အစိုးရသစ်လက်ထက် ငြိမ်းချမ်းရေးအောင်မြင်ဖို့ မျှော်လင့်နေ

လက်ရှိအစိုးရ သက်တမ်း ၅ နှစ်တာကာလမှာ ငြိမ်းချမ်းရေးလုပ်ငန်းတွေ နှောင့်နှေးခဲ့ပြီး အစိုးရသစ် ပြန်လည်ဖွဲ့စည်းမယ့် လာမယ့် ၅ နှစ်တာကာလမှာ နိုင်ငံရေးအရ တန်းတူဆွေးနွေးတာတွေ လုပ်ဆောင်ပေးဖို့ တိုင်းရင်းသား လက်နက်ကိုင် အဖွဲ့အစည်းတွေက လိုလားနေကြပါတယ်။

ပြီးခဲ့တဲ့ လကအထိ တိုက်ပွဲတွေပြင်းထန်ခဲ့တဲ့ ရခိုင်ပြည်နယ်မှာလည်း ရွေးကောက်ပွဲပြီးနောက်ပိုင်း တိုက်ပွဲတွေ ရပ်တန့်သွားပြီး တပ်မတော်နဲ့ ရက္ခိုင့်တပ်တော် AA အကြား တိုက်ပွဲတွေမဖြစ်အောင် အောက်ခြေမှာ ဆွေးနွေးမှုတွေလည်း ရှိလာပါတယ်။

ရခိုင်ဒေသ တိုက်ပွဲပြန်မဖြစ်ရင် လာမယ့် အစိုးရသစ်လက်ထက်မှာ ငြိမ်းချမ်းရေး အောင်မြင်နိုင်ခြေရှိနေတယ်လို့ လေ့လာသူတွေက သုံးသပ်ပါတယ်။

မြောက်ပိုင်းမဟာမိတ် အဖွဲ့တွေနဲ့ တပ်မတော်တို့ ပဏာမ အပစ်အခတ်ရပ်စဲဖို့ အောက်ခြေမှာ အပြုသဘော ဆောင်ဆွေးနွေးမှုတွေ ရှိပေမယ့် တရားဝင်လုပ်ဆောင်တာတော့ မရှိသေးဘူးလို့ တပ်မတော် သတင်းမှန် ပြန်ကြားရေးအဖွဲ့ ဥက္ကဋ္ဌ ဗိုလ်ချုပ် ဇော်မင်းထွန်းက ပြောလိုက်ပါတယ်။

“တရားဝင်ဆိုတာထက် ပထမဦးဆုံး ထိတွေ့ဆက်ဆံပြီးတော့ ညှိနှိုင်းနေတဲ့ဟာတွေတော့ ရှိတယ်။ အဲဒါတွေတော့ ရှိလိမ့်မယ်။ အဲဒါတွေကြ တရားဝင်မလုပ်သေးတာ မဟုတ်ဘဲ ကျွန်တော်တို့လည်း မသိသေးဘူးဖြစ်တယ် အဲဒါတွေက။ ကျွန်တော်မြင်တာကတော့ အခုလောလောဆယ် ရခိုင်ဘက်မှာတော့ အဲလိုလုပ်ခဲ့တာမြင်တယ်။ ဟိုဟာတော့ ကျွန်တော် မသိသေးဘူး။ သို့သော် ကျွန်တော်မြင်တာကတော့ အကုန်လုံးကတော့ အပြုသဘောဆောင်လိမ့်မယ်လို့တော့ ကျွန်တော်မြင်ပါတယ်”

ဗိုလ်ချုပ် ဇော်မင်းထွန်း ဘယ်သူတွေ ဆွေးနွေးတယ်ဆိုတာကိုတော့ တိတိကျကျ ထည့်သွင်းပြောဆိုသွားတာ မရှိပါဘူး။ ရခိုင်ပြည်နယ်ဘက်မှာ တိုက်ပွဲတွေလျော့ချဖို့အတွက် ဂျပန်နိုင်ငံက ကြားဝင် ညှိနှိုင်းဆွေးနွေးတာတွေရှိတယ်လို့ ဗိုလ်ချုပ် ဇော်မင်းထွန်းက RFA ကို နိုဝင်ဘာ ၁၉ ရက်နေ့က ပြောပါတယ်။

