုရုံးဆန္ဒပြကာ နိုင်ငံရေးအကျဉ်းသားများ လွတ်မြောက်ရေး တောင်းဆိုနေခြင်း ဖြစ်ပါသည်။ (Photo: AFP)
ဒီကိစ္စနဲ့ ပတ်သက်လို့ အင်းစိန်ထောင်အရာရှိတွေက ဒီကနေ့ တရားဝင် စာနဲ့ ပြောဆိုလိုက်တာလို့ စာရေးဆရာ သားကြီးမောင်ဇေယျရဲ့ ဇနီး ဒေါ်ရီရီတင့်က RFA ကို ပြောပါတယ်။
“ဒီနေ့ပဲ သွားခဲ့တာလေ၊ သွားတွေ့တဲ့အခါကျတော့ သီပေါထောင်ကို ၂၂ ရက်နေ့က ပြောင်းသွားပါပြီတဲ့၊ အဲလိုပဲ စာလေး ရေးပေးလိုက်တယ်။ ၂၂ ရက်နေ့ မနက် ၃ နာရီက ထုတ်တယ်ဆိုတော့လေ၊ အဲဒီနေ့က ရထားနဲ့ သွားဦး၊ ဒီနေ့မှ ရောက်မယ် ထင်တာပဲ။”
စစ်အစိုးရဟာ ဦးမောင်မောင်ဇေယျကို မကြာသေးခင်ကမှ ထောင်ဒဏ် ၁၃ နှစ်ချပြီး၊ ပြီးခဲ့တဲ့ ဖေဖော်ဝါရီလ ၂၂ ရက်နေ့က အင်းစိန်ထောင်ကနေ မနက် ၃ နာရီမှာ ခေါ်ထုတ်သွားတာပါ။
မိသားစုတွေ ပုံမှန် ထောင်ဝင်စာတွေ့ဖို့ အခက်အခဲရှိမဲ့ နယ်ဝေးထောင်ကို အပို့ခံလိုက်ရတဲ့ ဦးမောင်မောင်ဇေယျဟာ အသည်းနဲ့ နှလုံးရောဂါ ရှိတယ်လို့ မိသားစုဝင်တွေက ပြောပါတယ်။
သူ့နဲ့အတူ အဖမ်းခံရပြီး ထောင်ချခံထားရတဲ့ သားဖြစ်သူ ကိုစည်သူဇေယျကတော့ နောက်ထပ် စွဲချက်တင် ခံထားရတဲ့ ပုဒ်မတွေနဲ့ တရားရုံး ထွက်နေရတုန်းပဲ ဖြစ်လို့ အင်းစိန်ထောင်မှာပဲ ကျန်ရစ်ခဲ့ပါတယ်။
မတ်လ ၁ ရက် လာမဲ့ အင်္ဂါနေ့မှာ ကိုစည်သူဇေယျကို နောက်တကြိမ် ရုံးထုတ်ဖို့ ချိန်းဆိုထားပါတယ်။
ဖတ်ရှုသူအများဆုံး သတင်းများ။
RFA
ဖတ်ရှုသူအများဆုံး သတင်းများ။
သတင်းများ
