ကင်တားနားပြောဆိုချက် မြန်မာ အစိုးရ ငြင်းပယ်

မြန်မာနိုင်ငံခရီးစဉ်အတွင်း မိတ္ထီလာမြို့မှာ ဆန္ဒပြလူအုပ်က အကြမ်းပတမ်းပြုမူခဲ့ကြပေမယ့် အာဏာပိုင်တွေက အကာအကွယ်မပေးဘဲ ဥပေက္ခာပြုနေခဲ့ကြတယ်လို့ ကုလသမဂ္ဂ လူ့အခွင့်အရေး အထူးကိုယ်စားလှယ် မစ္စတာ ကင်တားနား Tomas Ojea Quintana ပြောဆိုခဲ့တာဟာ အဖြစ်မှန်နဲ့ ကွဲလွဲနေတယ်လို့ မြန်မာအစိုးရက တုံ့ပြန်ပြောကြားလိုက်ပါတယ်။

သမ္မတ ဦးသိန်းစိန်ရဲ့ ပြောခွင့်ရပုဂ္ဂိုလ်၊ ပြန်ကြားရေး ဝန်ကြီးဌာန  ဒုတိယဝန်ကြီး ဦးရဲထွဋ်က ကုလသမဂ္ဂ လူ့အခွင့်အရေး အထူးကိုယ်စားလှယ်ဟာ  မြန်မာနိုင်ငံ ခရီးစဉ်အတွင်း ဘယ်လိုဘေးအန္တရာယ်မျိုးနဲ့မှ  မကြုံတွေ့ခဲ့ရဘူးလို့ ပြောပါတယ်။

မိတ္ထီလာမြို့မှာ ဆန္ဒပြသူတွေက မစ္စတာကင်တာနားရဲ့ယာဉ်တန်း အနီးချဉ်းကပ်ခဲ့ကြတာဟာ စာတစ်စောင်နဲ့ တီရှပ်တစ်ထည်ပေးဖို့သာဖြစ်ကြောင်း၊ ဆန္ဒပြသူတွေကို ကြိုတင်လူစုခွဲခိုင်းခဲ့တဲ့အတွက် မစ္စတာ ကင်တားနား ရောက်လာတဲ့အခါ လူတစ်ရာလောက်သာရှိတော့ကြောင်း၊ ယာဉ်တန်းကို ရဲကားတစ်စီးက စောင့်ကြပ်လိုက်ပါနေပြီး၊ ရဲအရာရှိ ၃ဝ က လူအုပ်ကို ထိန်းသိမ်းနေကြောင်း၊ မစ္စတာ ကင်တားနားကို ရဲတပ်ဖွဲ့က စောင့်ရှောက်နေသလို၊ ဆန္ဒပြသူတွေကလည်း သူ့ကိုရန်မူဖို့ ရည်ရွယ်ချက်မရှိကြကြောင်း၊ ရဲတပ်ဖွဲ့လမ်းရှင်းပေးတဲ့အတွက် မစ္စတာကင်တာနားရဲ့ယာဉ်တန်းဟာ ဘေးမသီရန်မခ ထွက်ခွာသွားခဲ့ကြောင်း ဦးရဲထွဋ်က AP သတင်းကို ပြောဆိုခဲ့ပါတယ်။