ဂျပန်နိုင်ငံရဲ့ ကြားဝင် စေ့စပ်ကူညီပေးမှုကြောင့် အခုဆိုရင် ရက္ခိုင့်တပ်တော် AA နဲ့ တပ်မတော်တို့ တိုက်ပွဲဖြစ်ပွားမှု လျော့ကျလာပြီး ရခိုင်ပြည်နယ် မြောက်ပိုင်းက ရွေးကောက်ပွဲ မကျင်းပနိုင်တဲ့ မြို့နယ် ၉ မြို့နယ်မှာ ရွေးကောက်ပွဲ ပြန်လည်ကျင်းပနိုင်ခြေ အလားအလာတွေ ရှိနေတာပါ။

ဒီကိစ္စနဲ့ ပတ်သက်ပြီး ရန်ကုန်မြို့မှာရှိတဲ့ ဂျပန်သံရုံးကို RFA က မေးမြန်းဖို့ကြိုးစားခဲ့ပေမယ့် ဆက်သွယ်လို့ မရခဲ့ပါဘူး။

ဂျပန်အစိုးရရဲ့ မြန်မာနိုင်ငံဆိုင်ရာ အမျိုးသားပြန်လည်သင့်မြတ်ရေး အထူးကိုယ်စားလှယ် Mr. Yohei Sasakawa နဲ့ မြန်မာနိုင်ငံဆိုင်ရာ ဂျပန်သံအမတ်ကြီး Mr. Ichiro Maruyama တို့ ပါဝင်တဲ့အဖွဲ့ဟာလည်း တိုက်ပွဲတွေ ဖြစ်ပွားနေတာကြောင့် လုံခြုံရေးအခြေအနေအရ ရွေးကောက်ပွဲ မကျင်းပခဲ့တဲ့ ရခိုင်မြောက်ပိုင်းက မြို့နယ်အချို့ကို နိုဝင်ဘာ ၂၈ ရက်နေ့က စစ်တွေမြို့ကနေတစ်ဆင့် တပ်မတော်ရဟတ်ယာဉ်နဲ့ သွားရောက် လေ့လာခဲ့တာရှိပါတယ်။

ရခိုင်ပြည်နယ်မှာ ရွေးကောက်ပွဲ ကျင်းပနိုင်မယ်ဆိုရင် ရှမ်းပြည်နယ်က ရွေးကောက်ပွဲ မကျင်းပနိုင်ခဲ့တဲ့ နေရာတွေကိုလည်း တစ်ခါတည်း ကျင်းပပေးဖို့ ရှမ်းပြည်တိုးတက်ရေးပါတီ SSPP/ SSA ပြောရေးဆိုခွင့် ရှိသူ ဗိုလ်မှူးစိုင်းဖုန်းဟန်က ပြောပါတယ်။

“တစ်ဆက်တည်းပါပဲ ကျွန်တော်တို့ မိုင်းကိုင်မလုပ်ရသေးဘူး။ ပြီးတော့ တန့်ယန်းမြို့နယ်အချို့လည်း မလုပ်ရသေးဘူး။ ရခိုင်နဲ့တော့ သိပ်မတူဘူးပေါ့ ပြောမယ်ဆိုရင်တော့။ ဒါပေမဲ့လည်း ချန်လှပ်ထားခြင်းခံရတယ်ဆိုတာကို ပြန်ပြုလုပ်ပေးဖို့ပေါ့နော် ကျွန်တော်တို့က တိုက်တွန်းလိုပါတယ်။ ရခိုင်မှာပြုလုပ်မယ့် ရွေးကောက်ပွဲနဲ့ အတူတူပေါ့နော်။ တစ်ကြိမ်တည်း လုပ်သွားမယ်ဆိုတဲ့ သတင်းလည်း ကျွန်တော်တို့ ကြားနေရပါတယ်။ ဒါကောင်းတာပေါ့။ ပြုလုပ်သွားဖို့လည်း တိုက်တွန်းပါတယ်”

