မြန်မာနိုင်ငံ ငှက်ဖျားတိုက်ဖျက်ရေး ဗြိတိန် ကူညီဆောင်ရွက်မည်

ဒီနှစ်အတွက် မြန်မာပြည်က လူတသန်းကျော်ကို ကူညီနိုင်ဖို့ ဗြိတိန်နိုင်ငံနဲ့ တခြားအလှူရှင်တွေက အလှူငွေ တိုးမြှင့် ပံ့ပိုးပေးမှာ ဖြစ်ပါတယ်။

ဒီအစီအစဉ်မှာ ငှက်ဖျားလူနာပေါင်း ၁၆၆,၀၀၀ ကို မှန်ကန်တဲ့ ရောဂါသတ်မှတ်ချက် နဲ့ ကုသချက် ပေးနိုင်အောင် ကျန်မားရေးလုပ်သားနဲ့ ရပ်ရွာ စေတနာ့ဝန်ထမ်း နှစ်ထောင်ကျော်ကို လေ့ကျင့် သင်တန်းပေးရေး လုပ်ငန်း၊ ရေရှည်ခံ ဆေးစိမ်ခြင်ထောင်ပေါင်း သုံးသိန်းခွဲ ဝေငှဖို့နဲ့ ဝေငှပြီး ခြင်ထောင်ဟောင်း လေးသိန်းခွဲကို ဆေးပြန်စိမ်ပေးရေး လုပ်ငန်း၊ ငှက်ဖျားဆေးမတိုးတော့ပဲ ယဉ်ပါးသွားနိုင်ခြေရှိတဲ့ နေရာတွေမှာ ငှက်ဖျားအကြောင်း ပညာပေးရေးလုပ်ငန်း စတဲ့ လုပ်ငန်းအစီအစဉ်တွေ ပါဝင်ပါတယ်။

အခုအခါ ဆေးမတိုးတဲ့ ငှက်ဖျားရောဂါ ခေါင်းထောင်လာတာကြောင့် အာရှနဲ့ အာဖရိကက သန်းနဲ့ချီတဲ့ ပြည်သူတွေအတွက် အန္တရာယ် ရှိနေပါတယ်။

ဆေးယဉ်နေတဲ့ငှက်ဖျားရောဂါကို ၂၀၀၂ ခုနှစ်က ကမ္ဘောဒီးယား မှာ ပထမဦးဆုံး စတင်တွေ့ရှိခဲ့ပြီး ၂၀၀၉ ခုနှစ် ထိုင်း-ကမ္ဘောဒီးယားနယ်စပ်မှာ ဆေးယဉ်ငှက်ဖျား တိုက်ဖျက်ရေးလုပ်ငန်း စတင်ခဲ့ပါတယ်။ မြန်မာနိုင်ငံဟာလည်း ငှက်ဖျား ရောဂါ ဆေးယဉ်မှု ရှိမရှိ ပုံမှန်စောင့်ကြည့်ရမဲ့ နေရာတခု ဖြစ်လာပါတယ်။ နောက်ဆုံး တွေ့ရှိချက်တွေအရ ထိုင်း-မြန်မာနယ်စပ် နေရာအတော်များများမှာ ဆေးမတိုးတဲ့ ငှက်ဖျားပိုးတွေက ရှိနေရတယ်လို့ သိရပါတယ်။