မြန်မာ့တိုးတက်မှုတွေကို စောင့်ကြည့်နေ အမေရိကန်အမတ် ပြော

ဒီကနေ့ ဒေါ်အောင်ဆန်းစုကြည်ကို ရန်ကုန်မြို့တက္ကသိုလ်ရိပ်သာလမ်း နေအိမ်မှာ တွေ့ဆုံအပြီး ကျင်းပတဲ့ သတင်းစာရှင်းလင်းပွဲမှာ အဲဒီလို ပြောကြားလိုက်တာပါ။

ကရင်တိုင်းရင်းသားတွေနဲ့ မကြာခင်ကလုပ်တဲ့ အပစ်ရပ်ရေး လုပ်ရပ်ဟာ အရေးကြီးတဲ့ လမ်းကြောင်းမှန်ဖြစ်ပြီး တိုးတက်မှုတွေကို အမေရိကန် နိုင်ငံအနေနဲ့ စောင့်ကြည့်နေပါတယ်လို့ ပြောသွားပါတယ်။

ကရင်တိုင်းရင်းသားတွေနဲ့ အပစ်ရပ်တာမျိုး လုပ်သလို တခြား တိုင်းရင်းသားတွေနဲ့လည်း ဒီလို တိုးတက်အောင်လုပ်တာ မြင်လိုကြောင်းလည်း ပြောပါတယ်။ အလားတူ ဧပြီ ၁ ရက်မှာ ကျင်းပမယ့် ကြားဖြတ်ရွေးကောက်ပွဲဟာ လွတ်လပ်ပြီး တရားမျှတမှု ရှိမရှိ စောင့်ကြည့်မယ့်အကြောင်းနဲ့ အားလုံးသိတဲ့အတိုင်း လုပ်ဆောင်စရာတွေ အများကြီး ကျန်ရှိနေသေးတဲ့ အကြောင်းလည်း Mr. Mitch McConnell က ပြောပါတယ်။

မြန်မာနိုင်ငံအပေါ် ချမှတ်ထားတဲ့ အရေးယူပိတ်ဆို့မှု ရုပ်သိမ်းရေးကိစ္စနဲ့ ပတ်သက်လို့လည်း ဒီမိုကရေစီရေး တိုးတက်မှုခြေလှမ်းနဲ့ လွတ်လပ်ခွင့် ပေးမှုအလိုက် တစ်ဆင့်ချင်း ဆောင်ရွက်သွားမယ်လို့လည်း ပြောပါတယ်။ Mr. Mitch McConnell ဟာ မနက်ဖြန်မှာ သမ္မတ ဦးသိန်းစိန်နဲ့ တွေ့ဆုံဖို့ရှိပါတယ်။