NLD အနေနဲ့ လာမယ့် အစိုးရသစ်ဖွဲ့စည်းပြီးချိန်မှာလည်း နိုင်ငံရေးပြဿနာကို နိုင်ငံရေးနည်းနဲ့ ဆက်လက်ဖြေရှင်းသွားစေချင်ကြောင်း လက်ရှိတပ်မတော်နဲ့ ရက္ခိုင့်တပ်တော် AA တိုက်ပွဲတွေ ရပ်တန့်နေတာကိုလည်း ကြိုဆိုတယ်လို့ ဗိုလ်မှူး စိုင်းဖုန်းဟန်က ပြောပါတယ်။

၂၀၁၅ ရွေးကောက်ပွဲမှာ အမျိုးသား ဒီမိုကရေစီအဖွဲ့ချုပ် NLD ပါတီက အစိုးရ ဖွဲ့စည်းခွင့် ရခဲ့တာကြောင့် တိုင်းရင်းသား လက်နက်ကိုင် အဖွဲ့တွေနဲ့ ငြိမ်းချမ်းရေး ဆွေးနွေးမှုတွေမှာ ရှေ့ကိုပိုရောက်နိုင်မယ်လို့ အများပြည်သူက ယူဆခဲ့ကြပါတယ်။

လက်ရှိ NLD အစိုးရသက်တမ်း ၅ နှစ်ပြည့်ဖို့ ၄ လဝန်းကျင်သာ လိုတော့တဲ့ အချိန်ထိ ငြိမ်းချမ်းရေး လုပ်ငန်းစဉ်တွေက သိသိသာသာ တိုးတက်မှုမရှိဘဲ ရပ်တန့်နေတယ်လို့ ဝေဖန်မှုတွေလည်း ရင်ဆိုင်နေရတာပါ။

လာမယ့် အစိုးရသစ် လက်ထက်မှာ ငြိမ်းချမ်းရေး လုပ်ငန်းတွေ အောင်မြင်နိုင်ဖို့ ပစ်ခတ်တိုက်ခိုက်မှု ရပ်စဲရေး သဘောတူစာချုပ် NCA အပြင် အခြားနည်းလမ်းတွေနဲ့ပါ ကြိုးစားသင့်တယ်လို့ ကရင်အမျိုးသား အစည်းအရုံး KNU အထွေထွေ အတွင်းရေးမှူး ဖဒိုစောတာဒိုမူးက ပြောပါတယ်။

“ဒီနိုင်ငံရဲ့ အဖြေက NCA တစ်ခုတည်းပဲ ရှိတယ်ဆိုတာတော့ ကျွန်တော်ထင်တယ် အဲဒါ ပြည့်ပြည့်စုံစုံတော့ မဖြစ်ဘူး။ ဘာကြောင့်လဲဆိုတော့ NCA နဲ့သာ ကျွန်တော်တို့ ခိုင်ခိုင်မာမာလုပ်နိုင်တယ်ဆိုရင် ငါးနှစ်တာကာလက ညှိခွင့်တွေ အများကြီးရှိမှာပါ။ အခုဟာက NCA ထိုးထားတဲ့ဟာတောင်မှ အောင်မြင်စွာ အကောင်အထည် မဖော်နိုင်သေးတဲ့ကာလမှာ NCA ကပဲ သွားရမယ်ဆိုတော့ အကောင်အထည်မဖော်နိုင်တဲ့ လမ်းကြောင်းကို နောက်ထပ်အဖွဲ့တွေ ထပ်လျှောက်ခိုင်းတဲ့ပုံစံဆိုရင် ဘာမှလက်တွေ့မကျဘူးပေါ့နော်။ အဲအတွက်ကြောင့် ကျွန်တော်တို့ အကောင်အထည်မဖော်နိုင်တဲ့ NCA လမ်းကြောင်းကိုလည်း ဖော်နိုင်အောင် ကြိုးစားရမယ်။ ဒါ့အပြင် နိုင်ငံရေးဆွေးနွေးပွဲတွေ ဘုံဆုံရပ်တစ်ခုအနေနဲ့ထားပြီးတော့ အဲဒီဘက်ကို ဦးတည်ပြီး ပေါ်လစီချပြီးတော့ အဖြေရှာဖို့လိုတယ်”

