စစ်တွေလေဆိပ်ရောက်လာသူတွေထဲက နှစ်ဦးကို စောင့်ကြည့်နေ

ရန်ကုန်ကနေ  စစ်တွေလေဆိပ်ကို အဲကမ္ဘောဇလေကြောင်းလိုင်းနဲ့ ဧပြီ ၁၉ ရက်နေ့ မနေ့က ရောက်ရှိလာတဲ့ ခရီးသည် ၆၅ ဦးမှာ နှစ်ဦးကိုသာ ကိုရိုနာဗိုင်းရပ်စ် ကာကွယ်ရေးအတွက် သီးသန့်နေထိုင်ဖို့ ပြည်နယ်အစိုးရက ကန့်သတ်စောင့်ကြည့်ထားပါတယ်။

ဒေသခံတချို့ကတော့ နှစ်ဦးတည်းကို စောင့်ကြည့်ရုံနဲ့ လုံလောက်မှု မရှိဘူးလို့ ယူဆပါတယ်။

အဲကမောဇ လေကြောင်းနဲ့ လိုက်ပါလာတဲ့ ၆၅ ဦးမှာ ကိုရိုနာဗိုင်းရပ်စ် ကူးစက်ပြန့်ပွားမှုများပြားတဲ့ ရန်ကုန် အင်းစိန်မြို့နယ်က နှစ်ဦး ပါဝင်ပါတယ်။

သူတို့နှစ်ဦးကိုသာ ကန့်သတ်စောင့်ကြည့်ထားပြီး ကျန်တဲ့သူတွေကို နေအိမ်မှာ ကန့်သတ်စောင့်ကြည့်ဖို့ အစိုးရက ညွှန်ကြားထားတယ်လို့ စစ်တွေမြို့ အရပ်ဖက်အဖွဲ့က ကိုထွန်းလင်းအောင်က ပြောပါတယ်။

“စစ်တွေရယ်၊ ပုဏ္ဍားကျွန်းရယ်၊ ပေါက်တောရယ် သုံးခု ပုဏ္ဍားကျွန်းကိုတော့ ကားနဲ့ပို့တယ်။ ပေါက်တော မနေ့က တစ်ခါတည်းပို့တယ်၊ အစိုးရအစီအစဉ်နဲ့ ကားနဲ့ပို့တယ်။ စစ်တွေက အင်းစိန်ကလာတဲ့ အမျိုးသမီး နှစ်ယောက်ကိုတော့ ကွာရန်တင်းထားတယ်။ ကျန်တဲ့သူတွေကိုတော့ ဟုမ်းကွာရန်တင်းထားဖို့ ညွှန်ကြားထားတယ်”

ဧပြီ ၁၉ ရက်နေ့ မနေ့က ခရီးသည်တင် လေယာဉ် တစ်စီးနဲ့  ကုန်ပစ္စည်းတွေ တင်ဆောင်လာတဲ့ တပ်မတော် လေယာဉ် နှစ်စီး ဆင်းသက်ခဲ့ပါတယ်။

လေဆိပ်မှာ အုပ်ချုပ်ရေးအဖွဲ့တွေနဲ့ ကျန်းမာရေးဝန်ထမ်းတွေက အဓိက စစ်ဆေးကြတာလို့ စစ်တွေလေဆိပ် တာဝန်ရှိသူ ဦးကျော်စိုးက ပြောပါတယ်။

“KBZ ဆင်းတယ်၊ တပ်မတော် လေယာဉ်က နှစ်စီးဆင်းပါတယ်၊ သုံးစီးဆင်းပါတယ်၊ မနေ့က KBZ က ၆၅ ဦးပါတယ်၊ စစ်တွေလေဆိပ်မှာ စစ်တယ်၊ ကျွန်တော်တို့က အဓိကလုပ်တာ မဟုတ်ဘူး၊ ကျန်းမာရေးပါတယ်၊ ထွေအုပ်ပါတယ်၊ ရဲပါတယ်၊ သက်ဆိုင်ရာဌာနကလူတွေ ပါပါတယ်” လေယာဉ်မနေ့က ၁၁ နာရီခွဲမှာဆင်းတယ် စစ်ဆေးလို့ပြီးတာ ညနေ လေးနာရီမှပြီးတယ်"

လိုက်ပါလာတဲ့ ခရီးသည်တွေဟာ စစ်တွေ၊ ပုဏ္ဍားကျွန်းနဲ့ ပေါက်တောမြို့နယ်တွေကဖြစ်ပြီး သူတို့နေရပ်ပြန်နိုင်ရေးကိုသာ အစိုးရက စီစဉ်ပေးတာဖြစ်ပါတယ်။

ကျန်းမာရေးဝန်ကြီးဌာနရဲ့ ညွှန်ကြားချက်အတိုင်းဆောင်ရွက်တာဖြစ်ပြီး အကုန်လုံးကို ကန့်သတ်စောင့်ကြည့်တာ မဟုတ်ဘူးလို့ စစ်တွေခရိုင် အုပ်ချုပ်ရေးမှူး ဦးအောင်မြင့်ဦးက ပြောပါတယ်။

“ကွာရန်တင်းဝင်ဖို့ ငြင်းဆန်တဲ့သူ နှစ်ယောက်ကို သူနာပြုကျောင်းမှာ ထားထားတယ်။ မနေ့က အားလုံး ၆၅ ယောက် ဝန်ထမ်းတွေရှိတယ် သူတို့က ဟုမ်းကွာရန်တင်း။ ညွှန်ကြားချက်အတိုင်းပဲ ကျွန်တော်တို့က အားလုံးကို ကွာရန်တင်းထားတာတော့ မဟုတ်ပါဘူး။ ရောဂါဖြစ်ပွားရာဒေသက လာတဲ့သူတွေကိုပဲ ကွာရန်တင်းလုပ်တာပါ”

စစ်တွေမြို့နယ်မှာ ကိုရိုနာဗိုင်းရပ်စ်နဲ့ပတ်သက်ပြီး ကူညီဆောင်ရွက်နေတဲ့ အရပ်ဖက်အဖွဲ့က ကိုထွန်းလင်းအောင်က အင်းစိန်က နှစ်ဦးထဲကို ကန့်သတ်စောင့်ကြည့်ရုံနဲ့ လုံလောက်မှု မရှိနိုင်ဘူးလို့ ထောက်ပြပါတယ်။

“နှစ်ယောက်တည်းထားတာတော့ ဆေ့ပ်ဖြစ်မယ်မထင်ဘူး၊ လေယာဉ်ပေါ်မှာလည်း တစ်စီးတည်းအတူတူစီးလာခဲ့ပြီးပြီ တစ်စီးလုံးကို တူတူပဲ ကွာရန်တင်းထားစေချင်တယ်”

စစ်တွေမြို့နယ်မှာ သံသယ လူနာတစ်ဦးရှိပြီး ဆေးစစ်ဖို့ ရန်ကုန်ကို ပေးပို့ထားပါတယ်။ ရခိုင်ပြည်နယ်မှာ ကိုရိုနာဗိုင်းရပ်စ်ပိုး စောင့်ကြည်လူနာ စုစုပေါင်း ၃၆ ဦး ရှိနေပြီဖြစ်ပါတယ်။