မြန်မာနိုင်ငံရဲ့ နိုင်ငံရေးလမ်းကြောင်းဟာ ဒီမိုကရေစီ လမ်းကြောင်း တစ်ခုတည်းမဟုတ်ဘဲ တိုင်းရင်းသားတွေရဲ့ ဖက်ဒရယ်အရေးကိုလည်း အလေးထား စဉ်းစားဖို့ လိုအပ်တယ်လို့ ဖဒိုစောတာဒိုမူးက ပြောပါတယ်။

ပြီးခဲ့တဲ့ နိုဝင်ဘာ ၈ ရက်နေ့က ကျင်းပခဲ့တဲ့ ရွေးကောက်ပွဲမှာ NLD ပါတီက အစိုးရဖွဲ့စည်းဖို့လိုအပ်တဲ့ လွှတ်တော်ကိုယ်စားလှယ် အရေအတွက်ကို သိသိသာသာ ကျော်လွန်အနိုင်ရထားတာကြောင့် လာမယ့် အစိုးရသစ်ကိုလည်း NLD ပါတီကပဲ ဖွဲ့စည်းခွင့်ရမှာဖြစ်ပါတယ်။

ရွေးကောက်ပွဲ အနိုင်ရပြီးနောက် အမျိုးသား ညီညွတ်ရေး အစိုးရကို ဖွဲ့စည်းသွားမယ်လို့ NLD ပါတီ ခေါင်းဆောင်တွေက ပြောထားပါတယ်။

တိုင်းရင်းသား လက်နက်ကိုင် အဖွဲ့အစည်း အတော်များများကတော့ အမျိုးသား ဒီမိုကရေစီအဖွဲ့ချုပ် NLD နဲ့ ပူးပေါင်းဆောင်ရွက်ပြီး နောင်လာမယ့် အစိုးရသစ် ၅ နှစ်မှာ တစ်နိုင်ငံလုံး အပစ်အခတ်ရပ်စဲပြီး ငြိမ်းချမ်းရေးရဖို့ လိုလားနေကြပါတယ်။

လာမယ့် အစိုးရသစ်အနေနဲ့ ငြိမ်းချမ်းရေးနဲ့ ပတ်သက်ပြီး နိုင်ငံရေးဆွေးနွေးပွဲတွေ ဆက်လက်လုပ်ဆောင်စေချင်ပြီး နှစ်ဦးနှစ်ဖက် လက်ခံနိုင်တဲ့ ဆွေးနွေးမှုတွေဖြစ်ဖို့ လိုအပ်တယ်လို့ တအာင်း အမျိုးသားလွတ်မြောက်ရေး တပ်မတော် TNLA ပြောရေးဆိုခွင့်ရှိသူ ဗိုလ်မှူး မိုင်းအိုက်ကျော်က ပြောပါတယ်။

“အထူးသဖြင့်ကတော့ ကျွန်တော်တို့ လိုချင်တာကတော့ နှစ်ဦးနှစ်ဖက် လက်ခံနိုင်တဲ့ဟာပေါ့။ ဒီတစ်ဖက်သတ်ပိတ်ပြီးမှာ ဒီဘောင်အတွင်း ကြိုတင်ကဏ္ဍထည့်ထားပြီးမှ ဘောင်တွင်းကနေ ဆွေးနွေးမှုမျိုး အဲဒါမျိုး အရင်ကလည်း အဲဒီလိုမျိုးလုပ်လာတဲ့အခါကျတော့ ဒီငြိမ်းချမ်းရေးက ကြန့်ကြာနှောင့်နှေးနေတယ်။ အခုလည်း ဆွေးနွေးပွဲတွေရှိရင် နှစ်ဦးနှစ်ဖက် လက်ခံနိုင်တဲ့ အတိုင်းအတာ ဆောင်ရွက်မယ်ဆိုရင်တော့ ကျွန်တော်တို့က အရင်ကလည်း ဒီအတိုင်းပဲ အခုလည်း ဒီအတိုင်းပါပဲ။ အပစ်မရပ်သေးတဲ့အတွက် ကျွန်တော်တို့ အပစ်ရပ် အရင်လုပ်ဖို့လိုတယ်။ တိုက်ပွဲရပ်မှပဲ ဒီဆွေးနွေးပွဲက ပိုပြီးအဆင်ပြေမယ်ပေါ့ နိုင်ငံရေးဆွေးနွေးပွဲ။ ဦးစွာကတော့ ကျွန်တော်တို့က အပစ်ရပ်လက်မှတ် သဘောတူညီချက်ရှိဖို့တော့ အရင်လိုတယ်”

၂၀၀၈ အခြေခံ ဥပဒေ အောက်ကနေသွားတဲ့ ရွေးကောက်ပွဲကို အသိအမှတ်မပြုပေမယ့် ဒီမိုကရေစီ နည်းလမ်းအရ ရွေးကောက်ပွဲ ကျင်းပတဲ့အပေါ် ပြည်သူတွေက မဲပေးရွေးချယ်တာကို ဝင်ရောက်နှောင့်ယှက်တာမျိုး လုပ်ခဲ့တာမရှိဘူးလို့ ဗိုလ်မှူး မိုင်းအိုက်ကျော်က ပြောပါတယ်။

NLD ပါတီအနေနဲ့ ရွေးကောက်ပွဲ ကျင်းပပြီး နိုဝင်ဘာ ၁၂ ရက်နေ့မှာတော့ ဒီမိုကရေစီ ဖက်ဒရယ် ပြည်ထောင်စုကို တိုင်းရင်းသား နိုင်ငံရေးပါတီတွေနဲ့ လက်တွဲဆောင်ရွက်လိုကြောင်း တိုင်းရင်းသားပါတီ ၄၈ ပါတီ နာမည်တွေနဲ့တွဲပြီး ကြေညာချက် ထုတ်ပြန်လိုက်ပါတယ်။

အဲဒီကြေညာချက်ဟာ ကြိုဆိုရမယ့် ကိစ္စဖြစ်တယ်လို့ တိုင်းရင်းသား လက်နက်ကိုင် အဖွဲ့အစည်းတွေက ပြောပါတယ်။

နယ်ခြားစောင့်တပ်ဖွဲ့ BGF အနေနဲ့ လာမယ့် အစိုးရအဖွဲ့သစ် လက်ထက်မှာ စစ်ဘက်နယ်ဘက် ဆက်ဆံရေး ပိုမိုကောင်းမွန်စေချင်ပြီး တိုင်းရင်းသား အားလုံးအပေါ် တန်းတူဆက်ဆံရေး ရှိစေချင်တယ်လို့ BGF ပြောရေးဆိုခွင့်ရှိသူ ဗိုလ်မှူး နိုင်မောင်ဇော်က ပြောပါတယ်။

“ကျွန်တော်ကတော့ မြင်နေတာကတော့ တစ်ယောက်နဲ့တစ်ယောက် အာဃာတ တွေမထားဘဲ ရှေ့ဆက်သွားမယ်ဆို ကျွန်တော်တို့နိုင်ငံ မှောင်နေတဲ့အရာတွေကတော့ လင်းထွက်လာမယ်လို့ ကျွန်တော်က ခံယူပါတယ်။ ကျွန်တော်တို့အနေနဲ့ အဓိကက နိုင်ငံတစ်နိုင်ငံမှာ ပြည်ထောင်စု သမ္မတမြန်မာနိုင်ငံဖြစ်သွားတဲ့အခါကျတော့ ပြည်ထောင်စုခံထားတဲ့အတွက် တိုင်းရင်းသားပေါင်းစုံနဲ့ ဖွဲ့စည်းထားတဲ့ နိုင်ငံတစ်နိုင်ငံဖြစ်တော့ တိုင်းရင်းသားတွေရဲ့ သဘောထားတွေ၊ တစ်ယောက်နဲ့တစ်ယောက်ပေါ၊့ ဥပမာ မဖြစ်နိုင်တာတွေလည်း မတောင်းဆိုကြနဲ့ တစ်ယောက်နဲ့ တစ်ယောက် ညှိနှိုင်းပြီးတော့မှ ဆက်သွားမယ် အဲလိုမျိုး ကျွန်တော်တို့ကလည်း လိုချင်တာ”

NLD အစိုးရဟာ လက်ရှိ ၅ နှစ်တာ သက်တမ်းမှာ တာဝန်ယူထားပြီး အဲဒီအတွေ့အကြုံတွေနဲ့ လာမယ့်အစိုးရသစ် သက်တမ်း ၅ နှစ်ကို အကောင်းဆုံး လုပ်ဆောင်နိုင်မယ်လို့ မျှော်လင့်ကြောင်း ပြောပါတယ်။

အပစ်ရပ် လက်မှတ်ထိုးထားတဲ့ တိုင်းရင်းသား လက်နက်ကိုင် အဖွဲ့တွေက နိုဝင်ဘာ ၂၅၊ ၂၆ ရက်နေ့တွေမှာ ကျင်းပတဲ့ ငြိမ်းချမ်းရေး လုပ်ငန်းစဉ် ဦးဆောင်အဖွဲ့ PPST အစည်းအဝေးကနေ တိုင်းရင်းသားပါတီတွေ အပါအဝင် အမျိုးသား ဒီမိုကရေစီအဖွဲ့ချုပ်ရဲ့ ၂၀၂၀ ရွေးကောက်ပွဲ အောင်မြင်မှုကို ဂုဏ်ပြုကြောင်း၊ လာမယ့် အနာဂတ် နိုင်ငံရေး အခင်းအကျင်းနဲ့ ငြိမ်းချမ်းရေး လုပ်ငန်းစဉ်တွေမှာ အတူတကွ လက်တွဲပြီး အောင်မြင်အောင် ဆောင်ရွက်နိုင်မယ်ဆိုတာကို အလေးအနက် ယုံကြည်ကြောင်း နိုဝင်ဘာ ၂၆ ရက်နေ့က ထုတ်ပြန်ထားပါတယ်။

NCA အပစ်ရပ်လက်မှတ်မထိုးရသေးတဲ့ တိုင်းရင်သားလက်နက်ကိုင်အဖွဲ့တွေကလည်း ရွေးကောက်ပွဲအပြီးနောက်ပိုင်းမှာ အမျိုးသားပြန်လည်သင့်မြတ်ရေးနဲ့ ငြိမ်းချမ်းရေး အောင်မြင်ဖို့ အစိုးရသစ်နဲ့ ပူးပေါင်းဆောင်ရွက်သွားမယ်လို့ အင်အားကြီး လက်နက်ကိုင်အဖွဲ့ဖြစ်တဲ့ UWSA " ဝ" အပါအဝင် AA ရက္ခိုင့်တပ်တော်တို့က ထုတ်ပြန်ထားပါတယ်။

နိုင်ငံရေးလေ့လာသုံးသပ်သူ ဦးသန်းစိုးနိုင်ကတော့ ရခိုင်ပြည်နယ်မှာ တိုက်ပွဲတွေ ပြန်မဖြစ်အောင် ထိန်းထားနိုင်မယ်ဆိုရင် မြောက်ပိုင်းမဟာမိတ်အဖွဲ့တွေလည်း NCA လမ်းကြောင်းပေါ်ကို ရောက်လာနိုင်တာကြောင့် ငြိမ်းချမ်းရေးအတွက် အလားအလာကောင်းတွေရှိနေတယ်လို့ သုံးသပ်ပါတယ်။

“မြန်မာပြည်မှာဖြစ်နေတဲ့ ပြည်တွင်းစစ်ရဲ့ အကြီးဆုံးအကျပ်အတည်းဖြစ်တဲ့ ရခိုင်ပြည်နယ်က စစ်ရေးလှုပ်ရှားမှုတွေ လျှော့ချပစ်လိုက်နိုင်တာ ထူးခြားတဲ့ အောင်မြင်တိုးတက်မှုပါ။ အဲဒီအခြေအနေတွေကို သေချာကောင်းမွန်အောင် ကိုင်တွယ်ဆက်လုပ်ဆောင်သွားမယ်ဆိုရင် ပြီးခဲ့တဲ့ နှစ်အတွင်းက အခက်အခဲ အကျပ်အတည်းမျိုးနဲ့ အဟန့်တားအမျိုးမျိုးအောက်မှာ ရပ်ဆိုင်နေတဲ့ ငြိမ်းချမ်းရေးလုပ်ငန်းစဉ်တွေ ပိုမိုပြီပြင်အောင်မြင်လာလိမ့်မယ်လို့ ကျွန်တော်ကတော့ မျှော်လင့်ပါတယ်။ FPNCC မြောက်ပိုင်းအဖွဲ့တွေနဲ့ အမျိုးသားပြန်လည်သင့်မြတ်ရေးနဲ့ ငြိမ်းချမ်းရေးကော်မရှင်တို့ကြားထဲမှာ ဆွေးနွေးမှုတွေပြီးလို့ NCA လမ်းကြောင်းပေါ် သူတို့ လျှောက်လာပြီဆိုရင်တော့ ဒီငြိမ်းချမ်းရေးအတွက် ရွှေတံခါးကြီးပွင့်ပြီလို့ ဒီလိုမှန်းဆလို့ရနိုင်တဲ့ အခြေအနေတွေ ရှိပါတယ်”

AA အပါအဝင် မြောက်ပိုင်း မဟာမိတ်အဖွဲ့တွေနဲ့ ငြိမ်းချမ်းရေး ဆွေးနွေးဖို့ အခြေအနေနဲ့ ပတ်သက်ပြီး နိုင်ငံတော် သမ္မတရုံး ပြောရေးဆိုခွင့်ရှိသူ ဦးဇော်ဌေးကို အိမ်တော် သတင်းသမားများ ဖေ့ဘွတ်စ် ဂရုကနေ ဆက်သွယ်မေးမြန်းထားပေမယ့် ဒီနေ့ညနေ ၅ နာရီအထိ တစ်စုံတစ်ရာ တုံ့ပြန်ပြောဆိုခြင်း မရှိသေးပါဘူး။

အမျိုးသား ဒီမိုကရေစီအဖွဲ့ချုပ်ဟာ အခုလာမယ့် ၂၀၂၁ ခုနှစ်ဆန်းကစပြီး နောက်ထပ်သက်တမ်း ၅ နှစ်ကို အစိုးရတာဝန် ဆက်လက်ထမ်းဆောင်ရမှာဖြစ်ပါတယ်။

ပြီးခဲ့တဲ့အစိုးရသက်တမ်းအတွင်း တိုင်းရင်းသားတွေနဲ့ မပြေလည်တာတွေရှိခဲ့ပြီး ငြိမ်းချမ်းရေးညှိနှိုင်းမှုတွေမှာလည်း သိသာတဲ့ရလဒ်တွေ မထွက်ခဲ့ပါဘူး။ ဒါပေမဲ့ ဒီအခြေအနေမတွေကနေ တိုးတက်မှုတွေရှိလာအောင် လာမယ့်အစိုးသစ်သက်တမ်းမှာ လုပ်ဆောင်လိမ့်မယ်လို့ တိုင်းရင်းသားလက်နက်ကိုင် အဖွဲ့အစည်းအတော်တော်များက မျှော်လင့်နေကြပါတယ်။